Mukuni Wálubuka mu Kwenda Mwanga
Tuka mu mudimba, Yesu wázonza bingana bya Kipfumu kya Tata wetu bina bisi sweka bwosu bisi monisa: mafu maya, matiti ma mbi mana básya makula tee yi tangwa dya thotolo, kheni ya mutalada, kifunusu kyasweka, kimvwama kyafwana tekisa byosu kikuma kyandi. Buna tsi yandi yi nzu yandi byámukumbwala, amana bima bikheni byahangamana kuna.
13 1Muna tangwa dina, Yesu wákatuka mu nzu amana wázakala ha khungu ya yanga. 2Mulumba-lumba wa batu lawu wakhundakana kuna thwala yandi; buna wákota mu mudimba amana wázakala, bwosu mulumba-lumba wosu wátelama ku tseki.
3Amana wábazimbwala mambu ma lawu mu bingana: «Talenu, mukuni wálubuka mu kwenda mwanga. 4Amana buna kakala mwanga, ndambu ya kheni yábwila mu nzila; amana banuni bakwísa, bisiya dya. 5Ndambu yikwawu ya kheni yábwila ha matadi, muna mwákala mafu ma khunda; yábufula tswatsu, mukuma mafu mákalaku ma nzinda. 6Ha kwátwa mwini, yáyokama; amana kikuma yákalaku yi misodi, yáyumuka. 7Ndambu yikwawu ya kheni yábwila ha kati kya tsaku; amana tsaku záleya, zákakidisaya. 8Ndambu yikwawu ya kheni yábwila mu mafu ma bukheti, yibuti kheni: yimosi khama, yikwawu makumasambanu, yikwawu makumatatu. 9Wuna wenina yi matu ma kuyuka, kayuka!»
10Amana balonguki bandi bakwísa kwena yandi, bámuhyula: «Kikuma kya biki wisi zonza kwena bawu mu bingana?»
11Yandi wubavutula: «Benu, lwátambula mbakisilu ya kubakula bitsweki bya Kipfumu kya Tata wetu; kaasi bawu loni. 12Wuna wenina yi kima, kabámuheka muluta amana kakála yi bima bya lawu; kaasi wuna wukondi kima, keti kyawu kenina na kyawu kakakúbotulwa. 13Kikuma kya kyokyo yisi zonza kwena bawu mu bingana: basímbulula kwa bawu, kaasi bamonaku kima; bayuka kwa bawu, kaasi babakulaku kima. 14Mwena bawu, mambu mana mbikudi Yesaya kátekila zonza malungidi: “Lwayukiki kwenu mboti, kaasi lwabakudikiku kima; lwasimbuludiki kwenu, kaasi lwamonikiku kima.” 15“Mukuma mbundu ya batu baba yizitamini; bazindini matu ma bawu, amana bazibikini mesu ma bawu— hanga bamona yi mesu ma bawu, bayuka yi matu ma bawu, babakula yi mbundu ya bawu, amana bavutuka, amana yibábelula.”
16Kaasi benu, mesu menu ma khembu kikuma mamóna, amana matu menu kikuma mayuka. 17Mu kyedika yiluzimbwadi: bambikudi ba lawu yi batu ba masonga bázola kumona mana lumona, kaasi bámonaku kyawu; bázola kuyuka mana luyuka, kaasi báyukaku.
18Buna, yukenu benu kingana kya mukuni. 19Kosu mutu wuna wisi yuka Ndinga ya Kipfumu kaasi kázayaku kubakula, kiphidi-mutu kikwísa amana kikwata kina kyámwangana muna mbundu yandi. Kyokyo kyenina kheni yina yámwangana mu nzila. 20Kheni yina yámwangana muma mwa matadi, yenina mutu wuna wisi yuka Ndinga, amana tswatsu katambwasa yi kyesi; 21Kaasi kakondi misodi mwena yandi meni, buna kazingaku; amana phasi ho munyanga buna kwisa kikuma kya Ndinga, tswatsu kabwa. 22Kheni yina yámwangana ha kati kya tsaku, yenina mutu wuna wisi yuka Ndinga, kaasi mayanu ma tsi yayi yi luvunu lwa kimvwama bisiya kakidikisa, amana yihesiku. 23Kaasi kheni yina yámwangana mu mafu ma bukheti, yenina mutu wuna wisi yuka Ndinga amana kubakula; yandi wubuti bibundu: khama, makumasambanu, ho makumatatu.»
Ngenza yi Matiti mu Kilanga
24Yesu wábaheka kingana kikwawu: «Kipfumu kya Tata wetu kifwanakani yi mutu wuna wákuna kheni za bukheti muna kilanga kyandi. 25Kaasi bwosu batu boosu bakala nimba, ndwandwa wandi wakwísa, wákuna matiti ha kati kya ngenza, amana wenda. 26Buna ngenza zámena amana záhe bibundu, buna matiti phi mámonika. 27Basadi ba mukwa kilanga bakwísa, bamuzimbwadini: “Pfumu, kuwákunaku kheni za bukheti muna kilanga kyaku? Buna, kweti matuki matiti?”
28“Ndwandwa wahangidi kyokyo,” yandi wavutula. Amana basadi bámuhyula: “Buna, wuzodi ni twenda kumavusa?”
29“Loni,” yandi wazimbula, “mukuma bwosu lwisi vusa matiti, lwalenda vusa phi ngenza ha kimosi yi mawu. 30Yambulenu byodi bikole ha kimosi tii yi tangwa kya kuhela. Muna tangwa kya kuhela, yizimbula kwena bahedi: Tongunenu theti matiti, lukasenu mawu mu bunda mu kuyoka; buna lwongikenu ngenza muna khila kyama.”»
