Mi eng' bukuit
Bukuit

Ng'alaal Elihu Kogeny

Mwae Elihu kole ma weeksei kiy age tugul eng' Kamuktaindet tengegap chiito anan myeeindonyi, amu toror ineendet kosiir poolik; buteni piik alak. Riirei che kioren, ago ma mi ne teebe, ‘Mi ano Kamuktaindet Chobandanyo, ne igoochin tyenwogik eng' kemeut?’ Tesei anyun Job ng'aleek che ma po ng'omnateet.

Sura 35.

Ki testai anyun Elihu ak kole: “Ibwaat ile po iman niito? Imwae ile, ‘Siirei imandanyu imandap Kamuktaindet.’ Amu iteebe ile, ‘Po komanda nee inyee? Tos mi kelunet nee ngo ma ayai tengek?’ Awoljini, inyee ak choronokyuk kobooto inyee. Igeer parak kipsengwet, ak igeer; igeer poolik, che torooreen kosiirin. Ngo iyai tengek, ki iyai nee eng' ineendet? Ak ngo chaang' pistautiguk, ki iyachi nee ineendet? Ngo ii ne po iman, ki igoochi nee ineendet? Anan ki itaach nee eng' eung'ung'? Tengektong'ung' ko agobo chiito ne uu inyee kityo, ak imandang'ung' ko agobo chiito age ne uu inyee kityo. Riirei piik amu weigeetap sastaosyek che chaang'; guurse si kesar eng' eutap piik che kiimeen. Ago ma mi chii ne le, ‘Mi ano Kamuktaindet Chobandanyu, ne igoochin tyenwogik eng' kemeut, ne neetech kosiir tyong'ik che po ng'wony, ak ing'omitech kosiir toriitik che po parak?’ Guurse olooto, ago ma wolu, amu menatetap piik che ya. Iman keele ma kas Kamuktaindet guureet ne puch; ma epchin iit Ne po Kamuktaet. Komyee kosiir anyun ye ma wolu, ye imwae ile ma igeer ineendet—agot mi kirwoogeng'ung' eng' tainnyi, ak imache igeni ineendet. Ak nguno, amu tomo konyooru angeennyi, ak ma koepchin iit miising' abusnateet. Yaatei Iyoob kutinnyi ak ng'aleek che puch; tesei ng'aleek che ma po naet.”