تارینین طرفئندن دئیئله‌جک سؤزلر
اِلئهو تاری طرفئندن دانیشیر: موصئبت تربئیه‌دئر، بئر قولاغین آچیلماسی‌دیر، و اَیّوب گِنئش بئر یره چکئله بئله‌ردی. سونرا اونون سَسی حِیرته دؤنور: دومان‌دان سوزولَن یاغیش، گؤی گورولتوسو، هدفئنه نئشان آلینمیش شئمشک. تاری بؤیوکدور، و بئز اونو تانیمیریق.
36 1اِلئهو سؤزونه داوام ورئب ددی: 2«بئر آز منه صبر ائله، سنه گؤرسده‌جه‌یم، چونکی حله تاری طرفئندن دئیئله‌جک سؤزلر وار. 3علمئمی اوزاقدان گتئره‌جیم و یارادانیما عدالت نئسبت وره‌جیم. 4چونکی حقئقتن سؤزلرئم یالان دیئل؛ علمده کامئل اولان بئری سنئنله‌دئر. 5باخ، تاری قادئردئر، آمّا هچ کسی حقئر گؤرمَز؛ او، آنلاییشین قووّتئنده قادئردئر. 6شرئرلری دئری ساخلاماز، آمّا مظلوملارا عدالت ورر. 7صالحلرئن اوستوندن گؤزلرئنی هچ آییرماز؛ اونلاری پادشاهلارلا تختلرده ابدی اوتوردار و اونلار اوجالارلار. 8اگر زنجئرلره دوشسه‌لر، موصئبت ائپلرئنه گئرئفتار اولسالار، 9او واخت اونلارا ائشلرئنی و عوصیانلارینی بیان ادر کی، تکبّورله رفتار ادئبلر. 10اونلارین قولاغینی تربئیه‌یه آچار و امر ادر کی، گوناهدان دؤنسونلر. 11اگر قولاق آسیب اونا خئدمت اتسه‌لر، گونلرئنی رئفاه ائچئنده باشا وورارلار و ائللری خوشلوقلا کچر. 12آمّا قولاق آسمازلارسا، قیلینجلا هلاک اولارلار و بئلئکسئز اؤلرلر. 13اوره‌یی تاریسیز اولانلار قضب ساخلاییرلار؛ اونلاری باغلادیغی زامان کؤمک اوچون فریاد اتمَزلر. 14جانلاری جاوانلیقدا اؤلر و حیاتلاری معبد فاحئشه‌لری آراسیندا قورتارار. 15مظلومو موصئبتی واسئطه‌سی ائله خئلاص ادر و سیخینتی ائله قولاغینی آچار. 16سنی ده سیخینتینین چَنه‌سئندن چکئب چیخاراردی، گئنئش و آچیق بئر یره، مَحدودیّتسئز، و سوفره‌ن نعمتله دولو اولاردی. 17آمّا شر آداما لایئق اولان حؤکمه دوشوبسن؛ حؤکم و عدالت سنی توتوب. 18اؤزونو گؤزله، قضب سنی ائستهزایا توولامایا، و بؤیوک کفّاره سنی یولدان آزدیرماسین. 19فریادین سنی سیخینتیدان قورویا بئلر، یا دا گوجونون بوتون قووّه‌لری؟ 20گجه اوچون حسرت چکمه، او گجه کی، خالقلار اؤز یرلرئندن کسئلرلر. 21دئقّتلی اول، گوناها دؤنمه، چونکی موصئبت یرئنه بونو سچئبسن. 22باخ، تاری قووّتئنده اوجادیر؛ اونون کئمی اوستاد کئمدئر؟
23«کئم اونون یولونو اونا تعیئن ادئب، یا دا کئم دیه بئلر: ”سن ناحاق اتدئن“؟ 24اونون ائشئنی اوجالتماغی یاددا ساخلا، کی، خالق اونو نغمه‌لرده اوخویوب. 25بوتون ائنسانلار اونا باخیب؛ بشر اونو اوزاقدان گؤرور. 26باخ، تاری بؤیوکدور و اونو تانیمیریق؛ ائللرئنئن سایی آختاریلماز. 27چونکی سو دامجیلارینی یوخاری چکر؛ اونلار اونون دومانیندان یاغیش کئمی سوزولرلر، 28بولودلار اونو تؤکور و ائنسانلارین اوستونه بول-بول دامیزدیرار. 29بولودلارین یاییلماسینی، اونون چادیرینین گؤی گورولتوسونو کئم درک اِده بئلر؟ 30باخ، شئمشه‌یئنی اؤز اطرافینا سَپر، و دهنزئن درئنلئکلرئنی اؤرتر. 31چونکی بونلارلا خالقلاری ائداره ادر؛ بول-بول یمک ورر. 32اؤز اَللرئنی شئمشک ائله دولدورور و اونا امر ادئر کی، هَدفه وورسون. 33اونون گورولتوسو اوندان خبر ورئر؛ حتّا مال-حیوان دا گلن طوفانی حئسّ ادئر.»
