Putro he Bisram Din laga Prabhu ase
Bisram din te dhan tula aru sukhai ja haat bhal kora pora dush lagai, aru Pharisee khan Tai ke morai dibole buddhi kori bole shuru kore, Tai laga shakti Beelzebul pora ase koi kene. Tai jawab diye, bhag hoi ja rajyo giri jai, kotha khan pora mon dikhai diye, aru jun Pitri laga itcha kore, tai he Tai laga porivar ase.
12 1Eitu homoi te, bisram din te, Jisu dhan kheti par kori kene jaise. Tar chella khan bhuk lagi jaise, aru dhan laga mur khan singi kene khabole shuru korise. 2Eitu dekhi kene, Pharisees khan pora Tar ke koise, “Sabi—tumar chella khan bisram din te kanoon te mana kora kam kori ase.”
3Tar he tarkhan ke koise, “David aru tar logote thaka manuh khan bhuk lagise, titia David pora ki korise, eitu tumikhan pora porha nai neki?” 4tai keneka amar Pitri laga ghor te jai kene darshan laga roti khaise, juntu tai aru tar logote thaka khan nimite kanoon te mana thakise, khali puruhit khan nimite he rakha thakise? 5“Nahole, puruhit khan pora girja ghor te bisram din te bisram din bhangai diye hoilebi tarkhan te galti nai, eitu kanoon te tumikhan pora porha nai neki? 6Moi tumikhan ke koi ase, girja ghor pora bhi dangor ekjon iyate ase. 7‘Moi doya he mange, bolidaan namange’ eitu laga ortho ki ase jodi tumikhan pora bujile, tetiya tumikhan pora galti nathaka khan ke galti nadibole thakise. 8Kilemane Manuh laga Putro he bisram din laga Prabhu ase.”
Pitri laga Doya pora Bisram Din te Hustho Kore
9Tar eitu jaga pora age jai kene tarkhan laga girja ghor te humaise. 10Aru tate haat sukhi jua ekjon manuh thakise. Tar ke bodnam dibole bhabna kori kene tarkhan pora hudise, “Bisram din te hustho kori dibole kanoon te thik ase na nahoi?”
11Tar he tarkhan ke koise, “Tumikhan majote kon ase, kun laga ekta mer thakile, jodi eitu bisram din te chenda te giri jaise, taike dhori kene uthai nalobo neki? 12Tetiya mer ekta pora manuh he kiman besi dam ase! Eitu nimite bisram din te bhall kam koribole kanoon te thik ase.” 13Tetiya Tar he eitu manuh ke koise, “Tumar haat sidha koribi.” Aru tai haat sidha korise, aru eitu bhall hoi jaise, dusera haat nisna hustho hoi jaise.
14Kintu Pharisees khan bahar te jai kene Tar ke keneka khotom koribo eitu laga budhi alusona korise.
Pitri laga Priyo Nokor
15Jisu he eitu jani loi kene tate pora jai jaise. Aru besi manuh tar piche piche jaise, aru Tai tarkhan sob ke hustho kori dise, 16aru Tar kotha kunke bhi nakobole Tai tarkhan ke hukum dise. 17Eitu Isaiah bhavobadi pora koi thaka kotha tu purah hobole nimite hoise:
18“Sabi, Moi laga nokor—Jisu—kun ke Moi basi loise, Moi laga priyo ekjon, kun te Moi laga atma khushi pai. Moi laga Atma Tar uporte rakhibo, aru tai porjati khan ke niyai laga kotha janai dibo. 19Tai jagra nakoribo nahole chillabo nai, aru raasta phale kun pora bhi tar awaz nahunibo. 20Thatki jua nol ekta bhi tai nabhangibo, aru dhuwa ulai thaka mom bati bhi tai namorabo, jitia tak tai niyai ke jit te nalai ase; 21aru tar naam te porjati khan pora bharosa koribo.”
Alag Alag Hoi Jua Rajyo Khara Thakibo Naparibo
22Titia bhut pora dhori thaka andha, buba ekjon manuh ke Tar usor te anise, aru Tai taike hustho kori dise, titia eitu manuh kotha kobole aru dekhibole paise. 23Aru joma huwa sob manuh asorit lagise, aru koise, “Eitu David laga Putro hobo napare na?” 24Kintu eitu huni kene Pharisees khan pora koise, “Eitu manuh he bhut laga raja Beelzebul madad pora he bhut khan ke khedai ase.”
