Ukududuma kweLizwi laKhe

Intliziyo kaElihu iyagubha kukududuma. Uchaza ikhephu, umkhenkce, namafu ajikajikeleza ngokomyalelo kaThixo, athunyelwe ngenxa yesohlwayo okanye ngenxa yothando lomnqophiso, aze abuze ukuba uYobhi angakwazi na ukwaneka izulu. Yima nkqi uqwalasele, utsho, ngexa isaqhwithi sibuthelana emkhathini.

Isahluko 37.

“Nangale nto kananjalo intliziyo yam iyagubha, isuke endaweni yayo. Phulaphulani kakuhle ukududuma kwelizwi lakhe, nesandi esiphuma emlonyeni wakhe. Phantsi kwezulu lonke uyayikhulula, nombane wakhe uye kwiimbombo zehlabathi. Emva kwawo ilizwi liyabharhula; ududuma ngelizwi lakhe lobungangamsha, kananjalo akawubambi umbane xa livakala ilizwi lakhe. UThixo ududuma ngommangaliso ngelizwi lakhe; wenza izinto ezinkulu esingenakuziqonda. Kaloku uthi kwikhephu: ‘Wela emhlabeni,’ athi nakwimvula: ‘Yiba ngumvumbi omkhulu.’ Uyasivingca isandla somntu wonke, ukuze bonke abo wabenzayo bazi umsebenzi wakhe. ^a Zingena ke izilwanyana emiqolombeni yazo, zihlala emigongxweni yazo. Egumbini lawo kuphuma umoya ovuthuzayo, nakwimimoya ephangalalisayo kuphume ingqele. Ngomphefumlo kaThixo kubakho umkhenkce, amanzi abanzi aqine njengelitye. Uthwalisa ilifu elinzima ngamanzi; amafu asasaze umbane wakhe. Ajikajikeleze ngokukhokela kwakhe, ukuba enze konke awawisa umthetho ngako ebusweni belizwe elimiweyo. Nokuba kungenxa yesohlwayo, nokuba kungenxa yelizwe lakhe, nokuba kungenxa yenceba, uyakwenza kwenzeke.

“Kuphulaphule oku, Yobhi; yima nkqi uqwalasele imimangaliso kaThixo. Uyazi na ukuba uThixo uwawisela njani umthetho, enze ukhanye umbane welifu lakhe? Uyazi na ukuba amafu axhonywe njani elingana, izimanga zalowo onokwazi okugqibeleleyo? Wena ozimpahla zakho zishushu xa ilizwe lithe cwaka phantsi komoya wasezantsi, ungakwazi na, kunye naye, ukuwaneka izulu, liqine njengesipili esityhidiweyo?

“Sifundise ukuba sithini na kuye; asinako ukubeka ityala lethu ngenxa yobumnyama. Ufanele na ukuxelelwa ukuba ndifuna ukuthetha? Ngaba ukho umntu onokucela ukuba aginywe? Kaloku ngoku akukho namnye onokukhangela ukukhanya xa kuqaqambile esibhakabhakeni, emva kokuba umoya udlule wawatshayela amafu. Entla kuphuma ubuqaqawuli begolide; ubungangamsha obumangalisayo bumngqonga uThixo. USomandla — asinako ukufikelela kuye; mkhulu ngamandla, kanti ngokusesikweni nangobulungisa obuninzi akenzi bugqwetha. Ngenxa yoko abantu bayamoyika; akabanaki abo bazizilumko emehlweni abo.”