Elihu Alonga Pontho
Elihu asalonga kuti kuphonya kwa anthu na kuwanga kwa anthu nkhabe kucinja cinthu kuna Mulungu, ule ali padzulu kupiringana makole; pyenepi pisagwera anthu anango. Anyakutsikinyirwa asalira, mbwenye nkhabe munthu asabvundza kuti Nyakuwalenga ali kupi, ule asapereka nyimbo usiku. Natenepa Yobe asaunjiza mafala mwakusowa cidziwiso.
35 1Na tenepo Elihu apitiriza mbalonga tenepa: 2“Usanyerezera kuti pyenepi ndi pyakulungama? Iwe usalonga kuti: ‘Kulungama kwanga kusapiringana kwa Mulungu.’ 3Thangwi usabvundza: ‘Pisakuphedza ninji? Ndisaphindula ninji thangwi yakukhonda kudawa?’ 4Ine ndinakutawira, pabodzi na axamwali ako. 5Lang'ana kudzulu mbuona; yang'ana makole, ale ali padzulu pako kakamwe. 6Ungadawa, unancita ninji Iye? Pontho kupanduka kwako kungakhala kuzinji, unancitanji Iye? 7Ungakhala wakulungama, unampasa ninji Iye? Peno iye asatambira ninji m'manja mwako? 8Kuipa kwako kusakhuya basi munthu ninga iwe, na kulungama kwako kusakhuya basi mwanaswa wako munthu. 9Anthu asalira thangwi ya kuthangetwa kuzinji; asaphemba ciphedzo ku nkono wa anyamphambvu. 10Mbwenye nkhabe munthu analonga kuti: ‘Ali kupi Mulungu Nyakundicita, ule asapereka nyimbo namasiku, 11ule asatipfundzisa kupiringana pinyama pya pantsi, mbaticita andzeru kupiringana mbalame za m'mwamba?’ 12Penepo asalira, mbwenye iye nkhabe kutawira, thangwi ya kudzikuza kwa anthu akuipa. 13Mwandimomwene Mulungu nkhabe kubvesera kulira kwa papezi; Wamphambvu Zonsene nkhabe kupicitira citsalakano. 14Pontho, mwakukhonda penula, iye anakutawira tani ungalonga kuti nkhabe kuona Iye—maseze mulandu wako uli patsogolo pace, iwe usafunika kumudikhira Iye. 15Cincino, thangwi ukali wace nasati kutcunyusa, pontho iye nkhabe kudzindikira kakamwe upswiru. 16Yobe asafungula mulomo wace na malongero a papezi; asathimiza mafala akusowa ndzeru.”
