Avā Khangui Ot Masāmana
Elihuna Jobwui tui ali hānglui, kala Avāwui mashun chi yangsangmi: saikora mungkhamena mashunli mangui ngasakmara, wungnaoli mijang mazangmana, kala tangkhamang lungli pheikār saikora theisera. Awui tui ngachangna ningmalāng maleimana: Jobli katang eina tangda chāng yangranu.
34 1Kala Elihuna hānglui: 2"Nathum thangkhamabing, iwui tui nganālu; nathum kaji theibing, ili nganākhuilu. 3Kaja khamorna kashakazā khamazap thāda, khanāna tui tamyanga. 4Ithumna khamashung khangarong chi pangkhuisa; ithumwui ngachaili kaphā chi theisa. 5Kaja Jobna hānga, 'I khamashungana, kala Varena iwui mashun khuithuihaira; 6Ina mashunglala, ili kakapik da phaninga; iwuili morei maleilala, iwui khamā chi maraikapai.' 7Job kathā mipā khipā leikhala, mana̱kashi chi kayākha suitāmeira, 8kaji makaphā kasābingli sakruma, kala makhayā mibingli ngasoda zata? 9Kaja ana hānga, 'Vareli ningyāng ungrala mi akhana khikha masamphangmana.' 10Chiwui vang eina ili nganāmilu, nathum theishingkakhui khalei mibing: makaphā ot sā chi Varewui eina katāva̱li leiranu, kala khangui ot sā chi Sāshap-pangshapawui eina katāva̱li leiranu. 11Kaja mi akhawui otsak athishurda ana ali sāman mira, kala awui shongfa athishurda ana chi awuitungli shoksangra. 12Kachangkhat eina, Varena makhayāwui ot masāmara, kala Sāshap-pangshapana mashun masho ngasakmara. 13Khipāna ali ngaleiwui akhavā sāngasakhala, kala khipāna okathui katonga chi awuitungli khaningkaihala? 14Kalikha ana mikumowui pongli awui ning sakhaida awui manglā kala awui khaksui khangtākhuiakha, 15phasā khavaia saikora shimānrumhaora, kala mi chifali hanungra. 16Nawuili theishingkakhui leiakha, hi nganākhuilu; iwui tuiwui akhon chi nganālu. 17Mashunli ningkakachaia mina mungshaprala? Khamashunga kala pangshapa chili nana phenrala, 18awungali, 'Arema akha,' da, kala khangamabingli, 'Makhayābing,' da kahānga, 19wungnaobingli mijang masā, kachāmatungli kashāngali mayangsangmana, kaja athum saikora awui pāng eina kasāna? 20Hunkhawui alungli athum thi; ngayā sailung mibing ngatha̱da kānthuihaira, kala kapangabing mipāng maningla raihaira. 21Kaja awui mikna miwui shongfali yanga, kala awui pheikār saikora ana thei. 22Makaphā kasābingna khalatta ngathum khavai, tangkhamangla, tangmangting kahaila maleimana. 23Kaja ana Varewui mangāli bicharli vāki khavai, Varena mi akhali chungmeida phaning khavai khikha maleimana. a a v23 Elihuwui tui hina: Varena bichar tāra̱ khavai ngathingkhui lah kapangsang atam khikha darkar maleimana — ana khalatta ot sāmānga. 24Ana kapangabingli ngathingkhui maleila sāteka, kala athum apamli kateibingli pamngasaka. 25Chithāda athumwui otsak theida ana ngayāli athumli mashongachei ngasakhaowa, chieina athum akha̱ sāmihaira. 26Athumwui makaphā makhayāwui vang, kayangbingwui miktāli ana athumli shao, 27kaja athum awui thi shurwui eina ngareithuihaira, kala awui shongfa akhalila mayangsangmana, 28chieina athumna kachāmali awuili chapta vaokhavai sāngasaka, kala ana kachotabingwui khangakao chi shāmi. 29Ana va̱ri leiakha, khipāna khayon mikhala? Ana amai ngathumhaida, yurliranu mi akhaliranu, khipāna ali theirakhala? 30chieina Vare makathei mi khipānakha mamungra lah mibingli khalen masangmira. 31Kaja khipānakha Vareli, 'Iwui tandi khami ina phungmihaira; ina mamayāngluimara; 32ina mathei chi ili tamchitheimilu; ina khangui otsaakha, ina masāluimara,' da hānghairala? 33Nawui hāngkhamachin nana makhuikasangwui vang eina, ana na khalattawui apong athishurda tandi khamira? Kaja nana pangsangki kajina, I maningmana; chiwui vang eina nana thei chi chitheilu. 34Theishingkakhui katheia mibingna ili hāngra, kala ili nganākasang thangkhamei mi kachiva̱na hāngra, 35'Jobna awor maleila matui; awui tuili theishingkakhui maleimana.' 36Iyavo, makhayā mibing thāda ngahānkākahaiwui vang Jobli akatanga tamyangkapaini kaje! 37Kaja ana awui moreili ngakaikashi sangminarra; ana ithumli phonglāk eina mana̱shi kala Vareli mamayāmada awui tui mataisang ngasaka."
