ኢዮብ 35

35 ¹ኤሊሁም እንዲህ ሲል ቀጠለ፤ ²“ይህ ትክክል ነው ብለህ ታስባለህን? ‘ጽድቄ ከእግዚአብሔር ይበልጣል’ ትላለህ። ³‘ይህ ለአንተ ምን ይጠቅማል? ኀጢአት ባለመሥራቴስ ምን አተርፋለሁ?’ ብለህ ትጠይቃለህና። ⁴እኔም አንተንና ከአንተ ጋራ ያሉትን ወዳጆችህን እመልስላችኋለሁ። ⁵ወደ ሰማያት ቀና ብለህ ተመልከት፤ ከአንተ ከፍ ያሉትን ደመናት ተመልከት። ⁶ኀጢአት ብትሠራ፣ በእርሱ ላይ ምን ታደርጋለህ? ዐመፃዎችህስ ቢበዙ፣ በእርሱ ላይ ምን ታደርግበታለህ? ⁷ጻድቅ ብትሆን፣ ምን ትሰጠዋለህ? ወይስ ከእጅህ ምን ይቀበላል? ⁸ክፋትህ እንደ አንተ ያለውን ሰው ብቻ ይነካል፤ ጽድቅህም ባልንጀራህን ሰው ብቻ ይጠቅማል። ⁹ሰዎች ከብዙ ግፍ ጫና የተነሣ ይጮኻሉ፤ ከኀያላኑ ክንድ ለማምለጥ እርዳታ ይለምናሉ። ¹⁰ነገር ግን ማንም እንዲህ አይልም፤ ‘ፈጣሪዬ የሆነው አምላክ ወዴት ነው? በሌሊት መዝሙርን የሚሰጠው፣ ¹¹ከምድር አራዊት ይልቅ የሚያስተምረን፣ ከሰማይ ወፎችም ይልቅ ጥበበኞች የሚያደርገን ወዴት ነው?’ ¹²በዚያ ይጮኻሉ፣ እርሱ ግን መልስ አይሰጥም፤ ይህም ከክፉ ሰዎች ትዕቢት የተነሣ ነው። ¹³በእውነት እግዚአብሔር ከንቱ ጩኸትን አይሰማም፤ ሁሉን ቻዩም ትኵረት አይሰጠውም። ¹⁴እንግዲህ፣ ‘አላየውም’ ብለህ ስትናገር፣ እንዴት አብልጦ ይመልስልሃል? ጒዳይህ ግን በፊቱ ነው፤ እርሱንም መጠበቅ አለብህ። ¹⁵አሁንም ቍጣው ገና ስላልቀጣ፣ ስንፍናንም ብዙም ትኵረት ስላልሰጠ ነው። ¹⁶ኢዮብ አፉን በከንቱ ንግግር ይከፍታል፤ ያለ ዕውቀት ቃላትን ያበዛል።”