ಯೋಬನ ಗ್ರಂಥ 36 FHB Father's Heart Bible™

36 ¹ಎಲೀಹು ಮಾತು ಮುಂದುವರಿಸಿ ಹೀಗೆಂದನು: ²“ಸ್ವಲ್ಪ ನನ್ನೊಂದಿಗೆ ತಾಳ್ಮೆಯಿಂದಿರು, ನಾನು ನಿನಗೆ ತೋರಿಸುತ್ತೇನೆ; ಏಕೆಂದರೆ ದೇವರ ಪರವಾಗಿ ಹೇಳಬೇಕಾದ ಮಾತುಗಳು ಇನ್ನೂ ಇವೆ. ³ನನ್ನ ತಿಳಿವಳಿಕೆಯನ್ನು ದೂರದಿಂದ ತರುತ್ತೇನೆ, ನನ್ನ ಸೃಷ್ಟಿಕರ್ತರಿಗೆ ನ್ಯಾಯನೀತಿಯನ್ನು ಸಲ್ಲಿಸುತ್ತೇನೆ. ⁴ನಿಜವಾಗಿಯೂ ನನ್ನ ಮಾತುಗಳು ಸುಳ್ಳಲ್ಲ; ತಿಳಿವಳಿಕೆಯಲ್ಲಿ ಪರಿಪೂರ್ಣನಾದವನು ನಿನ್ನ ಬಳಿ ಇದ್ದಾನೆ. ⁵ನೋಡು, ದೇವರು ಪರಾಕ್ರಮಶಾಲಿ, ಆದರೂ ಅವರು ಯಾರನ್ನೂ ತಿರಸ್ಕರಿಸುವುದಿಲ್ಲ; ಬುದ್ಧಿಶಕ್ತಿಯಲ್ಲಿ ಅವರು ಬಲಿಷ್ಠರು. ⁶ಅವರು ದುಷ್ಟರನ್ನು ಜೀವದಿಂದುಳಿಸುವುದಿಲ್ಲ, ಆದರೆ ಕುಗ್ಗಿದವರಿಗೆ ನ್ಯಾಯವನ್ನು ದೊರಕಿಸುತ್ತಾರೆ. ⁷ಅವರು ನೀತಿವಂತರಿಂದ ತಮ್ಮ ಕಣ್ಣುಗಳನ್ನು ಎಂದಿಗೂ ತೆಗೆಯುವುದಿಲ್ಲ; ಅರಸರೊಂದಿಗೆ ಅವರನ್ನು ಸಿಂಹಾಸನಗಳ ಮೇಲೆ ಸದಾಕಾಲ ಕುಳ್ಳಿರಿಸುತ್ತಾರೆ, ಅವರು ಉನ್ನತಿಗೇರುತ್ತಾರೆ. ⁸ಅವರು ಸಂಕೋಲೆಗಳಿಂದ ಬಂಧಿತರಾಗಿ, ಸಂಕಟದ ಹಗ್ಗಗಳಿಂದ ಬಿಗಿಯಾಗಿ ಕಟ್ಟಲ್ಪಟ್ಟರೆ, ⁹ಆಗ ಅವರಿಗೆ ಅವರ ಕೃತ್ಯಗಳನ್ನೂ ಅವರ ದ್ರೋಹಗಳನ್ನೂ, ಅವರು ಅಹಂಕಾರದಿಂದ ನಡೆದುಕೊಂಡಿದ್ದಾರೆಂದು ತಿಳಿಸುತ್ತಾರೆ. ¹⁰ಅವರ ಕಿವಿಯನ್ನು ಉಪದೇಶಕ್ಕೆ ತೆರೆಯುತ್ತಾರೆ, ಪಾಪದಿಂದ ಹಿಂತಿರುಗಬೇಕೆಂದು ಆಜ್ಞಾಪಿಸುತ್ತಾರೆ. ¹¹ಅವರು ಕೇಳಿ ದೇವರನ್ನು ಸೇವಿಸಿದರೆ, ಅವರು ತಮ್ಮ ದಿನಗಳನ್ನು ಏಳಿಗೆಯಲ್ಲಿ ಕಳೆಯುತ್ತಾರೆ, ಅವರ ವರ್ಷಗಳು ಸುಖವಾಗಿ ಕಳೆಯುತ್ತವೆ. ¹²ಆದರೆ ಅವರು ಕೇಳದಿದ್ದರೆ, ಕತ್ತಿಯಿಂದ ನಾಶವಾಗುತ್ತಾರೆ, ತಿಳಿವಳಿಕೆಯಿಲ್ಲದೆ ಸಾಯುತ್ತಾರೆ. ¹³ಹೃದಯದಲ್ಲಿ ಭಕ್ತಿಹೀನರಾದವರು ಕೋಪವನ್ನು ಇಟ್ಟುಕೊಳ್ಳುತ್ತಾರೆ; ಅವರನ್ನು ದೇವರು ಬಂಧಿಸಿದಾಗಲೂ ಅವರು ಸಹಾಯಕ್ಕಾಗಿ ಕೂಗುವುದಿಲ್ಲ. ¹⁴ಅವರ ಪ್ರಾಣವು ಯೌವನದಲ್ಲಿಯೇ ಸಾಯುತ್ತದೆ, ಅವರ ಜೀವವು ಅಪವಿತ್ರ ವೇಶ್ಯೆಯರ ನಡುವೆ ಕೊನೆಗೊಳ್ಳುತ್ತದೆ. ¹⁵ಕುಗ್ಗಿದವರನ್ನು ಅವರ ಸಂಕಟದ ಮೂಲಕವೇ ದೇವರು ಬಿಡಿಸುತ್ತಾರೆ, ಕಷ್ಟದ ಮೂಲಕ ಅವರ ಕಿವಿಯನ್ನು ತೆರೆಯುತ್ತಾರೆ. ¹⁶ಸಂಕಟದ ದವಡೆಗಳಿಂದ ನಿನ್ನನ್ನೂ ಅವರು ಹೊರಗೆ ಸೆಳೆದು, ಯಾವ ತಡೆಯೂ ಇಲ್ಲದ ವಿಶಾಲವಾದ, ಮುಕ್ತ ಸ್ಥಳಕ್ಕೆ ನಡೆಸುತ್ತಿದ್ದರು, ನಿನ್ನ ಊಟದ ಮೇಜು ಸಮೃದ್ಧಿಯಿಂದ ತುಂಬಿರುತ್ತಿತ್ತು. ¹⁷ಆದರೆ ದುಷ್ಟರಿಗೆ ತಕ್ಕ ದಂಡನೆಯಿಂದ ನೀನು ತುಂಬಿಹೋಗಿರುವೆ; ದಂಡನೆಯೂ ನ್ಯಾಯತೀರ್ಪೂ ನಿನ್ನನ್ನು ಹಿಡಿದಿವೆ. ¹⁸ಕೋಪವು ನಿನ್ನನ್ನು ಪರಿಹಾಸಕ್ಕೆ ಪ್ರೇರೇಪಿಸದಂತೆ ಎಚ್ಚರಿಕೆಯಾಗಿರು, ದೊಡ್ಡ ಈಡುಹಣವು ನಿನ್ನನ್ನು ದಾರಿತಪ್ಪಿಸದಿರಲಿ. ¹⁹ನಿನ್ನ ಸಹಾಯಕ್ಕಾಗಿನ ಕೂಗಾಗಲಿ ನಿನ್ನ ಸಕಲ ಬಲಪರಾಕ್ರಮಗಳಾಗಲಿ ಸಂಕಟದಿಂದ ನಿನ್ನನ್ನು ತಪ್ಪಿಸಬಲ್ಲವೇ? ²⁰ರಾತ್ರಿಗಾಗಿ ಹಂಬಲಿಸಬೇಡ, ಆ ರಾತ್ರಿಯಲ್ಲಿ ಜನಗಳು ತಮ್ಮ ಸ್ಥಳದಿಂದ ಕಡಿದುಹಾಕಲ್ಪಡುತ್ತಾರೆ. ²¹ಎಚ್ಚರಿಕೆಯಾಗಿರು; ಪಾಪದ ಕಡೆಗೆ ತಿರುಗಬೇಡ, ಏಕೆಂದರೆ ಸಂಕಟಕ್ಕಿಂತ ಇದನ್ನೇ ನೀನು ಆರಿಸಿಕೊಂಡಿರುವೆ. ²²ನೋಡು, ದೇವರು ತಮ್ಮ ಶಕ್ತಿಯಲ್ಲಿ ಉನ್ನತೋನ್ನತರು; ಅವರಂತಹ ಬೋಧಕನು ಯಾರಿದ್ದಾನೆ?

