Job 35 FHB Father's Heart Bible™

35 ¹Mgbe ahụ Elaịhu gara nʼihu kwuo, sị: ²“Ị chere na nke a ziri ezi? Ị na-asị, ‘Ezi omume m karịrị nke Chineke.’ ³Nʼihi na ị na-ajụ, ‘Uru gịnị ka ọ bara gị? Gịnị ka m na-erite site nʼomeghị mmehie?’ ⁴Aga m aza gị, gị na ndị enyi gị so gị. ⁵Lelie anya gị nʼeluigwe ma hụ; legide igwe ojii anya, nke dị elu karịa gị. ⁶Ọ bụrụ na i mehie, gịnị ka ị na-arụ megide ya? Ọ bụrụ na nnupụisi gị dị ọtụtụ, gịnị ka ị na-eme ya? ⁷Ọ bụrụ na ị bụ onye ezi omume, gịnị ka ị na-enye ya? Maọbụ gịnị ka ọ na-anata site nʼaka gị? ⁸Ajọ omume gị na-emetụ naanị mmadụ dịka gị, ezi omume gị na-emetụkwa naanị mmadụ ibe gị. ⁹Ndị mmadụ na-eti mkpu nʼokpuru ịrọ nke ọtụtụ mmegbu; ha na-akpọ maka enyemaka megide aka ndị dị ike. ¹⁰Ma ọ dịghị onye na-asị, ‘Olee ebe Chineke, Onye kere m, nọ, onye na-enye abụ nʼabalị, ¹¹onye na-akụziri anyị ihe karịa anụ ọhịa nke ụwa ma na-eme ka anyị maa ihe karịa nnụnụ nke eluigwe?’ ¹²Nʼebe ahụ ka ha na-eti mkpu, ma ọ naghị aza ha, nʼihi nganga nke ndị ajọ mmadụ. ¹³Nʼezie Chineke anaghị ege ntị nʼakwa efu; Onye pụrụ ime ihe niile adịghị elebara ya anya. ¹⁴Ọ ga-esikwa aṅaa zaa gị, mgbe ị na-asị na ị naghị ahụ ya—ọ bụ ezie na okwu gị dị nʼihu ya, ị ghaghịkwa ichere ya. ¹⁵Ma ugbu a, nʼihi na iwe ya atabeghị mmadụ ahụhụ, ọ legharaghịkwa nzuzu anya nke ukwuu. ¹⁶Job na-asaghe ọnụ ya nʼokwu efu; ọ na-eme ka okwu na-abawanye nʼenweghị ihe ọmụma.”