Elihuna Jobli Ngazek
Elihuna Jobli, ila leikhonnao eina sākakhuina, ili ngacheeki kaji khikha maleimana, da hānga. Awui ngahānkāna hina: Varena hāngriya—mangli kala pettungli khanang eina—mili chomwui eina latkhui khavai; kala tuisak sāme akhana ‘ali kankhuilu, Ina ngatangman akha samphanghaira’ da hāngpaira.
33 1Kha ara, O Job, iwui tuibing nganālu; ina kahāng saikora nganākhuilu. 2Yanglu, ina ikhamor makai; imalena ikhamorlungli tui matuira. 3Iwui tui wuklung khangatarwui eina kharā, kala imorchaina theipai chi ningkathar eina hānga. 4Varewui Manglāna ili sākahaina, kala Sashap-pangshapawui khaksuina ili ringngasaka. 5Na matuishapakha, ili ngahānkāmilu; iwui mangāli nawui tuingaphun ngarānhaida nganinglu. 6Yanglu, Varewui mangāli ina na thāda kathāna; inala leikhonwui eina sākahaina. 7Iwui khangachee nali mangachee ngasakaranu, kala iwui malungkharing nawuitungli matāmara.
8Mashoila na iwui khanāli hānga; ina nawui tuikhon chi shai. 9Ina thara, salāng maleimana; ina kathara, kala iwuili khayon maleimana. 10Chithālala ana iwuili khayon phena; ili awui yangkashe akha thāda shānkhui. 11Ipheili ana zurthing sanga; kala iwui shongfa kachida yangkaziya.
12Kha hili na mamashungmana, ina nali ngahānkāra, kaja Vare mikumowuitungli reikhameiya. 13Ana mikumowui tui akhalila mangahānkāmana da khisāda nana ali ngasungkhala? 14Kaja Varena apong akhali matui, kala apong kateili matui, chithālala khipānakha matheimana. 15Mang eina, ngayāshongwui khamahā eina, mina piphup kahai rā tharan, athumwui petli pilakha, 16chiwui thili ana athumwui khanā rak ngasaka kala awui hāngkhamathin chi athumwuitungli tāshungmi, 17mikumoli moreiwui eina ngareiung khavai kala mipāli langkasowui eina khuithuimi khavai, 18ana athumwui manglā chomwui eina khāngshokmi, kala athumwui mirin raighai eina shimānhaokiwui eina khāngshokmi.
19"Mi akhala awui petli kachot eina kala ara̱kuili atam kachida achinā eina kahara, 20chieina awui mirinna kashakazā yangkharinga, kala amanglāna kashakazā mathāmeikap kaji chila yangkharinga. 21Awui phasā ngasāhaowa, kala rida ngathumda leikahai ara̱kui shokhaira. 22Amanglā chomli, kala awui mirin kathi khuirā kahaibingli vānganaimamānhaira.
23"Awui vang thing akhawui ngachaili akha ngashikkhame kazingrao akha mili awui vang khamashung chi phongkhavai leiakha, 24kala ali lumashanda hānga, "Ali chomli khavāwui eina khuishokmilu; ina ngatangman akha samphanghaira," a a v24 Manglā chomwui eina ngatangkhui kahai ngatangman hi Elihuwui tuiwui eina latmeida, ithumwui Avāna zimiksho akhali Jishuwui alungli khami ngatangman chili thānzata; ana mi kachungkhawui vang awui kharing chi ngatangmanna chigata. 25chieina awui phasā nao chiwui phasāli phāmeida kharingra; ana nganuilakhawui atambing latungra. 26Ana Vareli seihā sai, kala shitkasanga mi chi ana khuisangmi; shitkasanga mi chi khamathānkhon eina Varewui mai chi thei, kala Varena mi chili awui khamashung khangarong hanmiluishitra. 27Ana mibingwui mangāli laa sāda hānga, "Ina morei sāda khamashung chi mashongachei ngasakhaowa, kha chi ili maronhaimiranga. 28Ana imanglā chomli khavāwui eina ngatangmi, kala ina kahor chi theira."
29"Yanglu, Varena mi akhawui vang ot saikora hi latlui latluida sai, 30amanglā chomwui eina khuiungmikhavai, chieina ana kharingabingwui kahor eina horchamra.
31"O Job, nganātitkhuilu; nganālu, ili nāshunglu. Kasaikha pamlu, chieina ina hāngra. 32Nawui khi hāngkapo leiakha, ili ngahānkāmilu; matuilu, kaja ina thangmeihaoda nali mashung ngasak chi theikhavai ningchānga. 33Maningakha, nganālu; ili nāshunglu; kasaikha pamlu, chieina ina nali thangkhamei tamchitheira."
