ਅੱਯੂਬ 36

36 ¹ਅਤੇ ਅਲੀਹੂ ਨੇ ਅੱਗੇ ਬੋਲਦਿਆਂ ਆਖਿਆ: ²“ਮੇਰੇ ਨਾਲ ਥੋੜ੍ਹਾ ਧੀਰਜ ਰੱਖ, ਅਤੇ ਮੈਂ ਤੈਨੂੰ ਵਿਖਾਵਾਂਗਾ, ਕਿਉਂ ਜੋ ਪਰਮੇਸ਼ੁਰ ਦੀ ਵੱਲੋਂ ਬੋਲਣ ਲਈ ਹੁਣ ਵੀ ਬਚਨ ਹਨ। ³ਮੈਂ ਆਪਣਾ ਗਿਆਨ ਦੂਰੋਂ ਲੈ ਆਵਾਂਗਾ, ਅਤੇ ਆਪਣੇ ਸਿਰਜਣਹਾਰ ਨੂੰ ਧਾਰਮਿਕਤਾ ਦਾ ਸਿਹਰਾ ਦਿਆਂਗਾ। ⁴ਕਿਉਂ ਜੋ ਸੱਚ-ਮੁੱਚ ਮੇਰੇ ਬਚਨ ਝੂਠੇ ਨਹੀਂ ਹਨ; ਗਿਆਨ ਵਿੱਚ ਸੰਪੂਰਨ ਇੱਕ ਜਣਾ ਤੇਰੇ ਕੋਲ ਹੈ। ⁵ਵੇਖ, ਪਰਮੇਸ਼ੁਰ ਸਮਰੱਥ ਹੈ, ਤਾਂ ਵੀ ਉਹ ਕਿਸੇ ਨੂੰ ਤੁੱਛ ਨਹੀਂ ਜਾਣਦਾ; ਉਹ ਸਮਝ ਦੇ ਬਲ ਵਿੱਚ ਸਮਰੱਥ ਹੈ। ⁶ਉਹ ਦੁਸ਼ਟ ਨੂੰ ਜੀਉਂਦਾ ਨਹੀਂ ਰੱਖਦਾ, ਪਰ ਦੁਖੀਆਂ ਨੂੰ ਨਿਆਂ ਦਿੰਦਾ ਹੈ। ⁷ਉਹ ਧਰਮੀਆਂ ਤੋਂ ਆਪਣੀਆਂ ਅੱਖਾਂ ਕਦੇ ਨਹੀਂ ਹਟਾਉਂਦਾ; ਉਹ ਉਹਨਾਂ ਨੂੰ ਰਾਜਿਆਂ ਦੇ ਨਾਲ ਸਦਾ ਲਈ ਉਹਨਾਂ ਦੀਆਂ ਗੱਦੀਆਂ ਉੱਤੇ ਬਿਠਾਉਂਦਾ ਹੈ, ਅਤੇ ਉਹ ਉੱਚੇ ਕੀਤੇ ਜਾਂਦੇ ਹਨ। ⁸ਅਤੇ ਜੇ ਉਹ ਸੰਗਲਾਂ ਨਾਲ ਬੰਨ੍ਹੇ ਜਾਣ, ਦੁੱਖ ਦੀਆਂ ਰੱਸੀਆਂ ਵਿੱਚ ਜਕੜੇ ਜਾਣ, ⁹ਤਾਂ ਉਹ ਉਹਨਾਂ ਨੂੰ ਉਹਨਾਂ ਦੇ ਕੰਮ ਅਤੇ ਉਹਨਾਂ ਦੇ ਵਿਦਰੋਹ ਦੱਸਦਾ ਹੈ, ਕਿ ਉਹਨਾਂ ਨੇ ਹੰਕਾਰ ਨਾਲ ਵਰਤਾਓ ਕੀਤਾ ਹੈ। ¹⁰ਉਹ ਉਹਨਾਂ ਦੇ ਕੰਨ ਸਿੱਖਿਆ ਲਈ ਖੋਲ੍ਹਦਾ ਹੈ, ਅਤੇ ਹੁਕਮ ਦਿੰਦਾ ਹੈ ਕਿ ਉਹ ਪਾਪ ਤੋਂ ਮੁੜ ਆਉਣ। ¹¹ਜੇ ਉਹ ਸੁਣਨ ਅਤੇ ਉਸ ਦੀ ਸੇਵਾ ਕਰਨ, ਤਾਂ ਉਹ ਆਪਣੇ ਦਿਨ ਖੁਸ਼ਹਾਲੀ ਵਿੱਚ ਪੂਰੇ ਕਰਦੇ ਹਨ, ਅਤੇ ਉਹਨਾਂ ਦੇ ਵਰ੍ਹੇ ਸੁਖ ਨਾਲ ਬੀਤਦੇ ਹਨ। ¹²ਪਰ ਜੇ ਉਹ ਨਾ ਸੁਣਨ, ਤਾਂ ਉਹ ਤਲਵਾਰ ਨਾਲ ਨਾਸ ਹੁੰਦੇ ਹਨ, ਅਤੇ ਗਿਆਨ ਤੋਂ ਬਿਨਾਂ ਮਰ ਜਾਂਦੇ ਹਨ। ¹³ਜਿਨ੍ਹਾਂ ਦੇ ਦਿਲ ਪਰਮੇਸ਼ੁਰ ਤੋਂ ਬੇਮੁਖ ਹਨ, ਉਹ ਕ੍ਰੋਧ ਪਾਲਦੇ ਹਨ; ਜਦੋਂ ਉਹ ਉਹਨਾਂ ਨੂੰ ਬੰਨ੍ਹਦਾ ਹੈ ਤਾਂ ਉਹ ਸਹਾਇਤਾ ਲਈ ਦੁਹਾਈ ਨਹੀਂ ਦਿੰਦੇ। ¹⁴ਉਹਨਾਂ ਦੀ ਜਾਨ ਜੁਆਨੀ ਵਿੱਚ ਹੀ ਮਰ ਜਾਂਦੀ ਹੈ, ਅਤੇ ਉਹਨਾਂ ਦਾ ਜੀਵਨ ਦੇਵ-ਦਾਸੀਆਂ ਦੇ ਵਿਚਕਾਰ ਮੁੱਕ ਜਾਂਦਾ ਹੈ। ¹⁵ਉਹ ਦੁਖੀਆਂ ਨੂੰ ਉਹਨਾਂ ਦੇ ਦੁੱਖ ਦੇ ਰਾਹੀਂ ਛੁਡਾਉਂਦਾ ਹੈ, ਅਤੇ ਬਿਪਤਾ ਦੇ ਰਾਹੀਂ ਉਹਨਾਂ ਦੇ ਕੰਨ ਖੋਲ੍ਹਦਾ ਹੈ। ¹⁶ਉਹ ਤੈਨੂੰ ਵੀ ਬਿਪਤਾ ਦੇ ਜਬਾੜਿਆਂ ਵਿੱਚੋਂ ਕੱਢ ਕੇ ਇੱਕ ਖੁੱਲ੍ਹੀ, ਵਿਸ਼ਾਲ ਥਾਂ ਵੱਲ ਲੈ ਆਉਂਦਾ, ਜਿੱਥੇ ਕੋਈ ਦਬਾਓ ਨਾ ਹੁੰਦਾ, ਅਤੇ ਤੇਰਾ ਦਸਤਰਖ਼ਾਨ ਚਿਕਨਾਈ ਨਾਲ ਭਰਿਆ ਹੁੰਦਾ। ¹⁷ਪਰ ਤੂੰ ਦੁਸ਼ਟਾਂ ਦੇ ਲਾਇਕ ਨਿਆਂ ਨਾਲ ਭਰਿਆ ਹੋਇਆ ਹੈਂ; ਨਿਆਂ ਅਤੇ ਇਨਸਾਫ਼ ਨੇ ਤੈਨੂੰ ਫੜ ਲਿਆ ਹੈ। ¹⁸ਖ਼ਬਰਦਾਰ, ਕਿ ਕ੍ਰੋਧ ਤੈਨੂੰ ਠੱਠਾ ਕਰਨ ਵੱਲ ਨਾ ਲੁਭਾਵੇ, ਅਤੇ ਵੱਡੀ ਰਿਹਾਈ-ਰਕਮ ਤੈਨੂੰ ਕੁਰਾਹੇ ਨਾ ਪਾ ਦੇਵੇ। ¹⁹ਕੀ ਤੇਰੀ ਸਹਾਇਤਾ ਲਈ ਦੁਹਾਈ ਤੈਨੂੰ ਬਿਪਤਾ ਤੋਂ ਬਚਾ ਸਕਦੀ ਹੈ, ਜਾਂ ਤੇਰੀ ਸਾਰੀ ਸ਼ਕਤੀ ਦੇ ਬਲ? ²⁰ਉਸ ਰਾਤ ਦੀ ਚਾਹ ਨਾ ਕਰ, ਜਦੋਂ ਲੋਕ ਆਪਣੇ ਥਾਂ ਤੋਂ ਵੱਢੇ ਜਾਂਦੇ ਹਨ। ²¹ਸਾਵਧਾਨ ਰਹਿ; ਪਾਪ ਵੱਲ ਨਾ ਮੁੜ, ਕਿਉਂ ਜੋ ਤੂੰ ਦੁੱਖ ਦੀ ਥਾਂ ਇਸੇ ਨੂੰ ਚੁਣਿਆ ਹੈ। ²²ਵੇਖ, ਪਰਮੇਸ਼ੁਰ ਆਪਣੀ ਸਮਰੱਥਾ ਵਿੱਚ ਉੱਚਾ ਹੈ; ਉਸ ਵਰਗਾ ਗੁਰੂ ਕੌਣ ਹੈ?

