Jobu 37

37 ¹“Nítorí èyí pẹ̀lú ni ọkàn mi ń wárìrì, tí ó sì ń fò kúrò ní ipò rẹ̀. ²Ẹ fetí sílẹ̀ dáradára sí àrá ohùn rẹ̀, sí ìhó tí ń jáde láti ẹnu rẹ̀. ³Ó tú u sílẹ̀ lábẹ́ gbogbo ọ̀run, àti mànàmáná rẹ̀ dé àwọn ìgun ilẹ̀ ayé. ⁴Lẹ́yìn rẹ̀ ohùn kan ń bú ramúramù; ó sán àrá pẹ̀lú ohùn ọláńlá rẹ̀, kò sì ṣe ìdádúró mànàmáná nígbà tí a bá gbọ́ ohùn rẹ̀. ⁵Ọlọ́run sán àrá lọ́nà ìyanu pẹ̀lú ohùn rẹ̀; ó ń ṣe ohun ńlá tí àwa kò lè mòye. ⁶Nítorí ó wí fún yìnyín pé, ‘Rọ̀ sórí ilẹ̀ ayé,’ àti fún òjò pé, ‘Jẹ́ ọ̀wààrà òjò tí ó lágbára.’ ⁷Ó fi èdìdì di ọwọ́ olúkúlùkù ènìyàn, kí gbogbo ẹni tí ó dá lè mọ iṣẹ́ rẹ̀. ^a a v7 “Fi èdìdì di ọwọ́” jẹ́ àkànlò èdè Heberu: ìjì Ọlọ́run ń dá gbogbo iṣẹ́ ènìyàn dúró, ó sì mú kí àwọn ènìyàn dúró kí wọ́n sì kíyè sí ohun tí ó ń ṣe. ⁸Nígbà náà ni àwọn ẹranko wọ inú ihò wọn tí wọ́n sì dúró nínú ibùgbé wọn. ⁹Láti inú yàrá rẹ̀ ni ìjì ẹlẹ́fùúfù ti wá, àti òtútù láti ọ̀dọ̀ àwọn ẹ̀fúùfù tí ń fọ́nká. ¹⁰Nípa èémí Ọlọ́run ni yìnyín dídì ṣẹ̀, tí omi gbígbòòrò sì dì gbingbin. ¹¹Ó fi ọ̀rinrin kún àwọsánmà tí ó nípọn; àwọn àwọsánmà ń tú mànàmáná rẹ̀ ká. ¹²Wọ́n ń yí yíká nípa ìtọ́sọ́nà rẹ̀, láti ṣe ohunkóhun tí ó bá pa láṣẹ fún wọn káàkiri ojú ayé tí a ń gbé. ¹³Yálà fún ìtọ́ni, tàbí fún ilẹ̀ rẹ̀, tàbí fún ìfẹ́ májẹ̀mú, ó ń mú kí ó ṣẹlẹ̀.

¹⁴“Fetí sí èyí, Jobu; dúró jẹ́ẹ́ kí o sì ronú lórí àwọn iṣẹ́ ìyanu Ọlọ́run. ¹⁵Ṣé o mọ bí Ọlọ́run ti ń pàṣẹ fún wọn, tí ó sì ń mú kí mànàmáná àwọsánmà rẹ̀ tàn? ¹⁶Ṣé o mọ bí àwọn àwọsánmà ṣe ń rọ̀ ní ìdọ́gba, iṣẹ́ ìyanu ẹni tí ó pé ní ìmọ̀? ¹⁷Ìwọ ẹni tí aṣọ rẹ ń gbóná nígbà tí ilẹ̀ bá dákẹ́ jẹ́ẹ́ lábẹ́ ẹ̀fúùfù gúúsù, ¹⁸ṣé ìwọ lè bá a tẹ́ òfúrufú payá, tí ó le bí dígí irin dídà?

¹⁹“Kọ́ wa ní ohun tí àwa yóò sọ fún un; àwa kò lè ro ẹjọ́ wa nítorí òkùnkùn. ²⁰Ǹjẹ́ kí a sọ fún un pé mo fẹ́ sọ̀rọ̀? Ǹjẹ́ ẹnikẹ́ni yóò fẹ́ kí a gbé òun mì? ²¹Ní báyìí kò sí ẹni tí ó lè wo ìmọ́lẹ̀ náà nígbà tí ó bá ń tàn ní òfúrufú, lẹ́yìn tí ẹ̀fúùfù ti kọjá tí ó sì ti mú wọn mọ́. ²²Láti àríwá ni dídán wúrà ti ń wá; ọláńlá ẹ̀rù yí Ọlọ́run ká. ²³Olódùmarè—àwa kò lè dé ọ̀dọ̀ rẹ̀; ó tóbi ní agbára, síbẹ̀ nínú ìdájọ́ àti òdodo lọ́pọ̀lọpọ̀ kò ṣe ohun àìtọ́. ²⁴Nítorí náà àwọn ènìyàn bẹ̀rù rẹ̀; kò náání àwọn tí ó gbọ́n lójú ara wọn.”