ኢዮብ 34 FHB Father's Heart Bible™

34 ¹ኤሊሁ ድማ ቐፂሉ ኸምዙይ በለ፦ ²“ኣቱም ለባማት ቃላተይ ስምዑ፤ ኣቱም እትፈልጡ ድማ ኣፅምዑኒ። ³እዝኒ፥ ከምቲ ኣፍ ብልዒ ዝጥዕም፥ ቃላት ትምርምር እያ እሞ። ⁴እቲ ቅኑዕ ንምረፅ፤ እቲ ፅቡቕ እንታይ ምዃኑ ድማ ኣብ መንጎና ንፍለጥ። ⁵ኢዮብ ከምዙይ ኢሉ እዩ እሞ፦ ‘ኣነ ፃድቕ እየ፥ እግዚኣብሄር ግና ፍርደይ ኣግሊሉለይ፤ ⁶ቅኑዕ እኳ እንተኾንኩ ሓሳዊ ተቘፀርኩ፤ ቍስለይ ዘይሓዊ እዩ፥ ዓመፅ እኳ ዘይብለይ።’ ⁷ከም ኢዮብ ዝበለ ሰብኣይ መን እዩ፥ ንሱ ፀርፊ ኸም ማይ ዝሰቲ፥ ⁸ምስ ገበርቲ እከይ ዝሓብር፥ ምስ ክፉኣት ሰባት ድማ ዝኸይድ፤ ⁹ንሱ ከምዙይ ኢሉ እዩ እሞ፦ ‘ሰብ ገለ እኳ ኣይረብሕን፥ ብእግዚኣብሄር ብምሕጓሱ።’ ¹⁰ስለዙይ ኣቱም ምስትውዓል ዘለኩም ሰባት ስምዑኒ፦ ክፍኣት ምግባር ካብ እግዚኣብሄር፥ ዓመፅ ምግባር ድማ ካብቲ ዅሉ ዝኽእል ይርሓቕ። ¹¹ከም ግብሪ ሰብ ይፈድዮ እዩ እሞ፥ ከም መንገዱ ድማ ኣብ ልዕሊኡ የምፅእ። ¹²ብሓቂ እግዚኣብሄር ክፉእ ኣይገብርን፥ እቲ ዅሉ ዝኽእል ድማ ፍርዲ ኣይቐይንን። ¹³ኣብ ልዕሊ ምድሪ መን ሸሞ፥ ንብዘላ ዓለም ከዓ መን ኣብ ልዕሊኡ ኣንበረ። ¹⁴ልቡ ናብ ሰብ እንተ ኣንቢሩ፥ መንፈሱን እስትንፋሱን ድማ ናብኡ እንተ ኣከበ፥ ¹⁵ኵሉ ስጋ ሓቢሩ ምጠፍአ፥ ሰብ ድማ ናብ ሓመድ ምተመለሰ። ¹⁶ምስትውዓል እንተለኻ እዙይ ስማዕ፤ ድምፂ ቃላተይ ኣፅምዕ። ¹⁷ንፍርዲ ዝፅልእ ከመሓድርዶ ይኽእል? ነቲ ፃድቕን ሓያልን ክትኵንኖዶ ኢኻ፥ ¹⁸ንሱ ንንጉስ ‘ከንቱ ኢኻ’፥ ነቶም ክቡራት ድማ ‘ክፉኣት ኢኹም’ ዝብል እዩ፥ ¹⁹ንሱ ንመሳፍንቲ ገፅ ዘየዳሉ፥ ንሃብታም ካብ ድኻ ኣብሊፁ ዘይርኢ እዩ፤ ኵሎም ግብሪ ኢዱ እዮም እሞ። ²⁰ብቕፅበት ይሞቱ፤ ፍርቂ ለይቲ እቶም ህዝቢ ተናዊፆም ይጠፍኡ፥ እቶም ሓያላት ድማ ብዘይ ኢድ ሰብ ይውሰዱ። ²¹ኣዒንቱ ኣብ መንገዲ ሰብ እየን እሞ፥ ኵሉ ስጕምቱ ድማ ይሪኢ። ²²ገበርቲ እከይ ዝሕብኡሉ፥ ፀልማት ወይ ድቕድቕ ፅላሎት የለን። ²³እግዚኣብሄር ንሰብ ደጊሙ ኽምርምሮ ኣየድልን እዩ፥ ናብ ፍርዲ ናብ ቅድሚ እግዚኣብሄር ምእንቲ ኽኸይድ። ^a a v23 ነጥቢ ኤሊሁ፦ እግዚኣብሄር ፍርዲ ንምምፃእ ስሩዕ ሰሚዕ ወይ ውሱን ቆፀራ ኣየድልዮን፤ ብቐጥታ ደኣ ይገብር እምበር። ²⁴ነቶም ሓያላት ብዘይ መፅናዕቲ ይቕጠቕጦም፥ ኣብ ቦታኦም ድማ ካልኦት የቕውም። ²⁵ስለዙይ ግብሮም ፈሊጡ ብለይቲ ይግልብጦም እሞ ይደቕቑ። ²⁶ብምኽንያት ክፍኣቶም ኣብ ቅድሚ ዝሪኡ ሰባት ይወቕዖም፥ ²⁷ንእኡ ኻብ ምስዓብ ስለ ዝዘንበሉ፥ ንሓደ ኻብ መንገድታቱ ኸዓ ስለ ዘየስተብሃሉ፥ ²⁸ነቶም ድኻታት ናብኡ ኽፅርሑ ገበርዎም እሞ፥ ኣውያት እቶም ግፉዓት ድማ ሰምዐ። ²⁹ንሱ ስቕ እንተ በለ መን ክዂንን ይኽእል? ገፁ እንተ ኸወለ ድማ መን ክሪኦ ይኽእል፥ ህዝቢ ኾነ ሰብ፥ ³⁰ዓመፀኛ ሰብ ከይነግስ፥ ንህዝቢ ኸየጥምዶም ድማ። ³¹ሓደ እኳ ንእግዚኣብሄር ከምዙይ ኢሉዶ፦ ‘ቅፅዓተይ ፆይረ ኣለኹ፤ ደጊመ ኣይብድልን፤ ³²እቲ ዘይሪኦ ኣስተምህረኒ፤ ክፉእ ጌረ እንተ ኾይነ፥ ደጊመ ኣይገብሮን እየ’? ³³ንተግሳፁ ስለ ዝነዓቕካ፥ ከም ድላይካዶ ክፈድየካ እዩ? ንስኻ ኢኻ እትመርፅ እምበር ኣነ ኣይኮንኩን እሞ፥ ስለዙይ እትፈልጦ ንገር። ³⁴ምስትውዓል ዘለዎም ሰባት ክብሉኒ እዮም፤ ዝሰምዓኒ ኵሉ ለባም ሰብውን ክብል እዩ፤ ³⁵‘ኢዮብ ብዘይ ፍልጠት እዩ ዝዛረብ፤ ቃሉ ድማ ብዘይ ምስትውዓል እዩ።’ ³⁶ኢዮብ ከም ክፉኣት ሰባት ስለ ዝመለሰ፥ ክሳዕ መወዳእታ ክፍተን እንተ ዝኸውን! ³⁷ኣብ ልዕሊ ሓጢኣቱ ዓመፅ ይውስኽ እዩ እሞ፤ ብግልፂ የላግፀልና፥ ኣብ ልዕሊ እግዚኣብሄር ከዓ ቃሉ የብዝሕ።”