Job 37

37 ¹“Tungod niini usab ang akong kasingkasing nangurog ug milukso gikan sa nahimutangan niini. ²Paminawa pag-ayo ang dalugdog sa iyang tingog, ang dinahunog nga mogawas gikan sa iyang baba. ³Ilalom sa tibuok langit iya kining gibuhian, ug ang iyang kilat ngadto sa mga suok sa yuta. ⁴Human niini usa ka tingog ang modahunog; midalugdog siya pinaagi sa iyang mahimayaong tingog, ug wala niya pugngi ang kilat sa dihang madungog ang iyang tingog. ⁵Ang Dios midalugdog sa katingalahang paagi pinaagi sa iyang tingog; nagbuhat siyag dagkong mga butang nga dili nato matugkad. ⁶Kay sa nyebe siya nag-ingon, ‘Tagak sa yuta,’ ug sa talithi sa ulan, ‘Mahimong kusog nga bunok.’ ⁷Gisilyohan niya ang kamot sa matag tawo, aron ang tanan nga iyang gibuhat makahibalo sa iyang buhat. ^a a v7 Ang “gisilyohan ang kamot” usa ka idyoma sa Hebreohanon: ang bagyo sa Dios nagpahunong sa tanang buluhaton sa tawo, nga maoy hinungdan nga ang mga tawo mohunong ug mamatikod sa iyang gibuhat. ⁸Unya ang mga mananap mosulod sa ilang mga puy-anan ug mopabilin sa ilang mga langob. ⁹Gikan sa lawak niini moabot ang alimpulos, ug gikan sa nagkatibulaag nga mga hangin ang katugnaw. ¹⁰Pinaagi sa gininhawa sa Dios maporma ang yelo, ug ang halapad nga katubigan mogahi sa katugnaw. ¹¹Gikargahan niya ang bagang panganod sa kaumog; ang mga panganod nagpatibulaag sa iyang kilat. ¹²Nagtuyok sila pabalikbalik pinaagi sa iyang paggiya, aron buhaton ang bisan unsa nga iyang gisugo kanila sa tibuok nawong sa kalibotan nga gipuy-an. ¹³Alang man sa pagbadlong, o alang sa iyang yuta, o alang sa gugma sa kasabotan, iya kining gipahitabo.

¹⁴“Paminaw niini, Job; barog nga hilom ug palandonga ang mga katingalahan sa Dios. ¹⁵Nasayod ka ba kon giunsa sa Dios pagbutang sa iyang sugo kanila, ug pagpakidlap sa kilat sa iyang panganod? ¹⁶Nasayod ka ba kon giunsa pagkabitay nga timbang ang mga panganod, ang mga katingalahan sa usa nga hingpit sa kahibalo? ¹⁷Ikaw nga ang imong mga bisti nainit sa dihang ang yuta mahilom ilalom sa habagat, ¹⁸makahimo ka ba, uban kaniya, sa pagbukhad sa kalangitan, nga gahi sama sa salamin nga tinunaw nga metal?

¹⁹“Tudloi kami kon unsa ang among isulti kaniya; dili kami makapahayag sa among kaso tungod sa kangitngit. ²⁰Angay ba siyang sultihan nga gusto kong mosulti? Aduna bay bisan kinsa nga mangayo nga pagalamyon siya? ²¹Ug karon walay makahimo sa pagtan-aw sa kahayag sa dihang kini masanag diha sa kalangitan, human makalabay ang hangin ug nakapahawan niini. ²²Gikan sa amihan moabot ang bulawanong kasilaw; ang makalilisang nga pagkahalangdon naglibot sa Dios. ²³Ang Labing Gamhanan—dili nato maabot siya; gamhanan siya sa gahom, apan diha sa hustisya ug madagayaong pagkamatarong wala siyay gibuhat nga sayop. ²⁴Busa ang mga tawo nahadlok kaniya; wala siya magtagad niadtong mga maalamon sa ilang kaugalingong mga mata.”