Ndị Enyi Job Gbara Nkịtị

Ndị enyi atọ ahụ kwụsịrị, otu nwokorobịa aha ya bụ Elaịhu, onye na-ege ntị kemgbe, wee were iwe dị ọkụ: iwe were ya megide Job maka ịgụ onwe ya onye ezi omume, iwe were ya megide ndị enyi ahụ maka ịma ya ikpe n'enweghị azịza. Ọ sị na amamihe na-esi n'ume nke Onye Pụrụ Ime Ihe Niile, ọ bụghị site n'isi awọ.

Isi 32.

Ya mere, ndị ikom atọ a kwụsịrị ịza Job, nʼihi na ọ bụ onye ezi omume nʼanya nke aka ya. Mgbe ahụ, iwe were Elaịhu nwa Barakel onye Buz, onye si nʼezinụlọ Ram, nke ukwuu. Iwe ya dị ọkụ megide Job nʼihi na o mere onwe ya onye ezi omume karịa Chineke. Iwe ya dịkwa ọkụ megide ndị enyi Job atọ, nʼihi na ha achọtaghị ọsịsa ọ bụla ma maa Job ikpe. Ugbu a, Elaịhu echerela tupu ọ gwa Job okwu nʼihi na ndị ọzọ bụ okenye karịa ya. Ma mgbe Elaịhu hụrụ na ndị ikom atọ a enweghị ihe ọ bụla ha ga-ekwu, iwe were ya ọkụ. Ya mere, Elaịhu nwa Barakel onye Buz kwuru okwu sị: “Abụ m onye dị obere nʼafọ, unu onwe unu bụ ndị okenye; ọ bụ ya mere m jiri jide onwe m, na-atụ egwu ịgwa unu ihe m maara. Echere m, ‘Ka agadi kwuo okwu, ka ọtụtụ afọ kuzie amamihe.’ Ma ọ bụ mmụọ dị nʼime mmadụ, bụ nkuume Onye pụrụ ime ihe niile, nke na-enye nghọta. Ọ bụghị ndị agadi bụ ndị maara ihe, ọ bụghịkwa ndị kara nká na-aghọta ihe ziri ezi. Ya mere ana m asị, geenụ m ntị; mụ onwe m ga-ekwukwa ihe m maara. Lee, echeere m okwu unu; egere m ntị maka arụmarụ unu mgbe unu na-achọ ihe unu ga-ekwu. Etinyere m uche m niile nʼebe unu nọ; ma ọ dịghị onye nʼime unu gosiri na Job mejọrọ ihe ma ọ bụ zaa arụmụka ya. Ya mere, unu asịla, ‘Anyị achọtala amamihe; ka Chineke merie ya, ọ bụghị mmadụ.’ Job edozibeghị okwu ya megide m, agaghị m ejikwa arụmụka unu zaa ya. Ha daala mba, ha enwekwaghị ihe ha ga-ekwu; okwu akọọla ha. Ọ ga-abụ na m ga-echere, ebe ha gbara nkịtị ugbu a, ebe ha na-eguzo ebe ahụ na-enweghị ọsịsa? Mụ onwe m ga-ekwukwa okwu m; mụ onwe m ga-ekwukwa ihe m maara. Nʼihi na okwu jupụtara m nʼime; mmụọ dị nʼime m na-akwagide m. Nʼime m, adị m ka mmanya na-enweghị ebe ọ ga-esi pụta, dịka karama akpụkpọ ọhụrụ nke na-achọ ịgbawa. Aghaghị m ikwu okwu ka ahụ dị m mma; aghaghị m imeghe egbugbere ọnụ m zaa okwu. Agaghị m ele mmadụ ọ bụla anya nʼihu, agaghị m aja onye ọ bụla mma nʼefu; nʼihi na amaghị m otú e si aja mmadụ mma nʼefu—ọ bụrụ na m mere ya, Onye kere m ga-ewepụ m ngwa ngwa.”