Psalms 25

25 ¹To you, my Papa, I dey lift up my soul.

²My Papa, na inside you I dey put my trust; no make shame catch me; no let my enemies win over me. ³For true, nobody wey dey wait for you go shame; na dem wey dey betray for notin go carry shame.

⁴Show me your ways, my Papa; teach me your paths. ⁵Lead me for your truth and teach me, because na you be our Papa, my salvation; I dey wait for you di whole day. ⁶Remember your tender mercy wey dey pain belle, my Papa, and your Covenant love, because dem dey since long time. ⁷No remember di sins wey I do wen I be pikin or my rebellions; remember me according to your Covenant love, for di sake of your goodness, my Papa.

⁸Our Papa good and E dey correct-and-holy; na why E dey teach sinners di way. ⁹E dey lead di humble people for justice, and E dey teach di humble people im way. ¹⁰All di paths of our Papa na loyal love and faithfulness for dem wey dey keep im Covenant and im testimonies.

¹¹For di sake of your name, my Papa, forgive my sin, because e plenty well well. ¹²Who be di person wey dey fear our Papa? E go teach am di way wey e suppose choose. ¹³Im soul go rest for well-being, and im pikin dem go inherit di land. ¹⁴Di close friendship of our Papa dey for dem wey dey fear am, and E dey make im Covenant known give dem. ¹⁵My eyes dey always face our Papa, because E go free my leg from di net.

¹⁶Turn come my side and show me grace, because I dey lonely and dey suffer. ¹⁷Di troubles for my heart don plenty; carry me comot from my distress. ¹⁸Look my suffering and my hardship, and take away all my sins. ¹⁹See my enemies, because dem plenty, and dem hate me with violent hatred.

²⁰Guard my soul and deliver me; no make shame catch me, because na inside you I dey hide. ²¹Make integrity and correct-and-holy way keep me safe, because I dey wait for you.

²²Redeem Israel, our Papa, comot from all im troubles.