Nagsao ni Elihu kenni Job

Ibaga ni Elihu ken Job a daga laeng met isuna, awan ti pagbutngan. Ti sungbatna ket agsao ni Dios, iti tuntonen ken iti ut-ot iti katre ti sakit, tapno isubli ti maysa a tao manipud iti abut, ket mabalin nga ibaga ti maysa a mamagitna: pakawanen, nakitak ti pangsubbot.

Kapitulo 33.

“Ngem ita, Job, denggenmo dagiti sasaok; dengngegmo amin nga ibagak. Kitaem, linukatkon ti ngiwatko; mangbukbukel kadagiti sao ti dilak iti ngatuen ti ngiwatko. Nagtaud iti nalinteg a puso dagiti sasaok, ket sipupudno a sasao dagiti bibigko iti ammoda. Pinarsuadak ti Espiritu ti Dios, ket ti anges ti Mannakabalin-amin ti mangted iti biagko. Sungbatannak, no kabaelam; isaganam ti kasom iti sanguanak, ket agtakderka. Kitaem, kapadakon kenka iti sangoanan ti Dios; siak met ket kinurotdak manipud iti pitak. Dika koma mabutngan iti buteng kaniak, ken dika koma madagsenan iti ipugpugsatko.

“Pudno a kinunam iti dengngegko—nangngegko ti mismo a timek dagiti sasaom. ‘Nadalusak, awan ti panagrebelde; nasin-awak, ket awan ti basol kaniak. Ngem makitkitana ti biddutko; ibilangnak a kabusorna. Ikabilna dagiti sakak iti pagbaludan a kayo; bantayanna amin dagiti dalanko.’

“Ngem iti daytoy, saanka a umiso, isungsungbatko kenka, ta ad-dakkel ti Dios ngem iti asinoman a tao. Apay a makilabanka kenkuana, ta awan ti sungbatna kadagiti sasao ti tao? Ta agsao ti Dios iti maysa a wagas, ken iti sabali pay, nupay awan ti makaawat iti dayta. Iti tagainep, iti sirmata ti rabii, no agtinnag ti nauneg a turog kadagiti tattao bayat ti panagiddada iti pagiddaanda, ket luktanna dagiti lapayagda ken ipekkelna kadakuada dagiti pammakdaarna, tapno isublina ti tao manipud iti dakes nga aramid ken tapno lapdanna ti lalaki iti kinatangsit, lapdanna ti kararuana manipud iti abut, ti biagna manipud iti pannakadadael babaen ti kampilan.

“Masaway pay ti tao babaen ti ut-ot iti pagiddaanna, iti agtultuloy a panagut-ot dagiti tulangna, isu a ti biagna ket umsien iti tinapay, ken ti kararuana iti kasayaatan a taraon. Agkapuy ti lasagna, ket dagiti tulangna a di makita idi ket agtukkol. Umasideg ti kararuana iti abut, ken ti biagna kadagidiay mangiyeg iti ipapatay.

“No adda mensahero para kenkuana, maysa a mangtengnga—maysa kadagiti 1,000— tapno ibagana iti tao ti umiso para kenkuana, ken naasi kenkuana ket kunana, ‘Ispalem isuna iti panagbaba iti abut; nakasarakak iti pangsubbot,’ ^a ket sumarsariwa ti lasagna ngem iti lasag ti ubing; agsubli iti aldaw ti kinaagtutubona. Agkararag isuna iti Dios, ket maawat ti agdaydayaw kenkuana; makita ti agdaydayaw ti rupa ti Dios buyogen dagiti ariwawa iti ragsak, ket isubli ti Dios iti dayta a tao ti kinalintegna. Agkanta iti sanguanan dagiti sabsabali ket kunana, ‘Nagbasolak ket pinakillok ti nalinteg, ngem saan a nasubbad kaniak. Insubbotna ti kararuak manipud iti panagbaba iti abut, ket makitakto ti lawag.’

“Kitaem, naulit-ulit nga aramiden ti Dios amin dagitoy iti tao, tapno isublina ti kararuana manipud iti abut, tapno malawagan iti lawag dagiti sibibiag.

“Ikkam iti atensyon, Job; denggennak. Agulimekka, ket agsaoakto. No adda ibagam, sungbatannak; agsaoka, ta maragsakanak no makitaka a naibilang a nalinteg. No awan, denggennak; agulimekka, ket isuroankanto iti sirib.”