Jobu 36

36 ¹Elihu sì tẹ̀síwájú nínú ọ̀rọ̀ rẹ̀, ó sì wí pé: ²“Ẹ mú sùúrù fún mi díẹ̀, èmi ó sì fihàn yín, nítorí ọ̀rọ̀ ṣì wà láti sọ nípò Ọlọ́run. ³Èmi ó mú ìmọ̀ mi wá láti ọ̀nà jíjìn, èmi ó sì fi òdodo fún Ẹlẹ́dàá mi. ⁴Nítorí nítòótọ́ ọ̀rọ̀ mi kì í ṣe irọ́; ẹni tí ó pé ní ìmọ̀ wà pẹ̀lú yín. ⁵Wò ó, Ọlọ́run lágbára, síbẹ̀ kì í kẹ́gàn ènìyàn; ó lágbára nínú ipá òye. ⁶Kì í pa ènìyàn búburú mọ́ láàyè, ṣùgbọ́n ó ń ṣe ìdájọ́ òdodo fún àwọn tí à ń pọ́n lójú. ⁷Kì í mú ojú rẹ̀ kúrò lára àwọn olódodo; ó mú wọn jókòó pẹ̀lú àwọn ọba lórí ìtẹ́ wọn títí láé, a sì gbé wọn ga. ⁸Bí a bá sì dè wọ́n ní ẹ̀wọ̀n, tí okùn ìpọ́njú sì dì wọ́n mú ṣinṣin, ⁹nígbà náà ni ó ń sọ iṣẹ́ wọn fún wọn àti ìṣọ̀tẹ̀ wọn, pé wọ́n ti hùwà ìgbéraga. ¹⁰Ó ń ṣí etí wọn sí ẹ̀kọ́, ó sì ń pàṣẹ pé kí wọ́n yípadà kúrò nínú ẹ̀ṣẹ̀. ¹¹Bí wọ́n bá fetísílẹ̀, tí wọ́n sì sìn ín, wọ́n ó parí ọjọ́ wọn nínú ìre, ọdún wọn yóò sì kọjá ní ìdùnnú. ¹²Ṣùgbọ́n bí wọn kò bá fetísílẹ̀, wọ́n ó ṣègbé nípa idà, wọ́n ó sì kú láìní ìmọ̀. ¹³Àwọn aláìwà-bí-Ọlọ́run ní ọkàn ń pa ìbínú mọ́ sínú; wọn kì í ké fún ìrànlọ́wọ́ nígbà tí ó bá dè wọ́n. ¹⁴Ọkàn wọn ń kú ní ìgbà èwe, ìyè wọn sì dópin láàrín àwọn aṣẹ́wó ojúbọ òrìṣà. ¹⁵Ó ń gba àwọn tí à ń pọ́n lójú là nípasẹ̀ ìpọ́njú wọn, ó sì ń ṣí etí wọn nípasẹ̀ wàhálà. ¹⁶Òun ìbá tún ti fà yín jáde kúrò ní ẹnu ìpọ́njú, sí ibi gbígbòòrò, tí ó ṣí sílẹ̀, tí kò ní ìhámọ́, tábìlì yín ìbá sì kún fún ọ̀pọ̀ oúnjẹ dídùn. ¹⁷Ṣùgbọ́n ìdájọ́ tí ó yẹ ènìyàn búburú ti borí yín; ìdájọ́ àti òdodo ti dì yín mú. ¹⁸Ẹ ṣọ́ra kí ìbínú má bàa tàn yín sínú ẹ̀gàn, ẹ má sì ṣe jẹ́ kí ìràpadà púpọ̀ ṣì yín lọ́nà. ¹⁹Ǹjẹ́ igbe ẹkún yín fún ìrànlọ́wọ́ lè pa yín mọ́ kúrò nínú ìpọ́njú, tàbí gbogbo ipá agbára yín? ²⁰Ẹ má ṣe ṣàfẹ́rí òru, nígbà tí a óò ké àwọn ènìyàn kúrò ní ipò wọn. ²¹Ẹ kíyè sára; ẹ má ṣe yà sí ẹ̀ṣẹ̀, nítorí ẹ ti yan èyí dípò ìpọ́njú. ²²Wò ó, a gbé Ọlọ́run ga nínú agbára rẹ̀; ta ni olùkọ́ bí i rẹ̀?

²³“Ta ni ó ti là ọ̀nà rẹ̀ kalẹ̀ fún un, tàbí ta ni ó lè wí pé, ‘Ìwọ ti ṣe àìtọ́’? ²⁴Ẹ rántí láti gbé iṣẹ́ rẹ̀ ga, èyí tí àwọn ènìyàn ti fi orin yìn. ²⁵Gbogbo ènìyàn ti wo ó; aráyé ń rí i láti ọ̀nà jíjìn. ²⁶Wò ó, Ọlọ́run tóbi, àwa kò sì mọ̀ ọ́n; iye ọdún rẹ̀ kọjá àwárí. ²⁷Nítorí ó ń fa ẹ̀kán omi sókè; wọ́n a sì sọ̀kalẹ̀ bí òjò láti inú ìkùukùu rẹ̀, ²⁸èyí tí àwọsánmà ń rọ̀ sílẹ̀, tí ó sì ń rọ̀ lọ́pọ̀lọpọ̀ sórí ènìyàn. ²⁹Ǹjẹ́ ẹnikẹ́ni lè mọ bí a ṣe ń tẹ́ àwọsánmà, àti ààrá àgọ́ rẹ̀? ³⁰Wò ó, ó tú mọ̀nàmọ́ná rẹ̀ yí ara rẹ̀ ká, ó sì bo ìjìnlẹ̀ Òkun. ³¹Nítorí nípasẹ̀ ìwọ̀nyí ni ó fi ń ṣàkóso àwọn ènìyàn; ó ń pèsè oúnjẹ lọ́pọ̀lọpọ̀. ³²Ó fi mọ̀nàmọ́ná kún ọwọ́ rẹ̀, ó sì pàṣẹ fún un láti kọlu ibi tí ó fojú sùn. ³³Ìró rẹ̀ ń sọ nípa rẹ̀; àní àwọn ẹran ọ̀sìn gan-an mọ̀ pé ìjì ń bọ̀ wá.”