Mathayo 12

12 ¹Wakati huo Yesu alipita katika mashamba ya nafaka siku ya Sabato. Wanafunzi wake walikuwa na njaa wakaanza kuvunja masuke ya nafaka na kuyala. ²Mafarisayo walipoona hayo, wakamwambia, "Tazama—wanafunzi wako wanafanya yasiyo halali siku ya Sabato."

³Akawaambia, "Je, hamkusoma alilofanya Daudi wakati yeye na wenzake walipokuwa na njaa?" ⁴jinsi alivyoingia katika nyumba ya Baba yetu na kuila mikate ya Wonyesho, isiyo halali kwake wala kwa wenzake, iliyokuwa kwa ajili ya makuhani peke yao? ⁵"Au hamkusoma katika Torati kwamba siku ya Sabato makuhani hekaluni huivunja Sabato lakini hawana hatia? ⁶Nawaambia, kitu kilicho kikubwa kuliko hekalu kipo hapa. ⁷Kama mngejua maana ya, 'Nataka huruma, wala si dhabihu,' msingewahukumu wasio na hatia. ⁸Kwa maana Mwana wa Adamu ndiye Bwana wa Sabato."

Huruma ya Baba Yaponya Siku ya Sabato

⁹Akaondoka hapo akaingia katika sinagogi lao. ¹⁰Na palikuwa na mtu aliyekuwa na mkono uliopooza. Wakamwuliza, "Je, ni halali kuponya siku ya Sabato?"—wakitaka kumshtaki.

¹¹Akawaambia, "Ni nani miongoni mwenu, akiwa na kondoo, na huyo akitumbukia shimoni siku ya Sabato, asiyemshika na kumtoa? ¹²Basi, mtu ni bora kuliko kondoo kwa kadiri gani! Kwa hiyo ni halali kutenda mema siku ya Sabato." ¹³Ndipo akamwambia yule mtu, "Nyoosha mkono wako." Akaunyoosha, ukarudishwa mzima kama ule wa pili.

¹⁴Lakini Mafarisayo wakatoka nje wakafanya shauri jinsi ya kumwangamiza.

Mtumishi Mpendwa wa Baba

¹⁵Yesu, akijua hayo, akaondoka mahali pale. Na watu wengi wakamfuata, akawaponya wote, ¹⁶akawakataza wasimtangaze kwa mtu yeyote. ¹⁷Hayo yalikuwa ili litimie lile lililonenwa na nabii Isaya:

¹⁸"Tazama, mtumishi wangu—Yesu— niliyemchagua, mpendwa wangu ambaye nafsi yangu inapendezwa naye. Nitatia Roho yangu juu yake, naye atawatangazia mataifa haki. ¹⁹Hatagombana wala hatapiga kelele, wala hakuna mtu atakayeisikia sauti yake njiani. ²⁰Mwanzi uliopondeka hatauvunja, na utambi unaofuka moshi hatauzima, hata atakapoifikisha haki katika ushindi; ²¹na kwa jina lake mataifa wataweka tumaini lao."

Ufalme Uliogawanyika Hauwezi Kusimama

²²Ndipo wakamletea mtu aliyekuwa na pepo, kipofu na bubu, naye akamponya hata yule mtu akaweza kunena na kuona. ²³Na makutano wote wakastaajabu, wakasema, "Je, huyu si ndiye Mwana wa Daudi?" ²⁴Lakini Mafarisayo waliposikia hayo, wakasema, "Mtu huyu hatoi pepo ila kwa Beelzebuli, mkuu wa pepo."

²⁵Naye akijua mawazo yao, akawaambia, "Kila ufalme uliogawanyika juu ya nafsi yake huharibika, na kila mji au nyumba iliyogawanyika juu ya nafsi yake haitasimama. ²⁶Na kama Shetani anamtoa Shetani, amegawanyika juu ya nafsi yake. Basi ufalme wake utasimamaje? ²⁷Na kama mimi natoa pepo kwa Beelzebuli, wana wenu je, huwatoa kwa nani? Kwa hiyo wao watakuwa waamuzi wenu. ²⁸Lakini kama mimi natoa pepo kwa Roho wa Baba yetu, basi ufalme wa Baba yetu umekwisha kuwafikia. ²⁹Au awezaje mtu kuingia katika nyumba ya mtu mwenye nguvu na kumnyang'anya vitu vyake, asipomfunga kwanza yule mwenye nguvu? Ndipo atakapoiteka nyumba yake.

