Mi eng' bukuit
Bukuit

Ng'alaalji Elihu Job

Koleenji Elihu Job kole uu ineendet ng'ung'unyek kityo, ma mi ne kiywei. Waluunennyi ko kole ng'alaali Kamuktaindet, eng' ruiywek ak eng' syenoyet eng' rueetap myanet, si koweek chiito eng' keriinget, ak komwa arorutyoot kole: iste ineendet, kaanyooru waalet.

Sura 33.

“Ago nguno, Job, igas ng'aleekyuk; inde iit tugul che amwae. Keero, kaayaat kutinnyu; yaei ng'elyeptanyu ng'aleek eng' kutinnyu. Punu ng'aleekyuk eng' muguleldo ne imanda, ak mwaei kutinnyu eng' iman ne ngen. Ki yai Kabuusetap Kamuktaindet anee, ak koonu saboondanyu kabuusetap Ineendet Ne po Kamuktaet. Iwolwoo, ngot imuuchi; iyakta ng'aleekyuk eng' tainnyu, ak itonon. Keero, uu inyee anee eng' taitap Kamuktaindet; ki kiyai anee agine eng' ng'ung'unyek. Mat koiywaiywaiyin iyweet ne po anee, inyee, ak mat kowegin pegunet ne po anee.

“Iman kimwa inyee eng' itiikyuk—anee kaagas tweguunetap ng'aleekyuk. ‘Atiliil anee, ma atinye ng'elelnatet; aleel anee, ak ma mi tengekto eng' anee. Ago nyoorchi lelutik eng' anee; keele anee ko buundanyi. Indoi keelyekyuk eng' ratuutik; riibei ortinwekyuk tugul.’

“Ago eng' niito ma ii imanda, awolun, amu oo Kamuktaindet kosiir chiito age tugul ne ng'emaksei. Amu nee si iboryo ak ineendet, amu ma wolji ng'aleegap chiito age tugul? Amu ng'alaali Kamuktaindet eng' ooreet agenge, ak kobooto ooreet age, agot ma nai chii age tugul. Eng' ruiywet, eng' ng'ang'utyetap kemeut, ye put rueet ne oo eng' piik ye ruitos eng' itogusyekwak, yeityo koyaatyin itiikwak ak koindoi eng' icheek ng'aleennyi che iywaaita, si koweek chii eng' yaityet ak koriip murenik kobun menoteet, riibei saboondanyi kobun keriinget, ak saboondanyi kobun kobeet eng' rotweet.

“Kikergong' chii agine eng' ng'wanindo eng' itogunnyi, eng' ng'wanindo ne menyei eng' mwanik, si kowechei saboondanyi amitwogik, ak kowechei muguleldanyi amitwogik che myach. Betos panyeekyik, ak mwanik che ki kagiuny kotogos saang'. Riikyin saboondanyi keriinget, ak saboondanyi icheeget che ibu meet.

“Ngo mi malaikaet ne po ineendet, chii ne toreti kwenut— agenge eng' kwenutap elfu—si ak korirenji ak kole, ‘Isaru ineendet kobun chooruto keriinget; kaanyooru kagerutyet,’ a a v24 Kagerutyet ne saru saboondo kobun keriinget koboorunei tuguuk che siir ng'aleegap Elihu, koindoi kagerutyet ne ki tuun koochi Kwandanyo eng' peetuut age eng' Jeso, ne ki koonu saboondanyi koek kagerutyet ne po chaang'. yeityo koleel panyeekyik kosiir ne po lakweet; koweekyigei peetuusyegap ming'inatennyi. Saaei Kamuktaindet, ak kitaachei chiito ne saaei; keerei chiichooto togeetap Kamuktaindet eng' guutetap poiboiyet, ak koweekyi Kamuktaindet imandanyi chiichooto. Tyenei eng' taitap piik ak kole, ‘Ki ayai tengekto ak ki awal ne po iman, ago ma kiyaiywo anee. Ki kosar saboondanyu kobun chooruto keriinget, ak ageer lapkeiyet.’

“Keero, yaei Kamuktaindet tuguuchu tugul konyiisyek chaang' eng' chii, si koweekyi saboondanyi kobun keriinget, si kolaalatu eng' lapkeiyetap piik che sabei.

Konyit Job; igas anee. Siis, ak ang'alaal. Ngo itinye kiy age ne imwae, iwol anee; ing'alaal, amu amache eng' chamyet ageerin ki ityin imanda. Ngo ma uu nooto, igas anee; siis, ak aneetiin utindo.”