Jobna Latluida Hānga
Jobna mangāhaikahai otbing phaninga: awui naongarā ali ngayurpamda, Varena ali ngasotnao sāmida awui shimli yangmida, keinung pumna ali zakmai mida. Ana mik khangapeobingwui mik sāmi, kachāmabingwui vang avāva̱ ngasāmi, kala awui athipli asārlam eina thisangra, awui zakmai kharingda leichingra da phaninga.
29 1Kala Jobna hānglui hānga: 2"Aha, kānvai kachāngbing thāda, Varena ili mayonmi zimikshobing thāda ina leiranu! 3awui thaomeina ikuitungli hor tharan, kala awui kahorna tangkhamangli ina ngara̱thuia; 4iwui raighai zimiksholi ina leilakha thāda, Varewui khangavap ngasotnao iwui shimtungli leilaga tharan, a a v4 Jobna atam akhali theikahai khangavap chiwui vang ngahuipama — awui shimtungli khalei Varewui ngasotnao chi. Ana aruila matheila lei kaja awui ningkachāng Vare chi awui wuklung ali katang mapākthuilak Avā china; kala lairik hi makupranglakha eina ana khalatta eina theira. 5Sāshap-pangshapa aruila iwuili leilakha, iwui naongarābing iwui kuimareida leilaga tharan; 6iwui pheikār makhan eina ra̱vai tharan, kala lunghārna iwuili thao kong heirormi; 7Ina keinungwui ngaveili vaida, kala kayang khamashāli ina pama tharan, 8yaronnaobingna ili theida chishong anganinga, kala khararnaobing ngakarthuida nganinga; 9wungnaobingna athumwui tui matuithuhaida, kala khamortungli pāng soma; 10khangambingwui khon vānhaowa, kala athumwui male khamor akuitungli ngathāntita. 11Khanāna shā tharan, ili sokhami ngasai da hānga, kala mikna thei tharan, iwui vang shākhi mi, 12khikhalajila khangakao kachāmali, kala ngachonme mi makhalei avāva̱ makhalei naoli ina ngatangmi. 13Shimānhaokhavai miwui sokhami iwuitungli shoka, kala ra̱meiva̱wui malung mathānda laa sāngasaka. 14Khamashung khangarong ina ngavaikhuia, kala china ili ngavaimi; iwui mashun kachon eina kuitei thāda thai. 15Mik khangapeobingli ina mik ngasaka, kala phei katekabingli phei ngasaka. 16Khavātabingwui vang ina avā ngasaka, kala ina mathei mi chiwui tuingaphun phākashokna. 17Ina makhayāwui hāra sātekmihaowa, kala awui hāwui eina sāshai chi khuithuihaowa. 18Chieina ina kahangva, 'Ina iwui athipli thira, kala iwui ngashun situi ngayāda mataisangra.' 19Iwui angayungna tara̱li samphanga, kala ngayā katonga ikra̱na iwui aphāngtungli tai. 20Iwui masot iwuili matekchinga, kala iwui malā ipāngli katang dharchinga. 21Mibingna ili nganāmida ngaraipama; iwui hāngkachithei vang athumna kasaikha pama. 22Ina hānghailaga, athumna khangatei mahāngluimana; iwui tui china athumwuitungli malungkhanim eina tai. 23Athumna kazing thāda ili ngaraiya, kala mayo kachāngwui zingrot thāda athumwui khamor makai. 24Ina athumli mai kaphā chitheimi tharan, athumna shitsang matukmana, kala athumna iwui maiwui kahorli ngashiktit. 25Ina athumwui shongfa kapangkhuilaga athumwui wungva̱ thāda pama; Ina awui raimibingli khalei awunga thāda, chapkhangachābingli ringphā khangasaka mi thāda pama."
