Bijon Phela Manuh Bijon Phelabole Ulai Jaise
Ekta naw pora Jisu Tai laga Pitri laga rajyo laga kahani khan koi, jun dikhai diya nisena lukai bhi diye: char kisim mati, kheti laga homoi tak itcha kori kene bhorai diya bon, ekta sorioh guti, lukai thaka khomir, sob bikiri kori kene lobole laik ekta dhan. Titia Tai laga nijor nogor pora Tai ke khong kore, aru ta te olop he kaam hoi.
13 1Hei din te Jisu ghor pora ulai kene samundar kinar te bohi jaise. 2Dangor bhir khan Tar age te joma hoise, etu karne Tai ekta naw te uthi kene bohise, aru sob bhir kinar te khara hoi thakise.
3Aru Tai taikhan ke dristanto pora bisi kotha koise, koi kene, “Sabi, bijon phela ekjon manuh bijon phelabole ulai jaise. 4Aru Tai bijon phelate, kunba bijon rasta kinar te girise, aru chiriya khan ahhi kene etu khai loise. 5Dusra bijon mati kom thaka pathor matite girise, aru matitu gobhir nathaka karne joldi uthi ahhise. 6Jitia suruj uthise, gash khan juli jaise; aru etu laga shikor nathaka karne, etu sukhi jaise. 7Dusra bijon kata jhaap majot te girise, aru kata khan dangor hoi kene etu ke dabai dise. 8Dusra bijon bhal matite girise, aru guti ulaise: kunba eksoh guna, kunba saathi, kunba tirees. 9Kun laga kaan ase, tai hunibi.”
10Tetiya chella khan Tar logot te ahhi kene hudise, “Apuni kele taikhan ke dristanto pora koi ase?”
11Tai koise, “Amar Pitri laga rajyo laga lukai thaka kotha khan jana nimite tumikhan ke dise; kintu taikhan ke diya nai. 12Kun manuh logot te ase tai ke aru bisi dibo aru tai bhorta pabo; kintu kun logot te eku nai, tai logot te ki ase etu bhi loi lobo. 13Etu karne Moi taikhan ke dristanto pora koi ase: taikhan sai kintu nadikhe; taikhan hune kintu nahune aru nabuje. 14Taikhan uporte Isaiah laga bhabobani pura hoise: ‘Tumikhan huni-huni thakibo, kintu kitia bhi nabujibo; tumikhan sai-sai thakibo, kintu kitia bhi nadikhibo.’ 15Kilemane etu manuh khan laga mon tan hoi jaise; taikhan laga kaan pora bhal pora nahune, aru taikhan nijor suku bondo kori loise— nohoile taikhan nijor suku pora dikhibo, nijor kaan pora hunibo, nijor mon pora bujibo, aru ghuri ahhibo, aru Moi taikhan ke bhal kori dibo.’
16Kintu tumikhan laga suku asirbad pa-a ase, kilemane etu dikhe, aru tumikhan laga kaan, kilemane etu hune. 17Moi tumikhan ke hosa koi ase: bisi bhabobadi aru dharmik manuh khan tumikhan ki dikhe etu sabole bisi mon korise, kintu dikha nai; tumikhan ki hune etu hunibole mon korise, kintu huna nai.
18Titia, bijon phela manuh laga dristanto hunibi. 19Kun manuh rajyo laga kotha hune aru etu nabuje—dusto jon ahhi kene tar mon te bijai diya etu chingi loi jai. Eitu rasta kinar te phela bijon tu ase. 20Pathor matite phela bijon tu etu manuh ase kun kotha tu huni kene, loge-loge khushi pora etu loi lage, 21kintu nijor bhitor te shikor nathaka karne, taikhan bisi din nathake; jitia kotha nimite dukh na-hoile zulum ahhe, taikhan joldi giri jai. 22Kata majot te phela tu kotha tu hune, kintu etu jamana laga chinta aru dhun-sompoti laga thogai pora etu ke dabai diye, aru etu guti ulabole napare. 23Kintu bhal matite phela bijon tu kotha tu huni kene bujhe. Etu guti ulai—eksoh, saathi, na-hoile tirees guna juntu phelaise.”
Kheti te Gehu aru Biya Ghas
24Tai taikhan ke aru ekta dristanto dise, “Amar Pitri laga rajyo tu ekjon manuh nisena ase, kun tar kheti te bhal bijon phelaise. 25Kintu jitia sob manuh ghumai thakise, tar dushman ahhi kene, gehu majot te biya ghas bijai dise, aru jai jaise. 26Jitia gehu uthi kene guti dhorise, titia biya ghas bhi dikhi jaise. 27Ghor malik laga noukar khan ahhi kene koise, ‘Malik, apuni kheti te bhal bijon phela nai naki? Tene hole biya ghas kot pora ahhise?’
28Tai koise, ‘Dushman ekjon pora etu korise.’ Noukar khan Tai ke hudise, ‘Tetiya apuni ami khan ke jai kene etu khan ke uthai dibole mon kore naki?’
29Tai koise, ‘Nai, kilemane jitia tumikhan biya ghas uthai thakibo, etu logote gehu bhi uthai dibo pare. 30Kati luwa somoi naha tak duita ke eke logote bari bole dibi. Kati luwa somoi te moi kati luwa manuh khan ke kobo: Poila biya ghas joma koribi, aru julai dibole guti-guti bandhi lobi; titia gehu ke moi laga bhoral te joma koribi.’”
