Elihu Ya Yi Magana da Ayuba

Elihu ya ce wa Ayuba shi ma yumɓu ne kawai, ba abin tsoro ba. Amsarsa ita ce Allah yana magana, cikin mafarkai da cikin azaba a kan gadon ciwo, don ya juyo da mutum daga rami, kuma mai shiga tsakani zai iya cewa: ka cece shi, na sami fansa.

Babi na 33.

“Amma yanzu, Ayuba, ka ji maganata; ka saurari duk abin da nake faɗa. Duba, na buɗe bakina; harshena yana furta kalmomi a bakina. Maganata tana fitowa daga zuciya ta gaskiya, leɓunana kuma suna faɗar abin da suka sani da gaskiya. Ruhun Allah ya yi ni, numfashin Maɗaukaki kuma yana ba ni rai. Ka amsa mini, in za ka iya; ka shirya ƙararka a gabana, ka kuma tsaya tsayin daka. Duba, ni kamarka nake a gaban Allah; ni ma daga laka aka ƙera ni. Kada tsorona ya razana ka, kada kuma matsina ya nauyaya maka.

“Hakika ka faɗa a kunnena—na ji ainihin muryar maganarka. ‘Ni mai tsabta ne, ba tawaye; ni mai tsarki ne, babu kuma laifi a gare ni. Duk da haka yana nemo mini laifi; yana ɗaukata a matsayin maƙiyinsa. Ya sa ƙafafuna a turu; yana sa ido a kan dukan hanyoyina.’

“Amma a cikin wannan ba ka yi daidai ba, na amsa maka, gama Allah ya fi kowane ɗan adam girma. Me ya sa kake yin jayayya da shi, cewa ba ya amsa ko ɗaya daga cikin maganganun mutum? Gama Allah yana magana a hanya guda, sa'an nan a wata, ko da yake ba wanda ya lura da shi. A cikin mafarki, a cikin wahayi na dare, sa'ad da barci mai zurfi ya kama mutane yayinda suke gyangyaɗi a kan gadajensu, sai ya buɗe kunnuwansu, ya kuma sa gargaɗinsa a ransu, domin ya juyar da mutum daga mugun aiki, ya kuma kiyaye mutum daga girman kai, yana tsare ransu daga rami, rayuwarsu daga hallaka ta wurin takobi.

“Ana kuma tsawata wa mutum da zafi a kan gadonsa, da ciwo marar fasawa a cikin ƙasusuwansa, har rayuwarsa ta ƙyamaci gurasa, ransa kuma ya ƙi mafi kyawun abinci. Namansa yana lalacewa, ƙasusuwansa kuma, da dā suke ɓoye, yanzu suna bayyana a fili. Ransa yana kusantar rami, rayuwarsa kuma ta kusanci masu kawo mutuwa.

“In akwai manzo dominsa, matsakanci—ɗaya cikin dubu—domin ya furta wa mutum abin da yake daidai a gare shi, ya kuma yi masa alheri ya ce, ‘Ka tsare shi daga gangarawa zuwa rami; na sami fansa,’ ^a sai naman jikinsa ya zama sabo fiye da na yaro; ya koma zuwa kwanakin ƙuruciyarsa. Yana addu'a ga Allah, mai sujada kuma ya karɓu a wurinsa; mai sujada yana ganin fuskar Allah da sowar farin ciki, Allah kuma yana mayar da adalcinsa ga mutumin nan. Yana rera waƙa a gaban waɗansu ya ce, ‘Na yi zunubi na kuma karkatar da abin da yake daidai, duk da haka ba a saka mini ba. Ya fanshi raina daga gangarawa zuwa rami, zan kuma ga haske.’

“Duba, Allah yana yin dukan waɗannan abubuwa akai-akai ga mutum, domin ya mayar da ransa daga rami, domin a haskaka shi da hasken masu rai.

“Ka kula, Ayuba; ka saurare ni. Ka yi shiru, ni kuma zan yi magana. In kana da abin faɗi, ka amsa mini; ka yi magana, gama zan yi murna in ga an baratar da kai. In ba haka ba, sai ka saurare ni; ka yi shiru, ni kuma zan koya maka hikima.”