ኢዮብ 33

33 ¹“አሁን ግን፣ ኢዮብ ሆይ፣ ቃሌን ስማ፤ የምናገረውን ሁሉ አድምጥ። ²እነሆ፣ አፌን ከፍቻለሁ፤ ምላሴም በትናጋዬ ቃላትን ትቀርጻለች። ³ቃሌ ከቅን ልብ ይወጣል፤ ከንፈሮቼም የሚያውቁትን በቅንነት ይናገራሉ። ⁴የእግዚአብሔር መንፈስ ፈጠረኝ፤ የሁሉን ቻይ አምላክም እስትንፋስ ሕይወትን ይሰጠኛል። ⁵ከቻልህ መልስልኝ፤ በፊቴ ነገርህን አስተካክለህ ተነሥተህ ቁም። ⁶እነሆ፣ በእግዚአብሔር ፊት እንደ አንተ ነኝ፤ እኔም ደግሞ ከሸክላ የተቈነጠስሁ ነኝ። ⁷የእኔ ፍርሃት አያስፈራህ፤ የእኔም ጫና አይከብድብህ።

⁸“በርግጥ እኔ እየሰማሁ ተናግረሃል፤ የቃላትህንም ድምፅ ሰምቻለሁ። ⁹‘ንጹሕ ነኝ፣ ዐመፅም የለብኝም፤ ጽዱ ነኝ፣ በደልም በእኔ ዘንድ የለም። ¹⁰ይሁን እንጂ እርሱ ነቀፋ ያገኝብኛል፤ እንደ ጠላቱም ይቈጥረኛል። ¹¹እግሮቼን በግንድ ያስራል፤ መንገዶቼንም ሁሉ ይጠባበቃል።’

¹²“በዚህ ነገር ግን ልክ አይደለህም እልሃለሁ፤ እግዚአብሔር ከማንም ሟች ይበልጣልና። ¹³እርሱ ለሰው ቃል አንዳች አይመልስም ብለህ ለምን ትከራከረዋለህ? ¹⁴እግዚአብሔር በአንድ መንገድ፣ ከዚያም በሌላ ይናገራልና፤ ሰው ግን አያስተውለውም። ¹⁵በሕልም፣ በሌሊት ራእይ፣ ሰዎች በመኝታቸው ላይ ሳሉ ከባድ እንቅልፍ በወደቀባቸው ጊዜ፣ ¹⁶ያን ጊዜ ጆሮአቸውን ይከፍታል፤ ማስጠንቀቂያውንም ያተምባቸዋል፤ ¹⁷ሰውን ከክፉ ሥራው ይመልስ ዘንድ፣ ትዕቢትንም ከሰው ይከለክል ዘንድ፤ ¹⁸ነፍሳቸውን ከጒድጓድ ይጠብቃል፤ ሕይወታቸውንም በሰይፍ ከመጥፋት ይከለክላል።

¹⁹“ሰውም ደግሞ በመኝታው ላይ በሕመም ይገሠጻል፤ በአጥንቶቹም ውስጥ የማያቋርጥ ሕመም አለ፤ ²⁰ስለዚህም ሕይወቱ እንጀራን ትጸየፋለች፤ ነፍሱም የተመረጠውን ምግብ ትጸየፋለች። ²¹ሥጋው ይከሳል፤ ተሰውረው የነበሩ አጥንቶቹም ይወጣሉ። ²²ነፍሱ ወደ ጒድጓድ ትቀርባለች፤ ሕይወቱም ሞትን ወደሚያመጡት ትቀርባለች።

²³“ለእርሱ መልእክተኛ፣ ከሺህ አንዱ የሆነ አማላጅ ቢኖር፣ ለሰውም የሚገባውን ነገር ሊነግረው፣ ²⁴ይራራለትና እንዲህ ይላል፤ ‘ወደ ጒድጓድ ከመውረድ ታደገው፤ ቤዛ አግኝቻለሁና።’ ^a a v24 ነፍስን ከጒድጓድ የሚያድነው ቤዛ፣ ከኤሊሁ ቃላት አልፎ አባታችን አንድ ቀን በኢየሱስ ወደሚያዘጋጀው ቤዛ ይጠቍማል፤ እርሱም ሕይወቱን ለብዙዎች ቤዛ አድርጎ ሰጠ። ²⁵ያን ጊዜ ሥጋው ከሕፃን ሥጋ ይልቅ ይለመልማል፤ ወደ ወጣትነቱ ዘመንም ይመለሳል። ²⁶ወደ እግዚአብሔር ይጸልያል፤ አምላኪውም በእርሱ ዘንድ ተቀባይነትን ያገኛል፤ አምላኪው የእግዚአብሔርን ፊት በደስታ ጩኸት ያያል፤ እግዚአብሔርም ጽድቁን ለዚያ ሰው ይመልሳል። ²⁷በሰዎች ፊት እየዘመረ እንዲህ ይላል፤ ‘ኀጢአት ሠራሁ፣ ቅኑንም ነገር አጣመምሁ፤ ነገር ግን ብድራት አልተከፈለኝም። ²⁸ነፍሴን ወደ ጒድጓድ ከመውረድ ተቤዠ፤ እኔም ብርሃንን አያለሁ።’

²⁹“እነሆ፣ እግዚአብሔር ይህን ሁሉ ከሰው ጋር ደጋግሞ ያደርጋል፤ ³⁰ነፍሱን ከጒድጓድ ይመልስ ዘንድ፤ በሕያዋን ብርሃንም ይበራ ዘንድ።

³¹“ኢዮብ ሆይ፣ አድምጥ፤ ስማኝ፤ ዝም በል፣ እኔም እናገራለሁ። ³²የምትለው ነገር ቢኖርህ መልስልኝ፤ ተናገር፤ ጻድቅ ሆነህ ማየትን እወዳለሁና። ³³ያለዚያ ግን ስማኝ፤ ዝም በል፣ እኔም ጥበብን አስተምርሃለሁ።”