²³“ਉਸ ਦਾ ਰਾਹ ਉਸ ਲਈ ਕਿਸ ਨੇ ਠਹਿਰਾਇਆ ਹੈ, ਜਾਂ ਕੌਣ ਆਖ ਸਕਦਾ ਹੈ, ‘ਤੂੰ ਗ਼ਲਤ ਕੀਤਾ ਹੈ’? ²⁴ਯਾਦ ਰੱਖ ਕਿ ਤੂੰ ਉਸ ਦੇ ਕੰਮ ਦੀ ਵਡਿਆਈ ਕਰੇਂ, ਜਿਸ ਨੂੰ ਲੋਕਾਂ ਨੇ ਗੀਤ ਵਿੱਚ ਗਾਇਆ ਹੈ। ²⁵ਸਾਰੇ ਮਨੁੱਖਾਂ ਨੇ ਉਸ ਉੱਤੇ ਨਜ਼ਰ ਮਾਰੀ ਹੈ; ਮਨੁੱਖ-ਜਾਤੀ ਉਸ ਨੂੰ ਦੂਰੋਂ ਵੇਖਦੀ ਹੈ। ²⁶ਵੇਖ, ਪਰਮੇਸ਼ੁਰ ਮਹਾਨ ਹੈ, ਅਤੇ ਅਸੀਂ ਉਸ ਨੂੰ ਨਹੀਂ ਜਾਣਦੇ; ਉਸ ਦੇ ਵਰ੍ਹਿਆਂ ਦੀ ਗਿਣਤੀ ਖੋਜ ਤੋਂ ਪਰੇ ਹੈ। ²⁷ਕਿਉਂ ਜੋ ਉਹ ਪਾਣੀ ਦੀਆਂ ਬੂੰਦਾਂ ਉਤਾਂਹ ਖਿੱਚਦਾ ਹੈ; ਉਹ ਉਸ ਦੀ ਧੁੰਦ ਤੋਂ ਮੀਂਹ ਬਣ ਕੇ ਵਰ੍ਹਦੀਆਂ ਹਨ, ²⁸ਜਿਸ ਨੂੰ ਬੱਦਲ ਵਰ੍ਹਾਉਂਦੇ ਹਨ ਅਤੇ ਮਨੁੱਖਾਂ ਉੱਤੇ ਬਹੁਤਾਇਤ ਨਾਲ ਟਪਕਾਉਂਦੇ ਹਨ। ²⁹ਕੀ ਕੋਈ ਬੱਦਲਾਂ ਦੇ ਫੈਲਣ ਨੂੰ, ਅਤੇ ਉਸ ਦੇ ਮੰਡਪ ਦੀ ਗਰਜ ਨੂੰ ਸਮਝ ਸਕਦਾ ਹੈ? ³⁰ਵੇਖ, ਉਹ ਆਪਣੀ ਬਿਜਲੀ ਆਪਣੇ ਆਲੇ-ਦੁਆਲੇ ਖਿਲਾਰਦਾ ਹੈ, ਅਤੇ ਸਮੁੰਦਰ ਦੀਆਂ ਗਹਿਰਾਈਆਂ ਨੂੰ ਢੱਕਦਾ ਹੈ। ³¹ਕਿਉਂ ਜੋ ਇਹਨਾਂ ਨਾਲ ਉਹ ਲੋਕਾਂ ਦਾ ਪ੍ਰਬੰਧ ਕਰਦਾ ਹੈ; ਉਹ ਭੋਜਨ ਬਹੁਤਾਇਤ ਨਾਲ ਦਿੰਦਾ ਹੈ। ³²ਉਹ ਆਪਣੇ ਹੱਥ ਬਿਜਲੀ ਨਾਲ ਭਰਦਾ ਹੈ, ਅਤੇ ਉਸ ਨੂੰ ਹੁਕਮ ਦਿੰਦਾ ਹੈ ਕਿ ਨਿਸ਼ਾਨੇ ਉੱਤੇ ਵੱਜੇ। ³³ਉਸ ਦੀ ਗਰਜ ਉਸ ਬਾਰੇ ਦੱਸਦੀ ਹੈ; ਡੰਗਰ ਵੀ ਆਉਂਦੀ ਹੋਈ ਹਨੇਰੀ ਨੂੰ ਭਾਂਪ ਲੈਂਦੇ ਹਨ।”