Ngenza ya Tidi Yikituka Miti
31Yesu wábaheka kingana kikwawu: «Kipfumu kya Tata wetu kifwanakani yi ngenza ya tidi yina kábonga mutu mosi amana wátimbulaya muna kilanga kyandi. 32Mbatanana yenina kukeya kuluta kheni zoosu, buna yileyi, yikituka mbuta kuluta biti byosu bya mu masamba, yikituka miti, keti banuni ba ku zilu bisa tunga mazamba ma bawu muna mihandi myandi.»
Kipfumu Kyenina Hanga Muvimbu Wasweka
33Yesu wábaheka kingana kikwawu: «Kipfumu kya Tata wetu kifwanakani yi muvimbu wuna kábonga mukhetu mosi amana wákotisa muna pfuba za kitesu kya kilo makumodi yi tanu, tii yi kuna kyáthutumuka kithoba kyosu.»
34Yesu wázimbula mambu mamana moosu kwena mulumba-lumba wa batu mu bingana; amana kázimbulaku kwena bawu kima konda kingana.
35Bwabuna malungila mana bázonza mu nzila ya mbikudi: «Yikazibula munwa wama mu bingana; yizimbula mana másweka tuka luyandiku lwa tsi.»
Tata Kahambula Ngenza yi Matiti
36Amana Yesu wásisa mulumba-lumba wa batu amana wákota mu nzu. Balonguki bandi bámufinama, bamuzimbwadini: «Tubangwamina kingana kya matiti ma mu kilanga.»
37Yandi wavutula: «Wuna wákuna kheni za bukheti yenina Mwana wa mutu. 38Kilanga kyenina tsi. Kheni za bukheti zenina bana ba Kipfumu; matiti menina bana ba kiphidi-mutu. 39Ndwandwa wuna wákuna mawu yenina Satana; kuhela kwenina nsuka ya tangwa; bahedi benina banzyo. 40Bwosu bátonguna matiti amana bayoka mawu mu mbawu, bwabuna bukakála muna nsuka ya tangwa. 41Mwana wa mutu katúma banzyo bandi hanga bakatula mu Kipfumu kyandi mambu moosu mana masi buta disumu yi batu boosu bana bisi sala mambi. 42Kabátimbula bawu muna muleku wa mbawu wuna wisi lema, kuna kwakala bidilu yi makwenzi. 43Buna batu ba masonga, muna Kipfumu kya Tata wa bawu, kabákenzuka hanga tangwa. Wuna wenina yi matu ma kuyuka, kayuka!»
Kipfumu Kyenina yi Thalu Kuluta Bima Byosu
44Kipfumu kya Tata wetu kifwanakani yi kuvwa kuna kwasweka muna kilanga. Mutu mosi wáwana kwawu, wásweka kwawu hika, amana mu kyesi wátekisa bima byandi byosu hanga kasumba kilanga kina.
45«Mbala yikwawu, Kipfumu kya Tata wetu kifwanakani yi mutu wa kikhita wuna wisi sanda misanga mya kitoku. 46Kunima dya kuwana musanga mosi wa thalu kuluta, wenda tekisa bima byandi byosu amana wásumba wawu.
Wanda Dyisi Bonga Mitindu Yosu
47Mbala yikwawu, Kipfumu kya Tata wetu kifwanakani yi wanda dina bálosa muna yanga, dyisi wongika batsema ba mitindu yi mitindu. 48Buna dyazadi, balobi bákoka dyawu ku tseki, bávwanda, amana bawongika batsema ba mboti muna bitunga, balosa ba mbi ku phenza. 49Bwabuna bukakála ku tsuka ya tsi: banzyo kabálubuka amana kabáhambula batu ba mbi ha kati dya batu ba masonga, 50amana kabátimbula bawu muna muleku wa mbawu wuna wisi lema, kuna bakadila amana bakakwenza menu mawu.»
51«Lwabakudi mambu mama moosu?» Bávutula: «Abwabuna.»
52Yandi wubazimbwadi: «Kosu molongi wa mitsiku wuna wálonguka mu Kipfumu kya Tata wetu, kifwanakani yi mukwa nzu wuna wisi katula muna fuka dyandi bima bya pha yi bya thama.»
Yesu Wábweswa mu Vata Dyandi
53Kunima dya Yesu kumana bingana bina, wákatuka kuna.
54Buna kávutuka ku vata dyandi, wábalonga muna nzu ya kimvuka ya bawu, amana báyituka: «Kweti katúka mutu wawu yi kudimuka kuku yi mihangu mya ngolu mama? 55Keti mutu wawu mwana wa musadi wa miti? Keti ngudi wandi khumbu yandi Madiya, amana baphangi bandi Yakobi, Yozefu, Simoni yi Yutasi? 56Keti baphangi bandi ba bakhetu boosu bena haha yi betu? Kweti buna katúka mutu wawu yi thinu zazi zoosu?»
57Bawu bábwa mu kisinza kikuma kya yandi. Kaasi Yesu wubazimbwadi: «Mbikudi wenina yi luzitu mu bibwala byosu, kaasi mu vata dyandi yi mu nzu yandi meni, kakeninaku yi luzitu.»
58Kásalaku kuna mihangu mya ngolu mya lawu, kikuma kya kukonda lukwikilu kwa bawu.
