Job 37 FHB Father's Heart Bible™

37 ¹“Eitu nimite bhi moi laga mon kapi uthe aru tar jagah pora ulai jai.” ²“Tar awaj laga garaj ke, Tar mukh pora ulai aha gurgur awaj ke bhal pora huni bi.” ³“Pura akas laga nichete Tar pora eitu ke chari diye, aru Tar bhijli ke prithibi laga kona khan tak pathai diye.” ⁴“Eitu laga pichete ekta awaj gorjai; Tar mohima laga awaj pora Tar garaj kore, aru bhijli ke rukhai narakhe jitia Tar awaj huna jai.” ⁵“Isor pora Tar awaj logote asurit pora garaj kore; amikhan buji napara dangor kaam khan Tar pora kore.” ⁶“Kilemane borop ke Tar pora koi, ‘Prithibi te giri bi,’ aru borkhun ke, ‘Dangor jor pora giribi.’” ⁷“Tar pora sob manuh laga hath ke bondh kori diye, titia kene Tar pora bona sob manuh pora Tar kaam ke jani bo pare.” ^a a v7 “Hath ke bondh kori diye” eitu Hebrew bhasha laga ekta kotha ase: Isor laga andhi-borkhun pora sob manuh laga kaam ke rukhai diye, aru manuh khan ke rukhai kene Tar ki kaam kori ase eitu ke sa bole diye. ⁸“Tetiya janwar khan tarkhan laga gufa te ghusi jai aru tarkhan laga ghor te thaki jai.” ⁹“Tar bhitor kamra pora ghurni-hawa ahe, aru chari ja-a hawa khan pora thanda ahe.” ¹⁰“Isor laga saas pora boroph bone, aru dangor pani khan jomi kene tan hoi jai.” ¹¹“Tar pora ghono badal ke pani pora bhorai diye; badal khan pora Tar bhijli ke chotai diye.” ¹²“Tarkhan Tar porichalona pora ghuri ghuri thake, Tar pora taikhan ke ji hukum diye eitu manuh thaka prithibi laga uporte sob kori diye.” ¹³“Saja dibole hoilebi, nahoile Tar mati nimite hoilebi, nahoile vachan laga morom nimite hoilebi, Tar pora eitu ke hobole diye.”

¹⁴“Eitu ke huni bi, Job; thir hoikene khara koribi aru Isor laga asurit kaam khan ke bhabi sabi.” ¹⁵“Isor pora taikhan ke kineka hukum diye, aru Tar badal laga bhijli ke kineka chamkai diye, eitu tumi jane?” ¹⁶“Badal khan kineka barabar pora akas te jhuli thake, gyaan te thik thaka Ekjon laga asurit kaam khan, eitu tumi jane?” ¹⁷“Tumi, jun laga kapra khan gorom hoi jai jitia dakshin phale laga hawa pora prithibi chup-chap thake,” ¹⁸“Tar logote tumi akas ke bisarai dibo pare, ji dhala kora luha laga darpan nisena tan ase?”

¹⁹“Amikhan Tar ke ki kobo lage, eitu amikhan ke sikhai dibi; andhar nimite amikhan nijor kotha khara kori bo napare.” ²⁰“Moi kotha kobole itcha ase, eitu Tar ke janai dibo lage naki? Kunba manuh pora nije ke gili luwa hobole mangibo naki?” ²¹“Aru etiya akas te puhor ujala hoi thaka homoi te, kun bhi eitu ke sabo napare, jitia hawa paar hoi kene taikhan ke safa kori diye.” ²²“Uttor phale pora suna nisena ujala ahe; bhoi lagana mohima pora Isor ke gheri loi ase.” ²³“Sorbo-shoktiman ke—amikhan ponchibo napare; Tar shokti bisi dangor ase, hoilebi niyai aru bhorta dharmikota te Tar pora eku golti nakore.” ²⁴“Eitu nimite manuh khan Tar ke bhoi kore; nijor suku te gyaani bhaba khan ke Tar pora dhyan nadiye.”