Varewui vang hāngkhavai tuibing
Elihuna Vare vang kahang: kashikhami hi kachuikhavai ni, khana kahongkhavai ni, kala Jobli kaphāk kasang kaphungli kakhuirāthei ngāsāthang. Chiwui thili awui tui khangachāngla ngachāithei: marāi eina ngaloa̱ kasāda, khangashong, khangtha awui kaphungli pheshi. Vare kachungkhanga, kala ithumna ali theimalak.
36 1Kala Elihuna hānglui: 2"Ili kasha̱kha khāngda sāmilu, chieina ina nathumli theingasakra, kaja Varewui vang hāngkhavai tui aruila leichinga. 3Ina iwui theikakhui katāva̱wui eina khuirāra, kala iwui Kasaali khamashung khangarong mira. 4Kaja kachangkhat eina iwui tui mikhanam maningmana; theikakhui kākashunga chi nathumli ngasoda lei. 5Yanglu, Vare pangshapana, chithālala ana maningkachaimara; ana theishingkakhui yāngla pangshapana. 6Ana makhayābingli kharing eina maleisāmana, kha kachotabingli mashun mira. 7Ana khamashungabing eina amik makhuithuimana; ana awungabingli ngasoda athumli wungpamkhongli katang makhavai pam ngasakmi, kala athum khāngkāmihaira. 8Kala athum khalap khalaphaiakha, kachotkachāngwui khara̱li sangkahaiakha, 9chieina athumna yuihenda sāhaira kaji, athumwui otsakbing kala athumwui khayonkhamāng chi ana athumli hāngmi. 10Ana athumwui khanā hāngkachitheili tonga, kala athumli moreiwui eina ngareithui khavai kagaso mi. 11Athumna nganāda ali otram ngatha̱akha, athumwui mirin shāngshun eina kupra, kala azingkum ningngasa̱ta eina kānhaira. 12Kha athumna manganaakha, athum raighai eina thira, kala theikakhui maleila thihaora. 13Wuklungli Vare makathei mibingna malungkhavāt singtit; Varena athumli khalaphai tharan athumna khangachon khavai makhavaomana. 14Athumwui manglā nganuilakha thihaora, kala athumwui mirin khayora mayarnaobingli ngasoda kupra. 15Ana kachotabingli athumwui kachotkachāng eina kanshokmi, kala rekakharek eina athumwui khanā tonga. 16Ana nali kachotkachāng makhāwui eina khang makhalei shāsang kayāng apamli khāngshokmi, kala nawui table leithao eina ngasakhaira. 17Kha na makhayābingwui bicharwui eina yuihaira; bichar kala mashunna nali singhaira. 18Malungkhavātna nali zei sāli suikhuilaga eina ngasharlu, kala ngatangman kasaka nali ma̱zatli mazang ngasakmialu. 19Nawui khangachon khavai khavao, lah nawui yāng pangshap saikorana, nali kasakwui eina ngachonmi shaprakhala? 20Mibingna athumwui apam eina katathaora ngayāli machihānalu. 21Ning ngasharlu; moreili mangareialu, kaja kachotkachāngwui mahutle nana hi kapangkhuihaira. 22Yanglu, Vare chi awui pangshapli reikhamataiana; awui thāda Ojā khipā lei?
23"Awui shongfa khipāna ali ningmihai, lah khipāna 'Na makaphā sāhaira' da hāngshaprakhala? 24Awui otsakli masot mi khavai phaningunglu, chi mibingna laa eina sākahaina. 25Mi saikorana chili yanghaira; mibingna katāva̱ eina chili thei. 26Yanglu, Vare chi reikhamataiana, kala ithumna ali matheimana; awui zingkumbingwui mashing chi phākhui khavai matheishaprarmana. 27Kaja ana tara̱ atangtangnao khuishoka; chibing awui leichuiwui eina zingrot thāda tāmi, 28chi muiyāna heitāda mibingwuitungli mavātla tāmi. 29Muiyāwui khaya̱lar, awui parbarwui khangashumkhon chi khipāna bhap tāshaprakhala? 30Yanglu, ana awui rikhān akuimareida chaiyāngmi, kala shamadruwui kathuka khayinmi. 31Kaja hibing eina ana mibingli bichar sāmi; kashakazā mavātla mizai. 32Ana apāng rikhān eina pemting ngasaka, kala pāntam chili ngaphit khavai ningmi. 33Awui kakathangna awui pongli hānga; sha̱keina tangdala siphan zingrot rāra da theishapa."
