Kü Kongkin Mang Haapbü Shanga Tuokda
Tou haoeibü sanshuong yoa phola athekubü mütshuongei hao to haoeneibü chi la yeikei hoba haoeibü thenyeka eok thokkei. Mangsanga haoeibü mae loenda. Seneibü Bouei ngo laangkipa phokukei hoba kü ngek to chühyoko lolo jongaida dogo haoei lauda.
30 1“Lausikei tou ngo to nashou kibü shuongei kü to nyia—ngei haoeneibü bou shuong kü sanshuong kei shuong yoa phola athekulabü. 2Haoeneibü ikeibü hau kü la ai maibü kikhoulabü? Haoeneibü hau khümbei. 3Khümbo hoba mühei haiko koplintham yeian, haoenei sangliphang hoba maubü mühyaaka ulangbü kao shaukei. 4Haoenei buham phang yoa buyik sangtüngkei, hoba juniper bulong yomang haoeneibü shausiyung kikei. a a v4 Buham buyik hoba juniper bulong kho sangliphanga longbü lang shuong ki—khümbo aeibou kibü müt shuongeibü shale phambü sühko shaubü shausiyung ki. 5Haoen müt tan ka wapan apbei; mütshuongei kokbü phaia ngekbü tegü haoen thükae ngekkei. 6Haoen ulangbü shumang nyeka, kaoa huan hoba laang huan kila kikei. 7Buham phang yoa haoen ngekkei; tekan phang yoa haoen takshattikei. 8Songsido akibü, nyen akibü shousi shuong, haoen kaodak ka wapan apbei.
9“Hoba tou ngo haoeneibü nyibü chi la yeikei; ngo haoen shanga nyibü aikei la yeikei. 10Haoen kü to mangsenda hoba kü ka saabüa loda; haoen kü thenyeka 11Mühghaüei küeibü in longeikei hoba ngo khonsak hautikei shanga, haoenei kü thedanga ngühkhüm pendou tekan apbei. 12Kü mae ika rabba shuong loenda; haoenei kü you sepeitila hoba kü khulimbo leilubü wapyobü lam kümda. 13Haoenei kü lam leilukukei; haoenei kü amaibü ka hapngaida, hoba haoen to thaktilabü aoeikei aki. 14Haoen widei khün danko haubü tegü meimeida; leilubü yaangbü thüka haoen apsileko lotda. 15Phemshing shuong kü thükto wenbei; kü nyenhang yeiei souan ngaibü tegü apbei, hoba kü haabü yaangbü sangmei tegü danjung haukei.
16“Hoba tou kü langkei kü maangpona koukei; khonku chalou shuongei ngo sühkei. 17Shaishanga kü lo shuong nali thebei, hoba ngübü khonku shuong ladangkei ahaksoda. 18Hau yaangbüei kü nei jitnyinko; kü hele khu attishang tegü kaangkhühtham ngo khühla. 19Bouei ngo kaosoua tekan apbei, hoba ngo thamngu si tap tegü yeikei.
20“Ngei no to thuibü shanga ngekda, lausikei nyi kü to ajongaida; ngo pida, hoba nyi ngo ong chühyoko loda. 21Nyi kü to ngouei huongbü yeia; kaibü ik hauei nyi ngo khulimbo wapyoda. 22Nyi ngo yei ae phonla, hoba ngo kho settida; yeinak langhlangbü phanga nyi ngo souda. 23Aishanga nyi ngo haibü to, langkei kibü pendou shanga pienbü chem to leibalabü dogo ngei ngeakei.
24“Aieilausi, leilubü ka aokei ik ashingda lo, ayingsi haoeibü thushed ka aokei thuila angekda lo? 25Chalou sekbü müt shanga ngei ahaapbei lo? Khambü shuong shanga ngeibü soushouei amaangshat lep lo? 26Lausikei ngei maibü maanglemjinei, amaibü loukei; ngesakbü ngei maanglemjinei, nakthüh loukei. 27Kü insiaubu sangsembo akiko loua; khonku chalou shuongei ngo thükto loukei. 28Ngo nakkhübü paida, lausikei chanyuei aying; mütshuong kaman kibüa ngo pian thuila ngekda. 29Ngo sanyu shuong shanga jaisina yeikei, hoba au yaangbü shuong shanga jenabou yeikei. 30Kü khon nakkhübü yeian kü ka apda, hoba kü lo mangbokei juokda. 31Kü kongkin mang haapbü shanga yeikei, hoba kü pithung haapyobü langh shanga yeikei.”
