Mathayo 11

11 ¹Baada ya Yesu kumaliza kuwaagiza wanafunzi wake kumi na wawili, aliondoka pale ili kufundisha na kuhubiri katika miji yao.

Swali la Yohana Kutoka Gerezani

²Yohana, akiwa gerezani, aliposikia habari za matendo ya Kristo, alituma ujumbe kupitia wanafunzi wake, ³na akamuuliza, "Wewe ndiye yule ajaye, au tumtazamie mwingine?"

⁴Yesu akawajibu, "Nendeni mkamweleze Yohana yale mnayosikia na kuyaona:

⁵"Vipofu wanaona, viwete wanatembea, wenye ukoma wanatakaswa, viziwi wanasikia, wafu wanafufuliwa, na maskini wanahubiriwa habari njema. ⁶Na amebarikiwa yule ambaye hajikwazi kwa sababu yangu."

⁷Walipokuwa wakiondoka, Yesu alianza kuuambia umati kuhusu Yohana: "Mlitoka kwenda nyikani kuona nini? Unyasi ukitikiswa na upepo? ⁸Lakini kwa nini mlitoka—kuona mtu aliyevaa mavazi laini? Tazama, wale wavaao mavazi laini wamo katika majumba ya kifalme. ⁹Lakini mlitoka kuona nini? Kuona nabii? Naam, nawaambia, aliye zaidi sana ya nabii. ¹⁰Huyu ndiye aliyeandikwa habari zake: 'Tazama, ninamtuma mjumbe wangu mbele yako, atakayeitengeneza njia yako mbele yako.' ¹¹Amin, nawaambia: miongoni mwa waliozaliwa na wanawake, hajatokea aliye mkuu kuliko Yohana Mbatizaji; lakini aliye mdogo katika ufalme wa Baba yetu ni mkuu kuliko yeye. ¹²Tangu siku za Yohana Mbatizaji hata sasa, ufalme wa Baba yetu unashambuliwa kwa nguvu, na wenye nguvu wanaunyakua. ¹³Kwa maana Manabii wote na Torati walitabiri hata wakati wa Yohana, ¹⁴na ikiwa mko tayari kulikubali, huyu ndiye Eliya aliyekuwa aje. ¹⁵Mwenye masikio, na asikie.

¹⁶Kizazi hiki nikifananishe na nini? Ni kama watoto walioketi masokoni, wakiwaita wenzao: ¹⁷'Tuliwapigia filimbi, wala hamkucheza; tuliimba wimbo wa maombolezo, wala hamkuomboleza.' ¹⁸Kwa maana Yohana alikuja bila kula wala kunywa, nao husema, 'Ana pepo.' ¹⁹Mwana wa Adamu alikuja akila na kunywa, nao husema, 'Tazama, mlafi na mlevi, rafiki wa watoza ushuru na wenye dhambi!' Lakini hekima huthibitishwa kuwa ni ya haki kwa matendo yake."

Ole kwa Miji Isiyotubu

²⁰Kisha akaanza kuikemea miji ambamo alikuwa amefanya miujiza yake mingi, kwa sababu haikutubu.

²¹"Ole wako, Korazini! Ole wako, Bethsaida! Kwa maana kama miujiza iliyofanyika kwenu ingalifanyika Tiro na Sidoni, wangalitubu zamani kwa kuvaa nguo za magunia na majivu. ²²Lakini nawaambia: siku ya hukumu itakuwa nyepesi zaidi kwa Tiro na Sidoni kuliko kwenu. ²³Nawe, Kapernaumu—je, utainuliwa mpaka mbinguni? Utashushwa hata kuzimu. Kwa maana kama miujiza iliyofanyika kwako ingalifanyika Sodoma, ingalikuwapo hata leo. ²⁴Lakini nawaambia: nchi ya Sodoma itakuwa na hali nafuu siku ya hukumu kuliko wewe."

Baba Anafunuliwa na Mwana

²⁵Wakati huo Yesu akasema, "Nakusifu wewe, Baba, Bwana wa mbingu na nchi, kwa kuwa umeyaficha mambo haya kwa wenye hekima na busara, nawe umewafunulia watoto wachanga. ²⁶Naam, Baba, kwa kuwa ndivyo ilivyokupendeza. ²⁷Nimekabidhiwa vyote na Baba yangu. Hakuna amjuaye Mwana ila Baba, wala hakuna amjuaye Baba ila Mwana, na yeye ambaye Mwana apenda kumfunulia Baba.

²⁸"Njoni kwangu, ninyi nyote mliochoka na kulemewa na mizigo, nami nitawapumzisha. ²⁹Jitieni nira yangu, mjifunze kwangu, kwa kuwa mimi ni mpole na mnyenyekevu wa moyo, nanyi mtapata raha kwa nafsi zenu. ³⁰Kwa maana nira yangu ni laini, na mzigo wangu ni mwepesi."