Tuleetap Kutinnyi
Potani muguleldap Elihu agobo tuleet. Mwae agobo kisyenik, barak ak poolik che wirwirtos eng' ng'atutap Kamuktaindet, che kiyookto agobo kateunet anan agobo chamyetap arorutyet, ak koteebe kole imuuchi Job koiito kipsengwet? Itonon ak igeero, kole, ye kaiyumgei pooldet eng' tabandap kipsengwet.
37 1“Eng' niito kora potani muguleldanyu, ak kotorombenoti kobunu ole mi. 2Ogas komyee tuleetap kutinnyi, ak kugululyet ne punu eng' ng'undennyi. 3Iyagi eng' kebeberta tugul ne po kipsengwet, ak kalyelennyi agoi tabanwegap ng'wony. 4Kosubi niito ko kutit ne poriseni; yaei tuleet eng' kutinnyi ne konyitot, ak ma siisi kalyeleet ye kas kutinnyi. 5Yaei tuleet Kamuktaindet eng' kutinnyi eng' kwang'utik; yaei tuguuk che eecheen che ma kemuuchi kenai. 6Amu leenji teluji kole, ‘Ibutyo eng' ng'wony,’ ak koleenji ropta, ‘Iik ropta ne oo.’ 7Ituchei eutap chii age tugul, si konai chii age tugul ne kiga koyai poisyennyi. a a v7 "Ituchei euut" ko ng'alekap Heberndo: siistoe ropteetap Kamuktaindet poisyonigap piik tugul, kotononchi piik ak kogeer kiit ne yaei ineendet. 8Yeityo kochut tiong'ik eng' olooto ole unotikwak, ak komeny eng' keriingonikwak. 9Punu eng' koonnyi kipchurchuryet, ak kabiit eng' usoonaik che iyestoi kaitityet. 10Eng' kabuusetap Kamuktaindet ko took koik, ak kotononatonagis peek che paraa. 11Inde pooldet ne tuui rewoot; iyestoi poolik kalyelennyi. 12Weendae koigeny eng' ooreennyi, si koyai kiit age tugul ne ng'atin icheek eng' taitap emet ne kong'emak. 13Ngo po kateunet, anan ko po emennyi, anan ko po chamyet ne po arorutyet, ko yaei konyoor.
14“Kas niito, Job; itonon ak iruchini kwang'utap Kamuktaindet. 15Inai ano ole indoe Kamuktaindet ng'atuutyennyi eng' icheek, ak koyae kalyeleetap pooldennyi koiyeni? 16Inai ano ole isonginine poolik eng' parak, kwang'utap ineendet ne ititaat eng' naet? 17Inyee ne ng'wanit ngoroiguk ye nyalili emet eng' usoonet ne punu murot, 18imuuchi kobooto ineendet iitoi kipsengwet, ne nyigiis ko uu kioit ne kitanyi?
19“Ineetech ne kimwa ineendet; ma kemuuchi keibu ng'aleekyok amu mesundeito. 20Tos kemwachi kole amache ang'alaal? Tos mi chii age tugul ne saaei kelugui? 21Ak nguno ma mi chii ne muuchi kogeer ngweny ye ilalaan eng' kipsengwet, ye kagoba usoonet ak koiityigei. 22Punu eng' murot kalalunetap thahabu; itektege telunatet ne po kwong'eet Kamuktaindet. 23Ineendet Ne po Kamuktaet—ma kemuuchi keit ineendet; oo eng' kimnateet, ago eng' kirwooget ne po imanda ak imanda ne abunu ma yaei ne ya. 24Eng' nooto anyun ko iywei piik ineendet; ma kas ineendet che utaatiin eng' konyekwak.”