25Tarkhan laga bhabna jani kene Tai tarkhan ke koise, “Nijor majote birudhi kora sob rajyo alag alag hoi kene khotom hobo, aru nijor majote birudhi kora kun sohor nahole ghor khara kori thakibo naparibo. 26Aru jodi saitan pora saitan ke khedai, tetiya tai nijor majote alag alag hoi jaise. Tene hoile tar laga rajyo keneka khara kori thakibo? 27Jodi Moi Beelzebul darai bhut khan ke khedai ase, tene hoile tumar bacha khan kun darai eitu ke khedai diye? Eitu nimite tarkhan he tumikhan ke bichar koribo. 28Kintu jodi Moi amar Pitri laga Atma darai bhut khan ke khedai ase, tene hoile amar Pitri laga rajyo tumikhan usorte ahhi jaise. 29Nahole balowan ekjon ke age te nabandhile, manuh ekjon pora keneka tar laga ghor te jai kene bostu khan uthai lobo paribo? Age te bandhi dile, tetiya he tar ghor loot koribo paribo.
30Kun manuh Moi logote nathake, tai Moi birudh te ase, aru kun manuh Moi logote joma nakore, tai chitrai diye. 31Eitu nimite Moi tumikhan ke koi ase, manuh khan ke sob paap aru Isor ninda khyama koribo, kintu Atma birudh te kora ninda khyama nakoribo. 32Aru kun manuh Manuh laga Putro birudhi kotha koi, taike khyama pabo; kintu kun manuh Pobitro Atma birudhi kotha koi, eitu jugh te holebhi, ahhi thaka jugh te holebhi, taike khyama napabo.
33Gos tu bhall banabi aru eitu laga phol bhi bhall hobo, nahole gos tu beya banabi aru eitu laga phol bhi beya hobo, kilemane phol pora he gos tu jani loi. 34Tumi sanp laga bacha khan! Tumikhan beya hoi kene, keneka bhall kotha kobo paribo? Kilemane mon bhitor te ki bhorta ase, eitu he mukh pora ulai. 35Bhall manuh he bhall mon pora bhall bostu ulai diye; beya manuh he beya mon pora beya bostu ulai diye. 36Moi tumikhan ke koi ase, bichar din te manuh khan pora kowa sob hushier nakora kotha nimite tarkhan he jawab dibo lagibo, 37kilemane nijor kotha pora he tumikhan ke dharmik koribo, aru nijor kotha pora he tumikhan ke galti dibo.”
Jonah laga Sign
38Tetiya konuba pondit aru Pharisees khan pora koise, “Guru, amikhan Apuni pora ekta sign sabole mon ase.”
39Tar he jawab di koise, “Eitu beya, biyobichar jugh he sign bisare. Jonah bhavobadi laga sign pora alag eku sign bhi eitu ke nadibo. 40Keneka Jonah tin din aru tin raati dangor maas laga pet bhitor te thakise, eitu nisna Manuh laga Putro bhi tin din aru tin raati prithibi laga bhitor te thakibo. 41Bichar din te Nineveh laga manuh khan eitu jugh logot te khara kori kene eitu ke ninda koribo, kilemane tarkhan Jonah laga prachar huni kene mon bodli korise, aru sabi, Jonah pora bhi dangor ekjon iyate ase. 42Bichar din te dokshin laga raani eitu jugh logot te khara kori kene eitu ke ninda koribo, kilemane tai Solomon laga gyan kotha hunibole prithibi laga kinar pora ahhise—aru sabi, Solomon pora bhi dangor ekjon iyate ase.
43Ketiya ohusi atma manuh ekjon ke chari kene ulai jai, eitu aram bisari kene sukhan jaga khan te sob phale phure, kintu eku napai. 44Tetiya eitu koi, ‘Moi kon ghor pora ulai ahhise, tate ghurai jabo.’ Aru ahhi kene, eitu ghor khali, safa kori diya aru thik-thak kori rakha paise. 45Tetiya eitu jai kene tai pora bhi besi beya satta dusra atma loi ane; tarkhan tate ghusi kene thaki jai, aru eitu manuh laga antim halat shuru pora bhi besi beya hoi jai. Eitu beya jugh logote bhi eneka he hobo.”
Pitri laga Hosa Poribar
46Jisu etiya bhi joma huwa manuh khan logote kotha koi thaka homoi te, Tar amaa aru bhai khan Tar logote kotha patibole bisari kene bahar te khara thakise. 47Kunba ekjon pora Tar ke koise, “Sabi, Apuni laga amaa aru Apuni laga bhai khan Apuni logote kotha kobole bisari kene bahar te khara ase.”
48Jun pora khobor dise, Tar he taike uttar di kene koise, “Moi laga amaa kon ase, aru Moi laga bhai khan kon ase?”
49Aru nijor chella khan phale haat dekhai kene Tar he koise, “Sabi, iyate Moi laga amaa aru Moi laga bhai khan ase! 50Kilemane kun manuh sorgo te thaka Moi laga Pitri laga itcha pura kore, eitu he Moi laga bhai aru bhoni aru amaa ase.”