ኢዮብ 32

32 ¹ኢዮብ በገዛ ዓይኑ ጻድቅ ስለ ነበር እነዚህ ሦስት ሰዎች መልስ መስጠት ተዉ። ²ከዚያም የቡዛዊው የበራክኤል ልጅ፣ ከራም ወገን የሆነው የኤሊሁ ቍጣ ነደደ፤ ኢዮብ ከእግዚአብሔር ይልቅ ራሱን ጻድቅ ስላደረገ ቍጣው በኢዮብ ላይ ነደደ። ³ደግሞም መልስ ሳያገኙ ኢዮብን ስለ ኰነኑ፣ ቍጣው በሦስቱ ወዳጆቹ ላይ ነደደ። ⁴ኤሊሁ ግን እነርሱ ከእርሱ በዕድሜ ስለሚበልጡ ኢዮብን ለመናገር ይጠብቅ ነበር። ⁵ነገር ግን እነዚህ ሦስት ሰዎች የሚሉት እንደሌላቸው ባየ ጊዜ ኤሊሁ ተቈጣ። ⁶የቡዛዊው የበራክኤል ልጅ ኤሊሁም እንዲህ ብሎ ተናገረ፤ “እኔ በዕድሜ ታናሽ ነኝ፤ እናንተም ሽማግሌዎች ናችሁ፤ ስለዚህ የማውቀውን ልነግራችሁ ፈርቼ ዝም አልሁ። ⁷እንዲህ አልሁ፤ ‘ዕድሜ ይናገር፤ ብዙ ዓመታትም ጥበብን ያስተምሩ።’ ⁸ነገር ግን በሰው ውስጥ ያለው መንፈስ፣ የሁሉን ቻይ እስትንፋስ፣ ማስተዋልን ይሰጣል። ⁹ጥበበኞች የሚሆኑ ሽማግሌዎች ብቻ አይደሉም፤ ትክክል የሆነውን የሚያስተውሉም አዛውንቶች ብቻ አይደሉም። ¹⁰ስለዚህ እላለሁ፤ አድምጡኝ፤ እኔም ደግሞ የማውቀውን እናገራለሁ። ¹¹እነሆ፣ ቃላችሁን ጠበቅሁ፤ የምትሉትን ስትፈልጉ ሳላችሁ ምክንያታችሁን አዳመጥሁ። ¹²ፍጹም ትኵረት ሰጠኋችሁ፤ ነገር ግን ከእናንተ አንዱ ስንኳ ኢዮብን አላረታም፤ ለክርክሩም መልስ አልሰጠም። ¹³ስለዚህ፣ ‘ጥበብን አገኘን፤ እርሱን የሚያስረታ እግዚአብሔር ነው እንጂ ሰው አይደለም’ አትበሉ። ¹⁴ኢዮብ ቃሉን በእኔ ላይ አላሰለፈም፤ እኔም በእናንተ ክርክር አልመልስለትም። ¹⁵ተደናግጠዋል፤ የሚሉትም ነገር የላቸውም፤ ቃላት ተለያቸው። ¹⁶እነርሱ ዝም ስላሉ፣ መልስም ሳይሰጡ ቆመው ስለ ቀሩ፣ ልጠብቅን? ¹⁷እኔም ደግሞ የእኔን ድርሻ እናገራለሁ፤ እኔም ደግሞ የማውቀውን እገልጣለሁ። ¹⁸ቃላት ሞልተውብኛልና፤ በውስጤ ያለው መንፈስ ያስገድደኛል። ¹⁹በውስጤ፣ መተንፈሻ እንደሌለው ወይን ጠጅ፣ ሊፈነዳ እንደ ተዘጋጀ አዲስ አቁማዳ ነኝ። ²⁰እፎይ እንዲለኝ መናገር አለብኝ፤ ከንፈሬን ከፍቼ መመለስ አለብኝ። ²¹ለማንም አድልዎ አላደርግም፤ ማንንም አላቆላምጥም፤ ²²ማቆላመጥን አላውቅምና፤ ባውቅ ኖሮ ፈጣሪዬ ቶሎ በወሰደኝ ነበር።”