Job 33 FHB Father's Heart Bible™

33 ¹“Ma ugbu a, Job, nụrụ okwu m; gee ntị nʼihe niile m na-ekwu. ²Lee, emeghepụla m ọnụ m; ire m na-ekepụta okwu nʼoghoghoanọ ọnụ m. ³Okwu m si nʼobi ziri ezi na-apụta, egbugbere ọnụ m na-ekwupụta nke ọma ihe ha maara. ⁴Mmụọ nke Chineke kere m, ume Onye pụrụ ime ihe niile na-enyekwa m ndụ. ⁵Zaa m, ọ bụrụ na ị pụrụ; doziere okwu gị nʼusoro nʼihu m, ma guzosie ike. ⁶Lee, adị m ka gị nʼihu Chineke; a wepụtara m, mụ onwe m, site nʼụrọ. ⁷Egwu m ekwesịghị ime ka ị tụọ ụjọ, nrụgide m ekwesịghịkwa ịdọ gị nʼaka.

⁸“Nʼezie ị kwuola ka m na-anụ— anụrụ m ụda okwu gị. ⁹‘Adị m ọcha, enweghị nnupụisi; adị m ọcha, ọ dịghịkwa ikpe ọmụma dị nʼime m. ¹⁰Ma ọ na-achọta ihe ịta ụta nʼebe m nọ; ọ na-agụ m dịka onye iro ya. ¹¹O kechiri ụkwụ m abụọ nʼigwe mkpọrọ; ọ na-elezikwa ụzọ m niile anya.’

¹²“Ma nʼihe a i meghị nke ọma, ana m aza gị, nʼihi na Chineke dị ukwuu karịa mmadụ ọbụla. ¹³Gịnị mere i ji na-arụso ya ụka, na ọ naghị aza okwu ọbụla nke mmadụ? ¹⁴Nʼihi na Chineke na-ekwu okwu nʼotu ụzọ, ma kwuokwa nʼụzọ ọzọ, ọ bụ ezie na ọ dịghị onye na-aghọta ya. ¹⁵Na nrọ, nʼọhụ nke abalị, mgbe oke ụra na-adakwasị ndị mmadụ ka ha na-ehi ụra nʼelu akwa ha, ¹⁶mgbe ahụ ọ na-emeghe ntị ha ma mee ka ịdọ aka na ntị ya rụọ ha ọrụ nʼobi, ¹⁷ka o si otu a chigharịa mmadụ site nʼajọ omume, ma chebe nwoke ka ọ ghara inwe nganga, ¹⁸ọ na-egbochi mkpụrụobi ha ịba nʼolulu, na-egbochikwa ndụ ha ịla nʼiyi site na mma agha.

¹⁹“A na-abakwa mmadụ mba site nʼihe mgbu nʼelu akwa ya, ọkpụkpụ ya niile na-amị ya ọnụ mgbe niile, ²⁰nke mere na ndụ ya na-asọ achịcha oyi, mkpụrụobi ya na-asọkwa nri kachasị mma oyi. ²¹Anụ ahụ ya na-ala nʼiyi, ọkpụkpụ ya ndị zoro ezo na-amịpụtakwa. ²²Mkpụrụobi ya na-abịaru olulu ahụ nso, ndụ ya na-abịarukwa ndị na-eweta ọnwụ nso.

²³“Ọ bụrụ na e nwere onyeozi nʼihi ya, onye ogbugbo—otu onye nʼime puku— iji gwa mmadụ ihe ziri ezi nye ya, ²⁴ọ na-emekwara ya amara ma sị, ‘Zọpụta ya ka ọ ghara ịgbada nʼolulu; achọtala m ihe mgbapụta,’ ^a a v24 Ihe mgbapụta ahụ na-anapụta mkpụrụobi nʼolulu na-arụtụ aka gafee okwu Elaihu ruo nʼihe mgbapụta ahụ Nna anyị ga-enye nʼotu ụbọchị site na Jisọs, onye nyere ndụ ya dịka ihe mgbapụta nʼihi ọtụtụ mmadụ. ²⁵mgbe ahụ anụ ahụ ya na-adị ọhụrụ karịa nke nwata; ọ na-alaghachikwa nʼụbọchị okorobịa ya. ²⁶Ọ na-ekpegara Chineke ekpere, onye ofufe ahụ na-anabatakwa ya; onye ofufe ahụ na-ejikwa iti mkpu ọṅụ hụ ihu Chineke, Chineke na-eweghachikwara onye ahụ ezi omume ya. ²⁷Ọ na-abụpụta abụ nʼihu ndị ọzọ ma sị, ‘Emehiere m ma gbagọọ ihe ziri ezi, ma a kwụghachighị m ụgwọ ya. ²⁸Ọ gbapụtara mkpụrụobi m ka ọ ghara ịgbada nʼolulu, aga m ahụkwa ìhè.’

²⁹“Lee, Chineke na-eme ihe ndị a niile ugboro abụọ, ọbụna ugboro atọ, nʼebe mmadụ nọ, ³⁰iji si nʼolulu kpọghachita mkpụrụobi ya, ka e were ìhè nke ndị dị ndụ mụnyere ya.

³¹“Ṅaa ntị, Job; gee m ntị. Mechie ọnụ, aga m ekwu okwu. ³²Ọ bụrụ na i nwere ihe ị ga-ekwu, zaa m; kwuo, nʼihi na ọ ga-atọ m ụtọ ịhụ ka ị bụrụ onye ziri ezi. ³³Ọ bụrụ na o nweghị, gee m ntị; mechie ọnụ, aga m ezi gị amamihe.”