Sorisa Bijon Ekta Gash Hoi Jai
31Tai taikhan ke aru ekta dristanto koise, “Amar Pitri laga rajyo tu sorisa bijon ekta nisena ase, juntu ekjon manuh loi kene tar kheti te phelaise. 32Etu sob bijon pora sobse huru hoilebi, jitia etu bari uthe titia bagan laga sob gash pora dangor hoi jai, aru ekta gash hoi jai jun te chiriya khan ahhi kene tar daal te ghor bonai.”
Rajyo tu Lukai Thaka Khomir Nisena Kaam Kore
33Tai taikhan ke aru ekta dristanto dise, “Amar Pitri laga rajyo tu khomir nisena ase, juntu ekjon mahila loi kene pochis pound nisena atta te milai dise, jitia tak sob atta phuli uthise.”
34Jisu eitu sob kotha bhir khan ke dristanto pora koise; dristanto nacholi kene Tai taikhan ke eku bhi kowa nai.
35Eitu bhabobadi dwara kowa kotha pura hobole hoise: “Moi dristanto pora moi laga mukh khulibo; prithibi bona somoi pora lukai thaka kotha khan Moi kobo.”
Pitri pora Gehu ke Biya Ghas pora Alag Kore
36Titia Tai bhir ke chari kene ghor bhitor te ahhise. Tar chella khan Tar usorte ahhi kene koise, “Kheti te thaka biya ghas laga dristanto amikhan ke bujai dibi.”
37Tai jawab di koise, “Kun manuh bhal bijon phelaise tai Manuh laga Putro ase. 38Kheti tu prithibi ase. Bhal bijon tu rajyo laga bacha khan ase; biya ghas tu dusto jon laga bacha khan ase. 39Kun dushman etu phelaise tai saitan ase; kati luwa tu jamana laga ses ase; kati luwa manuh khan sorgoduth khan ase. 40Jineka biya ghas ke joma kori kene jui te julai diye, tineka jamana laga ses te bhi hobo. 41Manuh laga Putro pora Tar sorgoduth khan ke pathabo, aru paap kori diya sob jinis aru biya kaam kora sob manuh ke Tar rajyo pora uthai phelabo. 42Taikhan etu khan ke juli thaka jui laga bhatti bhitor te phelabo, kot te kanda aru daat kamura thakibo. 43Titia dharmik manuh khan taikhan laga Pitri laga rajyo te suruj nisena ujala hobo. Kun laga kaan ase tai hunibi.”
Rajyo tu Sob Jinis laga Daam ase
44Amar Pitri laga rajyo tu kheti te lukai thaka dhun nisena ase. Ekjon manuh etu bisari paise, aru etu ke arubi lukai dise, titia khushi pora tar logote ki ase sob bikri kori kene hei kheti kini loise.
45“Aru bhi, amar Pitri laga rajyo tu ekjon bebsai nisena ase, kun bhal moti bisari thake. 46Bisi daami moti ekta pai kene, tai jai kene tar logote ki ase sob bikri kori kene etu kini loise.
Jaal pora Sob Kisim Dhore
47Aru bhi, amar Pitri laga rajyo tu ekta jaal nisena ase, juntu samundar te phelai diye, aru sob kisim maas joma kore. 48Jitia etu bhorta hoise, maas dhora manuh khan etu ke kinar te tani ani kene, bohi jaise, aru bhal maas khan tukri te joma korise, kintu biya khan phelai dise. 49Jamana laga ses te bhi tineka hobo: sorgoduth khan ulai ahhi kene dharmik manuh khan majot pora dusto manuh khan ke alag koribo, 50aru taikhan ke juli thaka jui laga bhatti bhitor te phelabo, kot te taikhan kandibo aru daat kamuribo.”
51“Tumikhan eitu sob kotha bujise naki?” Taikhan jawab dise, “Hoi.”
52Tai taikhan ke koise, “Kun niyom laga guru amar Pitri laga rajyo nimite sikhise, tai ekjon ghor malik nisena ase, kun tar bhoral pora notun aru purana dhun khan ulai ane.”
Jisu ke Tar Nijor Sohor te Grohon Kora Nai
53Jitia Jisu eitu dristanto khan khotom korise, Tai ta pora jai jaise.
54Tar nijor sohor te wapas ahhi kene, Tai taikhan laga prathana ghor te sikhai dise, aru taikhan asurit hoise, koise, “Etu manuh etu gyaan aru etu dangor kaam khan kot pora paise? 55Etu barhoi laga chokra nohoi naki? Tar ama laga nam Mariam nohoi naki, aru tar bhai khan James, Joseph, Simon, aru Judas nohoi naki? 56Tar sob bhoini khan amikhan logote yate nai naki? Tetiya etu manuh eitu sob jinis kot pora paise?”
57Taikhan Tar uporte biya paise. Kintu Jisu taikhan ke koise, “Ekjon bhabobadi tar nijor sohor aru tar nijor ghor ke chari kene sob jagah te sonman pai.”
58Taikhan laga biswas nathaka karne, Tai ta te bisi askorjo kaam kora nai.