Jobu 33

33 ¹“Ṣùgbọ́n nísinsìnyí, Jobu, gbọ́ ọ̀rọ̀ mi; fetí sí ohun gbogbo tí mo sọ. ²Wò ó, mo ti ya ẹnu mi; ahọ́n mi ń sọ ọ̀rọ̀ ní òkè-ẹnu mi. ³Ọ̀rọ̀ mi ti inú ọkàn tí ó dúró ṣinṣin wá, ètè mi sì ń fi òtítọ́ sọ ohun tí wọ́n mọ̀. ⁴Ẹ̀mí Ọlọ́run ni ó dá mi, èémí Olódùmarè sì ni ó fún mi ní ìyè. ⁵Dá mi lóhùn, bí ìwọ bá lè ṣe; to ẹjọ́ rẹ nà níwájú mi, kí o sì múra dúró. ⁶Wò ó, bí ìwọ ṣe rí ni èmi náà rí níwájú Ọlọ́run; láti inú amọ̀ ni a ti bù mí jáde. ⁷Ìbẹ̀rù mi kò gbọdọ̀ dẹ́rùba ọ, ìkìmọ́lẹ̀ mi kò sì gbọdọ̀ wúwo lé ọ lórí.

⁸“Nítòótọ́ ìwọ ti sọ ọ́ létí mi—èmi gbọ́ ìró ọ̀rọ̀ rẹ gan-an. ⁹‘Mímọ́ ni mo rí, láìní ìṣọ̀tẹ̀; mo mọ́ tónítóní, kò sì sí ẹ̀bi kankan nínú mi. ¹⁰Síbẹ̀ ó ń wá àbùkù mi; ó kà mí sí ọ̀tá rẹ̀. ¹¹Ó fi ẹsẹ̀ mi sínú ìdè; ó ń ṣọ́ gbogbo ọ̀nà mi.’

¹²“Ṣùgbọ́n nínú èyí ìwọ kò ṣe òtítọ́, mo dá ọ lóhùn, nítorí Ọlọ́run tóbi ju ẹnikẹ́ni tí í ṣe ẹ̀dá lọ. ¹³Èéṣe tí ìwọ fi ń bá a jà, pé òun kì í dá ọ̀rọ̀ ènìyàn kankan lóhùn? ¹⁴Nítorí Ọlọ́run ń sọ̀rọ̀ ní ọ̀nà kan, àti ní ọ̀nà mìíràn, bí ó tilẹ̀ jẹ́ pé kò sí ẹni tí ó kíyè sí i. ¹⁵Nínú àlá, nínú ìran òru, nígbà tí oorun èjìká bá kàn ènìyàn bí wọ́n ṣe ń sùn lórí ibùsùn wọn, ¹⁶nígbà náà ni ó ṣí etí wọn ó sì fi ìkìlọ̀ rẹ̀ tẹ̀ wọ́n lọ́kàn, ¹⁷láti yí ènìyàn padà kúrò nínú ìwà búburú àti láti pa ọkùnrin mọ́ kúrò nínú ìgbéraga, ¹⁸ó dá ọkàn wọn dúró kúrò nínú kòtò ikú, ó sì pa ìyè wọn mọ́ kúrò nínú ṣíṣègbé nípasẹ̀ idà.

¹⁹“A tún fi ìrora bá ènìyàn wí lórí ibùsùn rẹ̀, pẹ̀lú ìrora àìdáwọ́dúró nínú egungun rẹ̀, ²⁰tó bẹ́ẹ̀ tí ìyè rẹ̀ fi kórìíra oúnjẹ, àti ọkàn rẹ̀ oúnjẹ dídára jùlọ. ²¹Ẹran-ara rẹ̀ ṣòfò lọ, egungun rẹ̀ tí a kò tí ì rí tẹ́lẹ̀ sì yọjáde. ²²Ọkàn rẹ̀ súnmọ́ kòtò ikú, àti ìyè rẹ̀ sí ọ̀dọ̀ àwọn tí ń mú ikú wá.

²³“Bí ó bá sí ìránṣẹ́ kan fún un, alárinà kan—ọ̀kan nínú ẹgbẹ̀rún—láti fi ohun tí ó tọ́ fún ènìyàn hàn án, ²⁴tí ó sì ṣàánú fún un tí ó wí pé, ‘Dá a sí kúrò nínú sísọ̀kalẹ̀ lọ sínú kòtò ikú; mo ti rí ìràpadà kan,’ ^a a v24 Ìràpadà tí ó gba ọkàn là kúrò nínú kòtò ikú tọ́ka kọjá ọ̀rọ̀ Elihu lọ sí ìràpadà tí Baba wa yóò pèsè lọ́jọ́ kan nínú Jesu, ẹni tí ó fi ìyè rẹ̀ lélẹ̀ gẹ́gẹ́ bí ìràpadà fún ọ̀pọ̀lọpọ̀. ²⁵nígbà náà ni ẹran-ara rẹ̀ yóò tù jù ti ọmọdé lọ; yóò padà sí àwọn ọjọ́ ìgbà èwe rẹ̀. ²⁶Ó gbàdúrà sí Ọlọ́run, Ọlọ́run sì tẹ́wọ́gba olùjọsìn náà; olùjọsìn náà rí ojú Ọlọ́run pẹ̀lú ariwo ayọ̀, Ọlọ́run sì mú òdodo rẹ̀ padà bọ̀ sípò fún ènìyàn náà. ²⁷Ó kọrin jáde níwájú àwọn ẹlòmíràn ó sì wí pé, ‘Mo dẹ́ṣẹ̀ mo sì yí ohun tí ó tọ́ po, síbẹ̀ a kò san ẹ̀san rẹ̀ fún mi. ²⁸Ó ra ọkàn mi padà kúrò nínú sísọ̀kalẹ̀ lọ sínú kòtò ikú, èmi yóò sì rí ìmọ́lẹ̀.’

²⁹“Wò ó, Ọlọ́run ń ṣe gbogbo nǹkan wọ̀nyí léraléra pẹ̀lú ènìyàn, ³⁰láti mú ọkàn rẹ̀ padà kúrò nínú kòtò ikú, kí a lè tàn án pẹ̀lú ìmọ́lẹ̀ alààyè.

³¹“Fiyèsí, Jobu; fetísílẹ̀ sí mi. Dákẹ́ jẹ́ẹ́, èmi yóò sì sọ̀rọ̀. ³²Bí ìwọ bá ní ohunkóhun láti sọ, dá mi lóhùn; sọ̀rọ̀, nítorí inú mi yóò dùn láti rí i tí a dá ọ láre. ³³Bí kò bá sí bẹ́ẹ̀, nígbà náà fetísílẹ̀ sí mi; dákẹ́ jẹ́ẹ́, èmi yóò sì kọ́ ọ ní ọgbọ́n.”