Égbè Eluigwe nke Olu Ya

Obi Elaịhu na-akụ ike nʼihi égbè eluigwe. Ọ kọwara snoo, ice na igwe ojii na-atụgharị nʼiwu Chineke, e zitere maka mmezi ma ọ bụ maka ịhụnanya ọgbụgba ndụ, ma jụọ ma Job ọ̀ pụrụ ịgbasa eluigwe. Ọ sịrị, guzoro jụụ tụgharịa uche, ka oké ifufe na-achịkọta onwe ya nʼọnụ eluigwe.

Isi 37.

“Nʼihi nke a kwa, obi m na-ama jijiji, na-amapụ nʼọnọdụ ya. Gee ntị nke ọma nʼégbè eluigwe nke olu ya, geekwa ntị nʼụzụ na-esi nʼọnụ ya apụta. Ọ na-atọpụ ya nʼokpuru mbara eluigwe niile, zipụkwa amụma ya ruo akụkụ ụwa niile. Nʼazụ ya, otu olu na-ebigbọ; o ji olu dị ebube na-ada égbè eluigwe, ọ naghịkwa egbochi amụma mgbe a nụrụ olu ya. Chineke ji olu ya na-ada égbè eluigwe nʼụzọ dị ịtụnanya; ọ na-eme oké ihe ndị anyị na-apụghị ịghọta. Nʼihi na ọ na-agwa snoo sị, ‘Daa nʼelu ụwa,’ na-agwakwa mmiri ozuzo sị, ‘Bụrụ oké mmiri na-ezo ike.’ Ọ na-akachi aka onye ọ bụla, ka onye ọ bụla o kere mata ọrụ ya. ^a Mgbe ahụ, ụmụ anụmanụ na-abanye nʼọgba ha, na-anọgidekwa nʼebe obibi ha. Site nʼụlọ ya ka oké ifufe na-esi abịa, oyi na-esikwa nʼifufe ndị na-efesasị abịa. Site nʼume Chineke ka mkpụrụ mmiri oyi na-akpụ, mmiri sara mbara na-akpụkwa ike. Ọ na-eboju igwe ojii gbara ọchịchịrị mmiri; igwe ojii na-agbasakwa amụma ya. Ha na-atụgharị gburugburu site na nduzi ya, ime ihe ọ bụla o nyere nʼiwu ha, nʼelu ụwa niile ebe mmadụ bi. Ma ọ bụ maka ịdọ aka na ntị, ma ọ bụ maka ala ya, ma ọ bụ maka ịhụnanya ọgbụgba ndụ, ọ na-eme ka o mezuo.

“Gee ntị na nke a, Job; guzoro jụụ ma tụgharịa uche nʼọrụ ebube nke Chineke. Ị maara otú Chineke si enye ha iwu, na otú o si eme ka amụma nke igwe ojii ya mụọ? Ị maara otú igwe ojii si akwụba nʼelu kwụsie ike, bụ ọrụ ebube nke onye zuru oke nʼihe ọmụma? Gị onye uwe ya na-ekpo ọkụ mgbe ala dị jụụ nʼokpuru ifufe si na ndịda, ị nwere ike, gị na ya, gbasaa mbara eluigwe, nke siri ike dịka enyo e ji ọla a wụrụ awụ mee?

“Kuziere anyị ihe anyị ga-ekwu nye ya; anyị apụghị ịhazi okwu anyị nʼihi ọchịchịrị. A ga-agwa ya na achọrọ m ikwu okwu? Ọ dị onye ga-arịọ ka e loo ya? Ugbu a, ọ dịghị onye pụrụ ilegide ìhè anya mgbe ọ na-enwu gbaa na mbara eluigwe, mgbe ifufe gafechara ma kpochapụ ha. Site nʼugwu ka ìhè na-egbuke egbuke dịka ọlaedo na-esi abịa; ebube dị egwu na-agba Chineke gburugburu. Onye pụrụ ime ihe niile—anyị apụghị iru ya nso; ọ dị ukwuu nʼike, ma nʼikpe ziri ezi na nnukwu ezi omume ọ naghị eme ajọ ihe. Nʼihi ya, ndị mmadụ na-atụ egwu ya; ọ naghị elebara ndị mara ihe nʼanya nke onwe ha anya.”