Awui Khonwui Khangashum
Khangashong khanaili Elihuwui mangāna kachung. Ana Varewui tuili kaphungla kahao khangaro, tarai kala makhrai kahang, ngachonkhavai vang ma, ngasamkhami vang ma phaova̱; kala Jobna kazing khatākhui ngāra ma da ngahang. Ngaranga ngathuwo, ngasāpha ngāsāklu, ana kahang, mangkhaina kaphāk kapāili khangachāngla ngasoda.
37 1"Hi eina iwui ningla kathira, kala apam chiwui eina shoka. 2Awui khonwui khangashum, akhamorwui eina kashok ngarungning chi nganākhuikazaklu. 3Kazingram katongawui azingli ana chi phanngasaka, kala awui rikhān chi okathui achikunbingli vāshung ngasaka. 4Chiwui thili akhon akhana khanganga; ana awui hakkhamahā khon eina ngashuma, kala awui khon kashā tharan rikhān chi mangasāmmana. 5Varena awui khon eina phaningla makakhuida ngashuma; ithumna phaningla makakhui hakkhamahā ot ana sai. 6Kaja ana horamli hānga, 'Okathuili tālu,' kala zingrotlila hānga, 'Kapanga zingrot sālu.' 7Ana kasā mi saikorana awui ot theikhuikhavai, ana mi saikorawui pāng sāphinhai. a a v7 'Pāng sāphinhai' hi Hebrewwui tui khayana: Varewui siphanna miwui ot saikora ngasāmngasaka, mibingli ngasāmhaida ana khi sāli chi ningngasakngasaka. 8Chiwui thili sāyurbingna athumwui akhurli vālaga chili pamsanga. 9Awui kāwui eina sur rā, kala chaiyāng masibingwui eina khamakui shoka. 10Varewui khakkhāna phām sāngasaka, kala tara̱ mashālaka chi ngalung thāda mararhaowa. 11Ana muiyā kashāli khanimna pemngasaka; muiyābingna awui rikhān chaiyāngmi. 12Mi pamda khalei okathuiwui amaili ana athumli kaso saikora sākhavai, awui thānkhami eina athum kuimareida kuizata. 13Hāngkhamachinwui vanglala, awui ngaleiwui vanglala, lah makhangachei leikashiwui vanglala, ana chi shok ngasaka.
14"Hi nganālu, O Job; ngasāmda nganingda Varewui tekhamatei otbing phaningkhuilu. 15Varena athumli awui kaso kathada za̱ngasaka, kala awui muiyāwui rikhān kathada horvai ngasaka kaji na theila? 16Muiyā kathada kharit khangatarda hokthānghai, awor themlāk kahaiya chiwui tekhamatei otbing chi na theila? 17Azingshong masina ngalei ngasāmda leilaka tharan, nawui kashankachon kasāna, 18Heikakhui ka̱lāra̱ngayot thāda khamarar kazingram chi nana ali ngasoda mashāvā ngasakshaprala?
19"Ithumna ali khi hāngmi kaji ithumli tamchitheimilu; tangkhamang chiwui vang eina ithumna ithumwui tuingaphun masārarmana. 20Ina matui ningchānga kaji ali hāngmirala? Khipānakha ali mayuisang khavai porala? 21Kala ara masina kāshungda kazingram sākhayāng kahaiwui thili, kahor chi chili hormi tharan khipānakha mayangshaprarmara. 22Atungshong eina sinā khayākakā shoka; khangachee khangamkhareina Vareli kuinammi. 23Sāshap-pangshapa chili ithumna masamphangrarmana; ana pangshapli kahakva, chithālala mashun kala khamashung khangarong kachungkha eina ana khangui ot masāmana. 24Chiwui vang eina mibingna ali ngachee; khalattawui mikyan eina thangmeiyabingli ana mahengsangmana."
