ईयोब 36

36 ¹ अलीहू पुढे बोलत राहिला व म्हणाला: ² "थोडा धीर धरा, म्हणजे मी तुम्हांला दाखवीन, कारण देवाच्या वतीने बोलण्यास अजून शब्द आहेत. ³ मी माझे ज्ञान दुरून आणीन, आणि माझ्या निर्माणकर्त्याला नीतिमत्ता देईन. ⁴ खरोखर माझे शब्द खोटे नाहीत; ज्ञानाने परिपूर्ण असलेला एक जण तुझ्याजवळ आहे. ⁵ पाहा, देव सामर्थ्यशाली आहे, तरी तो कोणाला तुच्छ लेखीत नाही; तो समजबुद्धीच्या सामर्थ्यात बलवान आहे. ⁶ तो दुष्टांना जिवंत ठेवीत नाही, पण पीडितांना न्याय देतो. ⁷ तो नीतिमानांवरून आपली दृष्टी कधी काढीत नाही; तो त्यांना राजांबरोबर त्यांच्या सिंहासनांवर सर्वकाळ बसवतो, आणि ते उंचावले जातात. ⁸ आणि जर ते साखळ्यांनी बांधले गेले, दुःखाच्या दोरखंडांत घट्ट अडकले, ⁹ तेव्हा तो त्यांना त्यांची कृत्ये आणि त्यांचे अपराध प्रकट करतो, की त्यांनी गर्वाने वर्तन केले आहे. ¹⁰ तो त्यांचे कान शिक्षणासाठी उघडतो, आणि आज्ञा देतो की त्यांनी अन्यायापासून मागे फिरावे. ¹¹ जर ते ऐकतात आणि त्याची सेवा करतात, तर ते आपले दिवस भरभराटीत पूर्ण करतात, आणि त्यांची वर्षे सुखाने जातात. ¹² पण जर ते ऐकत नाहीत, तर ते तलवारीने नाश पावतात, आणि ज्ञानाशिवाय मरतात. ¹³ मनात देवहीन असलेले राग बाळगतात; तो त्यांना बांधतो तेव्हा ते मदतीसाठी आरोळी मारीत नाहीत. ¹⁴ त्यांचा जीव तारुण्यात मरतो, आणि त्यांचे जीवन देवळातील वेश्यांमध्ये संपते. ¹⁵ तो पीडितांना त्यांच्या दुःखाद्वारे सोडवतो, आणि संकटाद्वारे त्यांचे कान उघडतो. ¹⁶ त्याने तुलाही संकटाच्या जबड्यातून बाहेर काढले असते एका विस्तृत, मोकळ्या जागी कोणत्याही बंधनाशिवाय, आणि तुझी मेज समृद्धीने भरलेली असती. ¹⁷ पण दुष्टांस योग्य असलेल्या न्यायदंडाने तू ग्रासला आहेस; न्याय व न्यायदंड यांनी तुला धरले आहे. ¹⁸ सांभाळ, क्रोध तुला थट्टेकडे भुलवू नये, आणि मोठ्या खंडणीने तुला बहकवू देऊ नकोस. ¹⁹ तुझी मदतीसाठीची आरोळी तुला संकटापासून राखू शकेल का, किंवा तुझ्या सामर्थ्याच्या सर्व शक्ती? ²⁰ रात्रीची आतुरतेने वाट पाहू नकोस, जेव्हा लोक आपल्या स्थानावरून काढून टाकले जातात. ²¹ जपून राहा; अन्यायाकडे वळू नकोस, कारण दुःखापेक्षा तू हेच निवडले आहेस. ²² पाहा, देव आपल्या सामर्थ्यात उंचावलेला आहे; त्याच्यासारखा शिक्षक कोण आहे?

²³ त्याच्यासाठी त्याचा मार्ग कोणी नेमून दिला आहे, किंवा कोण म्हणू शकेल, ‘तू चूक केली आहेस’? ²⁴ त्याच्या कार्याची स्तुती करण्याचे लक्षात ठेव, ज्याचे लोकांनी गीतांत गुणगान केले आहे. ²⁵ सर्व मानवजातीने ते पाहिले आहे; माणसे ते दुरून पाहतात. ²⁶ पाहा, देव महान आहे, आणि आपल्याला त्याचे ज्ञान नाही; त्याच्या वर्षांची गणना शोधण्यापलीकडे आहे. ²⁷ कारण तो पाण्याचे थेंब वर ओढून घेतो; ते त्याच्या धुक्यातून पावसासारखे गळतात, ²⁸ जे ढग ओततात आणि मानवजातीवर विपुलतेने वर्षतात. ²⁹ ढगांचे पसरणे, त्याच्या मंडपाचा गडगडाट, हे कोणाला समजू शकेल का? ³⁰ पाहा, तो आपली वीज आपल्याभोवती पसरवतो, आणि समुद्राच्या खोल भागांना झाकतो. ³¹ कारण याद्वारे तो लोकांवर राज्य करतो; तो विपुल अन्न देतो. ³² तो आपले हात विजेने भरतो, आणि तिला लक्ष्यावर आघात करण्याची आज्ञा देतो. ³³ त्याचा गडगडाट त्याच्याविषयी सांगतो; गुरेढोरेदेखील येणाऱ्या वादळाची जाणीव करतात.