²³“ಅವರ ಮಾರ್ಗವನ್ನು ಅವರಿಗೆ ವಿಧಿಸಿದವನು ಯಾರು, ಇಲ್ಲವೆ ‘ನೀವು ಅನ್ಯಾಯ ಮಾಡಿದ್ದೀರಿ’ ಎಂದು ಹೇಳಬಲ್ಲವನು ಯಾರು? ²⁴ಅವರ ಕಾರ್ಯವನ್ನು ಕೊಂಡಾಡುವುದಕ್ಕೆ ಮರೆಯಬೇಡ, ಅದನ್ನು ಜನರು ಹಾಡಿನಲ್ಲಿ ಸ್ತುತಿಸಿದ್ದಾರೆ. ²⁵ಮನುಷ್ಯರೆಲ್ಲರೂ ಅದನ್ನು ನೋಡಿದ್ದಾರೆ; ಮಾನವರು ಅದನ್ನು ದೂರದಿಂದ ಕಾಣುತ್ತಾರೆ. ²⁶ನೋಡು, ದೇವರು ಮಹೋನ್ನತರು, ಅವರನ್ನು ನಾವು ಅರಿಯೆವು; ಅವರ ವರ್ಷಗಳ ಸಂಖ್ಯೆಯನ್ನು ಶೋಧಿಸಲಾಗದು. ²⁷ಅವರು ನೀರಿನ ಹನಿಗಳನ್ನು ಮೇಲಕ್ಕೆ ಎಳೆಯುತ್ತಾರೆ; ಅವು ಅವರ ಮಂಜಿನಿಂದ ಮಳೆಯಾಗಿ ಸುರಿಯುತ್ತವೆ, ²⁸ಆ ಮಳೆಯನ್ನು ಮೋಡಗಳು ಸುರಿಸಿ ಮನುಷ್ಯರ ಮೇಲೆ ಹೇರಳವಾಗಿ ಸುರಿಸುತ್ತವೆ. ²⁹ಮೋಡಗಳ ಹರಡುವಿಕೆಯನ್ನೂ ಅವರ ಮಂಟಪದ ಗುಡುಗನ್ನೂ ಯಾರಾದರೂ ಗ್ರಹಿಸಬಲ್ಲರೇ? ³⁰ನೋಡು, ಅವರು ತಮ್ಮ ಮಿಂಚನ್ನು ತಮ್ಮ ಸುತ್ತಲೂ ಚದರಿಸುತ್ತಾರೆ, ಸಮುದ್ರದ ಆಳಗಳನ್ನು ಮುಚ್ಚುತ್ತಾರೆ. ³¹ಇವುಗಳ ಮೂಲಕ ಅವರು ಜನಾಂಗಗಳನ್ನು ಆಳುತ್ತಾರೆ; ಹೇರಳವಾಗಿ ಆಹಾರವನ್ನು ಕೊಡುತ್ತಾರೆ. ³²ಅವರು ತಮ್ಮ ಕೈಗಳನ್ನು ಮಿಂಚಿನಿಂದ ತುಂಬಿಸುತ್ತಾರೆ, ಗುರಿಯನ್ನು ಹೊಡೆಯಬೇಕೆಂದು ಅದಕ್ಕೆ ಆಜ್ಞಾಪಿಸುತ್ತಾರೆ. ³³ಅದರ ಗರ್ಜನೆಯು ಅವರ ವಿಷಯವಾಗಿ ತಿಳಿಸುತ್ತದೆ; ಬಿರುಗಾಳಿ ಬರುತ್ತಿರುವುದನ್ನು ದನಕರುಗಳು ಸಹ ಗ್ರಹಿಸುತ್ತವೆ.”