யோபு 35

35 ¹பின்னும் எலிகூ தொடர்ந்து சொன்னதாவது: ²"இது நியாயமென்று நினைக்கிறாயா? ‘தேவனுடைய நீதியைப் பார்க்கிலும் என் நீதி மிகுதியானது’ என்று நீ சொல்லுகிறாய். ³‘அதினால் உனக்கு என்ன பயன்? நான் பாவம் செய்யாதிருந்தால் எனக்கு என்ன லாபம்?’ என்று நீ கேட்கிறாய். ⁴நான் உனக்கும், உன்னோடிருக்கிற உன் நண்பர்களுக்கும் மறுஉத்தரவு சொல்லுவேன். ⁵வானங்களை அண்ணாந்து பார்; உன்னிலும் உயரமான மேகங்களை நோக்கிப் பார். ⁶நீ பாவம் செய்தால், அவருக்கு விரோதமாய் என்ன சாதிக்கிறாய்? உன் மீறுதல்கள் மிகுதியாயிருந்தால், அவருக்கு நீ என்ன செய்கிறாய்? ⁷நீ நீதிமானாயிருந்தால், அவருக்கு என்ன கொடுக்கிறாய்? அல்லது உன் கையிலிருந்து அவர் என்ன பெற்றுக்கொள்ளுகிறார்? ⁸உன் அக்கிரமம் உன்னைப்போன்ற ஒரு மனிதனையே பாதிக்கிறது, உன் நீதியோ ஒரு உடன்மனிதனையே பாதிக்கிறது. ⁹அநேக ஒடுக்குதல்களின் பாரத்தினால் மனுஷர் கூக்குரலிடுகிறார்கள்; பலவான்களின் புயத்திற்கு விரோதமாய் உதவிக்காக அபயமிடுகிறார்கள். ¹⁰ஆனாலும், ‘இரவிலே கீதங்களைத் தந்து, என்னை உண்டாக்கின தேவன் எங்கே? ¹¹பூமியின் மிருகங்களைப் பார்க்கிலும் அதிகமாய் நமக்குப் போதித்து, ஆகாயத்துப் பறவைகளைப் பார்க்கிலும் நம்மை ஞானிகளாக்குகிறவர் எங்கே?’ என்று ஒருவனும் சொல்லுகிறதில்லை. ¹²அங்கே அவர்கள் கூக்குரலிட்டும், அவர் மறுஉத்தரவு அருளுகிறதில்லை, தீயவர்களின் அகந்தையினிமித்தமே. ¹³வீணான கூக்குரலை நிச்சயமாய் தேவன் கேளார்; சர்வவல்லவர் அதைக் கவனியார். ¹⁴அப்படியிருக்க, நீ அவரைக் காணேன் என்று சொல்லும்போது அவர் எத்தனை அதிகமாய் மறுஉத்தரவு அருளாதிருப்பார்; ஆயினும் உன் வழக்கு அவருக்கு முன்பாக இருக்கிறது, நீ அவருக்குக் காத்திருக்கவேண்டும். ¹⁵இப்போதோ, அவருடைய கோபம் இன்னும் தண்டியாதபடியாலும், அவர் மதிகேட்டைச் சிறிதும் கவனியாதபடியாலும், ¹⁶யோபு வீணான பேச்சினால் தன் வாயைத் திறக்கிறான்; அறிவில்லாமல் வார்த்தைகளைப் பெருக்குகிறான்."