Jobu 35

35 ¹Nígbà náà ni Elihu tẹ̀síwájú, ó sì wí pé: ²“Ìwọ rò pé èyí tọ̀nà bí? Ìwọ wí pé, ‘Òdodo mi pọ̀ ju ti Ọlọ́run lọ.’ ³Nítorí ìwọ béèrè pé, ‘Èrè wo ni ó jẹ́ fún ọ? Kí ni mo jẹ ní èrè nípa àìdẹ́ṣẹ̀?’ ⁴Èmi yóò dá ọ lóhùn, àti àwọn ọ̀rẹ́ rẹ pẹ̀lú rẹ. ⁵Gbé ojú sókè wo àwọn ọ̀run kí o sì rí; tẹjú mọ́ àwọn àwọsánmà, tí ó ga ju ọ lọ. ⁶Bí ìwọ bá dẹ́ṣẹ̀, kí ni ìwọ ṣe sí i? Bí ìṣọ̀tẹ̀ rẹ bá sì pọ̀, kí ni ìwọ ṣe sí i? ⁷Bí ìwọ bá jẹ́ olódodo, kí ni ìwọ fi fún un? Tàbí kí ni ó rí gbà lọ́wọ́ rẹ? ⁸Ìwà búburú rẹ kàn ènìyàn bí ìwọ fúnra rẹ nìkan, òdodo rẹ sì kàn ọmọ ènìyàn ẹlẹgbẹ́ rẹ nìkan. ⁹Àwọn ènìyàn ké jáde lábẹ́ ìwúwo ìninilára púpọ̀; wọ́n ń pe fún ìrànlọ́wọ́ lòdì sí apá àwọn alágbára. ¹⁰Ṣùgbọ́n kò sí ẹni tí ó wí pé, ‘Níbo ni Ọlọ́run Ẹlẹ́dàá mi wà, ẹni tí ń fi orin fúnni ní òru, ¹¹ẹni tí ń kọ́ wa ju àwọn ẹranko ayé lọ, tí ó sì mú wa gbọ́n ju àwọn ẹyẹ ojú ọ̀run lọ?’ ¹²Níbẹ̀ ni wọ́n ké jáde, ṣùgbọ́n kò dáhùn, nítorí ìgbéraga àwọn ènìyàn búburú. ¹³Dájúdájú Ọlọ́run kì í fetí sí igbe òfo; Olódùmarè kì í fiyè sí i. ¹⁴Mélòó mélòó ni, nígbà náà, tí kì yóò dáhùn nígbà tí ìwọ wí pé ìwọ kò rí i—bí ó tilẹ̀ jẹ́ pé ẹjọ́ rẹ wà níwájú rẹ̀, ìwọ sì gbọ́dọ̀ dúró dè é. ¹⁵Nísinsìnyí, nítorí ìbínú rẹ̀ kò tíì fìyà jẹni, òun kò sì fiyè sí ìwà òmùgọ̀ púpọ̀. ¹⁶Jobu ya ẹnu rẹ̀ pẹ̀lú ọ̀rọ̀ òfo; ó sọ ọ̀rọ̀ di púpọ̀ láìní ìmọ̀.”