Erihu Anotaurazve
Erihu anoti chivi chomunhu nokunaka kwomunhu hazvichinji chinhu kuna Mwari, ari kumusoro kupfuura makore; zvinowira pavamwe vanhu. Vanodzvinyirirwa vanochema, asi hapana anobvunza kuti Muiti wavo aripi, anopa nziyo usiku. Saka Jobho anowanza mashoko asina zivo.
35 1Ipapo Erihu akaenderera mberi akati: 2“Unofunga kuti izvi zvakarurama here? Unoti, ‘Kururama kwangu kunopfuura kwaMwari.’ 3Nokuti unobvunza, ‘Zvinokubatsira sei? Ndinowanei nokusatadza?’ 4Ndichakupindura iwe, neshamwari dzako pamwe chete newe. 5Tarira kumatenga uone; tarisisa makore, ari kumusoro kupfuura iwe. 6Kana ukatadza, chii chaunoita kwaari? Uye kana kumukira kwako kwakawanda, unomuitei? 7Kana wakarurama, unomupei? Kana kuti chii chaanogamuchira kubva muruoko rwako? 8Kuipa kwako kunongobata munhu akaita sewe, uye kururama kwako kunongobata mumwe munhu zvake. 9Vanhu vanochema vari pasi pouremu hwokudzvinyirirwa kuzhinji; vanodana kuti vabatsirwe pamusoro poruoko rwavane simba. 10Asi hakuna munhu anoti, ‘Aripi Mwari Musiki wangu, iye anopa nziyo usiku, 11anotidzidzisa kupfuura mhuka dzenyika uye anotiita vakachenjera kupfuura shiri dzedenga?’ 12Ipapo vanochema, asi haapinduri, nokuda kwokuzvikudza kwavanhu vakaipa. 13Zvirokwazvo Mwari haateereri kuchema kusina maturo; Wamasimbaose haazvinei nako. 14Ko zvino, achatonyanya kusapindura sei paunoti haumuoni— kunyange mhaka yako iri pamberi pake uye unofanira kumumirira. 15Uye zvino, nokuti kutsamwa kwake kusati kwaranga, uye haana hake kunyanya kucherechedza upenzi. 16Jobho anoshamisa muromo wake nokutaura kusina maturo; anowanza mashoko asina ruzivo.”