Matiu 11 FHB Father's Heart Bible™

11 ¹Mgbe Jisọs nyechara ndị na-eso ụzọ ya iri na abụọ ntụziaka, o si nʼebe ahụ pụọ izi ihe na ikwusa ozioma nʼobodo ha.

Ajụjụ Jọn Si nʼỤlọ Mkpọrọ

²Mgbe Jọn nọ nʼụlọ mkpọrọ nụ ihe banyere ọrụ Kraịst na-arụ, o zipụrụ ozi site nʼaka ndị na-eso ụzọ ya, ³jụọ ya sị, “Ị bụ onye ahụ nke ga-abịa, ka ọ bụ onye ọzọ ka anyị ga-echere?”

⁴Jisọs zara ha sị, “Gaanụ kọọrọ Jọn ihe unu na-anụ na ihe unu na-ahụ:

⁵“Ndị ìsì na-ahụ ụzọ, ndị ngwụrọ na-ejegharị, ndị ekpenta na-adị ọcha, ndị ntị chiri na-anụ ihe, ndị nwụrụ anwụ na-ebili, a na-ekwusakwara ndị ogbenye ozioma. ⁶Ngọzi na-adịrị onye ọbụla nke adịghị asụ ngọngọ nʼihi m.”

⁷Ka ha na-apụ, Jisọs malitere ịgwa ìgwè mmadụ banyere Jọn, sị, “Gịnị ka unu pụrụ gaa nʼọzara ịhụ? Ahịhịa achara nke ifufe na-efegharị? ⁸Kama gịnị ka unu pụrụ ịhụ—nwoke yi uwe dị nro? Lee, ndị na-eyi uwe dị nro bi nʼụlọeze. ⁹Kama gịnị ka unu pụrụ ịhụ? Onye amụma? E, agwa m unu, onye karịrị onye amụma nke ukwuu. ¹⁰Onye a bụ onye e dere banyere ya, sị, ‘Lee, ana m ezipu onye ozi m nʼihu gị, onye ga-edozi ụzọ gị nʼihu gị.’ ¹¹Nʼezie agwa m unu, nʼetiti ndị ụmụ nwanyị mụrụ, o nwebeghị onye bịliri karịa Jọn Onye Na-eme Baptizim; ma onye dịkarịsịrị nta nʼalaeze Nna anyị dị ukwuu karịa ya. ¹²Site nʼụbọchị Jọn Onye Na-eme Baptizim ruo ugbu a, alaeze Nna anyị na-anata mmegide site nʼike, ndị na-eme ihe ike na-achọkwa iweghara ya. ¹³Nʼihi na Ndị Amụma niile na Iwu buru amụma ruo mgbe Jọn bịara, ¹⁴ọ bụrụ na unu dị njikere ịnabata ya, ọ bụ Ịlaịja ahụ nke ga-abịa. ¹⁵Onye ọbụla nwere ntị, ya nụrụ.

¹⁶Gịnị ka m ga-eji tụnyere ọgbọ a? Ọ dị ka ụmụntakịrị nọ ọdụ nʼọmaahịa, na-akpọku ndị ọzọ, ¹⁷‘Anyị fụụrụ unu ọja, ma unu agbaghị egwu; anyị bụrụ abụ ọnwụ, ma unu akwaghị akwa.’ ¹⁸Nʼihi na Jọn bịara nʼadịghị eri ihe maọbụ ṅụọ ihe ọṅụṅụ, ha na-asị, ‘O nwere mmụọ ọjọọ.’ ¹⁹Nwa nke Mmadụ bịara na-eri ihe na-aṅụkwa ihe, ha na-asị, ‘Onye oké iri ihe na onye aṅụrụma, enyi ndị ọna ụtụ na ndị mmehie!’ Ma amamihe na-esite nʼọrụ ya gosi na o ziri ezi.”

Ahụhụ Dịịrị Obodo Ndị Na-echegharịghị

²⁰Mgbe ahụ, ọ malitere ịta obodo ndị ahụ ụta, ebe o mere ọtụtụ nʼime ọrụ ebube ya, nʼihi na ha echegharịghị.

²¹“Ahụhụ dịịrị gị, Korazin! Ahụhụ dịịrị gị, Betsaịda! Nʼihi na ọ bụrụ na e mere na Taịa na Saịdọn ọrụ ebube ndị ahụ e mere nʼime gị, ha gaara echegharị kemgbe oge, yikwasị uwe mkpe ma nọdụ nʼime ntụ. ²²Ma agwa m unu, nʼụbọchị ikpe, ọ ga-adịrị Taịa na Saịdọn mfe karịa ka ọ ga-adịrị unu. ²³Gị kwa, Kapaneum—a ga-ebuli gị ruo nʼeluigwe? A ga-eweda gị ruo nʼili. Nʼihi na ọ bụrụ na e mere na Sọdọm ọrụ ebube ndị ahụ e mere nʼime gị, ọ gaara na-adịgide ruo taa. ²⁴Ma agwa m unu, nʼụbọchị ikpe, ọ ga-adịrị ala Sọdọm mma karịa ka ọ ga-adịrị gị.”

Ọkpara Kpughere Nna

²⁵Nʼoge ahụ, Jisọs sịrị, “Ana m eto gị, Nna, Onye na-achị eluigwe na ụwa, nʼihi izochi ihe ndị a site nʼebe ndị maara ihe na ndị nwere nghọta nọ, ma kpughere ya ụmụntakịrị. ²⁶E, Nna, nʼihi na nke a tọrọ gị ụtọ. ²⁷Nna m enyefeela m ihe niile nʼaka. Ọ bụ naanị Nna maara Ọkpara, ọ bụkwa naanị Ọkpara maara Nna, na onye ọbụla Ọkpara họọrọ ịkpughere ya Nna.

²⁸“Bịakwutenụ m, unu niile ndị ike gwụrụ na ndị ibu arọ na-anyịda, m ga-enyekwa unu izuike. ²⁹Bokwasịnụ onwe unu yoku m, mụtakwaranụ ihe nʼaka m, nʼihi na adị m nwayọọ ma dị umeala nʼobi, unu ga-achọtakwara mkpụrụ obi unu izuike. ³⁰Nʼihi na yoku m dị mfe, ibu m dịkwa fẹẹfẹẹ.”