Elihu wazonza hika mbala yikwawu
Elihu wisi zonza ni masumu ma batu yi mamboti ma batu masi sobila Nzambi kima ku, wuna wenina ku thwala ya matuti; mawu masi bwila batu bankaka. Batu ba minyoko bisi kalunga, kaasi ka mutu ku wisi hyula kweti wenina Muhangi wawu, wuna wisi heka mikunga mu phipha. Buna Yobu wisi búndikisa mambu makonda nzayilu.
35 1Amana Elihu wákwamina kuzonza, wuzimbudi: 2«Ngeyi wisi banza ni dyadi dyenina dya masonga? Ngeyi wisi zimbula: “Masonga mama maluti ma Nzambi.” 3Mukuma ngeyi wisi hyula: “Biki dyambote dyenina kikuma kya ngeyi? Khi muluta mbongi mu konda kusumuka?” 4Yikúvutula, ngeyi ni banduku baku ha kimosi yi ngeyi. 5Tala ku zilu amana mona; simbulula matuti, mana menina ku thwala ya ngeyi. 6Yuka ni wásumuka, biki wisi hanga kwena yandi? Amana yuka ni mambu maku ma kulewula menina malawu, biki wisi kumuhanga? 7Yuka ni ngeyi wena wa masonga, biki wisi heka kwena yandi? Holo biki kisi tambula mu koku dyaku? 8Mambu maku ma mbi matadila kaka mutu wafwanana yi ngeyi, amana masonga maku matadila kaka mutu wankaka. 9Batu bisi kalunga ku tsi ya kizitu kya minyoko mya lawu; bisi lomba lusadisu kikuma kya koku dya mukwa ngolu. 10Kaasi ka mutu ku wisi zimbula: “Kwena kwenina Nzambi Muhangi wama, yanduna wisi heka mikunga mu phipha, 11yanduna wisi tulonga kuluta bambisi ba ha tsi amana wisi tukhitula ba mudimu kuluta banuni ba ku zilu?” 12Kuna bisi kalunga, kaasi kavutulaku mvutu, kikuma kya lulendu lwa batu ba mbi. 13Kyedika, Nzambi káyukaku ndinga ya phamba; Mukwa Ngolu zoosu kasi tadila dyawu. 14Buna, kalutiku kuvutula mvutu tangwa wisi zimbula ni wenina konda kumona yandi— kahanga dyambu dyaku dyenina ku thwala yandi amana wafweti kumuhingila. 15Amana buthwena, kikuma khabu zandi zisi nyokuna ko, amana kasi tadila kaka fyoti kilawu. 16Yobi wisi kangula munwa wandi mu ndinga za phamba; wisi vudisa mameni makonda nzayilu.»
