Elihuna Latluida Hānga
Elihuna hānga, mikumowui morei eina kaphā kasāna muiyā eina juimeikhalei Vareli khikha mangateimana; chi khangatei miwuitungli tāya. Rekakharekabingna chapa, kha ngayāli laa sākhangasaka Kasaa chi kali leikhala da khipānakha mangahānmana. Chiwui vang Jobna theikakhui maleila tui mataisang ngasaka.
35 1Chieina Elihuna hānglui: 2"Nana chi khamashunga da phaningkhala? Nana ngahāna, 'Iwui khamashung khangarong chi Varewui khaila kachung.' 3Kaja nana ngahāna, 'Chi nali khi kānāda? Ina morei masālaga khi tongzākhala?' 4Ina nali kala nawui ngasotnaobingli longnala ngahānkāra. 5Kazingram yangkālu kala yanglu; nali juimei muiyā chi yangkazaklu. 6Nana morei saakha, ali khi sākasā ngasakrakhala? Kala nawui khayonkhamāng kachungkha leiakha, nana ali khi sāra? 7Nana khangaronga jiakha, nana ali khi mira? Lah nawui pāng eina ana khi samphangra? 8Nawui makaphā makhayāna na kathā mi akhali māngna khanang ngasaka, kala nawui khamashung khangarongna mikumo akhali māngna ngachonmi. 9Khangazai kachungkhawui kharit azingli mibingna ngavaowa; kapangpanga mibingwui pāngtheili eina athumna ngachonmi khavai ngakaowa. 10Kha khipānakha, 'Iwui kasā Vare kali leikhala, ngayāli laa mia, 11okathuiwui sāyurbingli reimeida ithumli tamchitheia, kala khamasaiwui vānaobingli ithumli thangmeimei ngasaka?' 12Apam chili athumna ngavaowa, kha makaphā mibingwui langkasowui vang eina ana mangahānkāmana. 13Kachangkhata, Varena arema khavao chi mashāmimana; Sāshap-pangshapana chi machāpmimana. 14Chithākha, nana ali mayangmana da kahāng tharan ana kayākha ngahānkāmeirakhala? Nawui tuingaphun awui mangāli leilala nana ali ning nganungphalungra. 15Kha ara, awui malungkhavātna tandi mamisai khawui vang, kala ana mangkhama̱ chi teomeida theikhami. 16Jobna arema tui eina akhamor tonga; ana theikakhui maleila tui mataisang ngasaka."
