स्तोत्रसंहिता 25

25 ¹ हे माझ्या पित्या, तुझ्याकडे मी माझा जीव उंचावतो.

² हे माझ्या पित्या, मी तुझ्यावर भरवसा ठेवतो; मला लज्जित होऊ देऊ नकोस; माझ्या शत्रूंना माझ्यावर विजय मिळवू देऊ नकोस. ³ खरोखर, जे तुझी वाट पाहतात ते कोणीही लज्जित होणार नाहीत; विनाकारण विश्वासघात करणारे लज्जित होतील.

⁴ हे माझ्या पित्या, तुझे मार्ग मला दाखव; तुझ्या वाटा मला शिकव. ⁵ तुझ्या सत्यात मला चालव आणि शिकव कारण तूच आमचा पिता, माझे तारण आहेस; दिवसभर मी तुझी वाट पाहतो. ⁶ हे माझ्या पित्या, तुझा कोमल कळवळा व तुझी प्रेमदया आठव, कारण त्या प्राचीन काळापासूनच्या आहेत. ⁷ माझ्या तारुण्यातील पापांची आठवण करू नकोस किंवा माझ्या बंडखोरींची; हे माझ्या पित्या, तुझ्या चांगुलपणासाठी तुझ्या प्रेमदयेप्रमाणे माझी आठवण कर.

⁸ आमचा पिता चांगला व सरळ आहे; म्हणून तो पाप्यांना मार्गाचे शिक्षण देतो. ⁹ तो नम्र जनांना न्यायात चालवतो, आणि नम्र जनांना आपला मार्ग शिकवतो. ¹⁰ आमच्या पित्याच्या सर्व वाटा प्रेमदया व विश्वासूपणा आहेत जे त्याचा करार व त्याच्या साक्षी पाळतात त्यांच्यासाठी.

¹¹ हे माझ्या पित्या, तुझ्या नावासाठी माझ्या दुष्कर्माची क्षमा कर, कारण ते फार मोठे आहे. ¹² आमच्या पित्याचे भय धरणारा मनुष्य कोण आहे? जो मार्ग त्याने निवडावा त्याचे शिक्षण तो त्याला देईल. ¹³ त्याचा जीव कल्याणात राहील, आणि त्याची संतती देश वतन म्हणून मिळवील. ¹⁴ आमच्या पित्याची घनिष्ठ मैत्री त्याचे भय धरणाऱ्यांसाठी आहे आणि तो त्यांना आपला करार कळवतो. ¹⁵ माझे डोळे सदैव आमच्या पित्याकडे लागले आहेत, कारण तो माझे पाय जाळ्यातून सोडवील.

¹⁶ माझ्याकडे वळ आणि कृपा कर माझ्यावर, कारण मी एकाकी व पीडित आहे. ¹⁷ माझ्या हृदयाचे क्लेश वाढले आहेत; माझ्या संकटातून मला बाहेर काढ. ¹⁸ माझ्या पीडेकडे व माझ्या कष्टांकडे पाहा, आणि माझी सर्व पापे दूर कर. ¹⁹ माझ्या शत्रूंकडे पाहा, कारण ते पुष्कळ आहेत, आणि ते हिंसक द्वेषाने माझा द्वेष करतात.

²⁰ माझ्या जिवाचे रक्षण कर आणि सोडव मला; मला लज्जित होऊ देऊ नकोस, कारण मी तुझा आश्रय घेतो. ²¹ सात्त्विकता व सरळपणा माझे रक्षण करोत कारण मी तुझी वाट पाहतो.

²² हे आमच्या पित्या, इस्राएलाला त्याच्या सर्व संकटांतून खंडून सोडव.