³⁰Yeye asiye pamoja nami yu kinyume changu, na yeye asiyekusanya pamoja nami hutapanya. ³¹Kwa sababu hiyo nawaambia, kila dhambi na kila kufuru watasamehewa watu, lakini kufuru juu ya Roho haitasamehewa. ³²Na mtu yeyote atakayenena neno kinyume cha Mwana wa Adamu atasamehewa; lakini yeyote atakayenena kinyume cha Roho Mtakatifu hatasamehewa—wala katika ulimwengu huu wala katika ule ujao.

³³Ufanyeni mti kuwa mzuri na tunda lake kuwa zuri, au ufanyeni mti kuwa mbaya na tunda lake kuwa baya, kwa maana mti hutambulikana kwa tunda lake. ³⁴Enyi wazao wa nyoka! Mwawezaje kunena mema, nanyi ni waovu? Kwa maana kinywa hunena yaujazayo moyo. ³⁵Mtu mwema hutoa mema katika hazina njema; na mtu mwovu hutoa maovu katika hazina mbovu. ³⁶Nami nawaambia, kwamba siku ya hukumu watu watatoa hesabu kwa kila neno lisilo maana wanalolinena, ³⁷kwa maana kwa maneno yako utahesabiwa haki, na kwa maneno yako utahukumiwa."

Ishara ya Yona

³⁸Ndipo baadhi ya waandishi na Mafarisayo wakasema, "Mwalimu, twataka kuona ishara kutoka kwako."

³⁹Akajibu, "Kizazi hiki kiovu na cha uzinzi chatafuta ishara, wala hakitapewa ishara ila ishara ya nabii Yona. ⁴⁰Kwa maana kama vile Yona alivyokuwa siku tatu mchana na usiku tumboni mwa nyangumi, ndivyo Mwana wa Adamu atakavyokuwa siku tatu mchana na usiku ndani ya moyo wa nchi. ⁴¹Watu wa Ninawi watasimama siku ya hukumu pamoja na kizazi hiki na kukihukumu; kwa maana wao walitubu kwa mahubiri ya Yona, na tazama, kitu kilicho kikubwa kuliko Yona kipo hapa. ⁴²Malkia wa Kusini atasimama siku ya hukumu pamoja na kizazi hiki na kukihukumu; kwa maana yeye alikuja kutoka miisho ya nchi ili kuisikia hekima ya Sulemani—na tazama, kitu kilicho kikubwa kuliko Sulemani kipo hapa.

⁴³Pepo mchafu amtokapo mtu, hupitia mahali pasipo na maji akitafuta mahali pa kupumzika, asipapate. ⁴⁴Ndipo husema, 'Nitarudi nyumbani kwangu nilikotoka.' Naye akija huiona tupu, imefagiwa, na kupambwa. ⁴⁵Kisha huenda na kuchukua pamoja naye pepo wengine saba walio waovu kuliko yeye mwenyewe; wakiingia hukaa humo, na hali ya mwisho ya mtu yule huwa mbaya kuliko ya kwanza. Ndivyo itakavyokuwa kwa kizazi hiki kiovu."

Jamaa ya Kweli ya Baba

⁴⁶Alipokuwa katika kusema na makutano, tazama, mama yake na ndugu zake walisimama nje, wakitaka kusema naye. ⁴⁷Mtu mmoja akamwambia, "Tazama, mama yako na ndugu zako wamesimama nje, wanataka kusema nawe."

⁴⁸Naye akamjibu yule aliyemwambia, "Mama yangu ni nani, na ndugu zangu ni nani?"

⁴⁹Kisha akanyoosha mkono wake kuwaelekea wanafunzi wake, akasema, "Tazama, mama yangu na ndugu zangu! ⁵⁰Kwa maana yeyote afanyaye mapenzi ya Baba yangu aliye mbinguni, huyo ndiye ndugu yangu, na dada yangu, na mama yangu."