Okwu A Ga-ekwu Nʼọnọdụ Chineke

Elaịhu na-ekwu nʼaha Chineke: ahụhụ bụ ozizi, ntị a na-emeghe, e nwere ike ịdọbata Job nʼebe sara mbara. Mgbe ahụ olu ya gbanwere ghọọ ihe ịtụnanya: mmiri ozuzo e si nʼalụlụ mee, égbè eluigwe, àmụ̀mà a na-eduzi nʼebe ọ na-aga. Chineke dị ukwuu, anyị amaghịkwa ya.

Isi 36.

Elaịhu gakwara nʼihu kwuo, sị: “Nwee ndidi nʼebe m nọ ntakịrị, m ga-egosi gị, nʼihi na okwu ka dị a ga-ekwu nʼọnọdụ Chineke. M ga-esite nʼebe dị anya bute ihe ọmụma m, nye Onye kere m ezi omume. Nʼihi na nʼezie, okwu m abụghị ụgha; onye zuru oke nʼihe ọmụma nọnyere gị. Lee, Chineke dị ike, ma ọ naghị eleda mmadụ anya; o siri ike nʼike nghọta. Ọ naghị edebe ndị ajọ omume ndụ, kama ọ na-enye ndị a na-akpagbu ikpe ziri ezi. Ọ naghị ewepụ anya ya nʼebe ndị ezi omume nọ; ọ na-eme ka ha na ndị eze nọkọọ nʼocheeze ha ruo mgbe ebighị ebi, a na-ebulikwa ha elu. Ọ bụrụ na e jiri ụdọ igwe kee ha, jidesie ha ike nʼeriri nsogbu, mgbe ahụ ọ na-agwa ha banyere omume ha na nnupụisi ha, na ha emeela nganga. Ọ na-emeghe ntị ha ịnụ ndụmọdụ, na-enyekwa iwu ka ha chigharịa site na mmehie. Ọ bụrụ na ha ege ntị ma jeere ya ozi, ha ga-eji ọganihu bichaa ụbọchị ha, afọ ha niile ga-agafekwa nʼọṅụ. Ma ọ bụrụ na ha egeghị ntị, ha ga-ala nʼiyi site na mma agha, ha ga-anwụkwa nʼenweghị ihe ọmụma. Ndị obi ha na-amaghị Chineke na-ebu iwe nʼobi; ha anaghị eti mkpu maka enyemaka mgbe ọ na-eke ha agbụ. Mkpụrụobi ha na-anwụ nʼoge okorobịa, ndụ ha na-akwụsịkwa nʼetiti ndị akwụna nke ụlọ arụsị. Ọ na-azọpụta ndị a na-akpagbu site na nsogbu ha, na-emeghekwa ntị ha site na mkpagbu. Ọ gaara esikwa nʼọnụ nsogbu dọpụta gị baa nʼebe sara mbara, nke mepere emepe, nke na-enweghị mkpagide, tebụl gị gaara ejupụtakwa nʼihe oriri dị ụtọ. Ma ikpe ruru ndị ajọ omume na-erichapụ gị; ikpe na ikpe ziri ezi ejidela gị. Lezie anya ka iwe ghara ịrafu gị nʼịkwa emo, ekwekwala ka nnukwu ego mgbapụta duhie gị. Mkpu enyemaka gị ọ ga-eme ka ị ghara ịnọ na nsogbu, ka ọ bụ ike gị niile? Achọsila abalị ike, mgbe a na-ebipụ ndị mmadụ site nʼọnọdụ ha. Kpachara anya; atụgharịkwala gaa na mmehie, nʼihi na ị họrọla nke a karịa nsogbu. Lee, a na-ebuli Chineke elu nʼike ya; onye bụ onye nkuzi dịka ya?

“Onye họpụtaara ya ụzọ ya, ka ọ bụ onye pụrụ ịsị, ‘I meela ihe ọjọọ’? Cheta ito ọrụ ya, nke ndị mmadụ jiworo abụ too. Mmadụ niile elegoola ya anya; ụmụ mmadụ na-ahụ ya site nʼebe dị anya. Lee, Chineke dị ukwuu, anyị amaghịkwa ya; ọnụọgụ afọ ya karịrị nchọpụta. Nʼihi na ọ na-adọrọ mmiri na-atụ atụ nʼelu; ha na-esi nʼalụlụ ya na-ezodata dịka mmiri ozuzo, nke igwe ojii na-awụdata, na-atụdakwa nʼọtụtụ nʼahụ ụmụ mmadụ. Ọ dị onye pụrụ ịghọta ka e si agbasa igwe ojii, na egbe eluigwe nke ụlọ ikwu ya? Lee, ọ na-agbasa amụma ya gburugburu ya, na-ekpuchikwa ebe miri emi nke oke osimiri. Nʼihi na ọ na-eji ihe ndị a achị ndị mmadụ; ọ na-enye nri nʼụba. Ọ na-eji amụma mejupụta aka ya, na-enyekwa ya iwu ka ọ kụọ ebe ọ na-achọ. Ụda ya na-ekwu banyere ya; ọ bụladị anụ ụlọ na-aghọta na oke ifufe na-abịa.”