மத்தேயு 11

11 ¹இயேசு தம்முடைய பன்னிரண்டு சீஷர்களுக்கு உபதேசித்து முடித்தபின்பு, அவர்களுடைய ஊர்களில் போதிக்கவும் பிரசங்கிக்கவும் அவ்விடத்தைவிட்டுப் புறப்பட்டார்.

சிறையிலிருந்து யோவானின் கேள்வி

²யோவான் சிறைச்சாலையில் கிறிஸ்துவினுடைய கிரியைகளைக் குறித்துக் கேள்விப்பட்டு, தன் சீஷர்கள் மூலமாய்ச் சொல்லியனுப்பி, ³அவரிடத்தில், “வரப்போகிறவர் நீர்தானா, அல்லது வேறொருவருக்காக நாங்கள் காத்திருக்கவேண்டுமா?” என்று கேட்டான்.

⁴இயேசு அவர்களுக்குப் பிரதியுத்தரமாக: “நீங்கள் கேட்கிறதையும் காண்கிறதையும் யோவானிடத்தில் போய் அறிவியுங்கள்:

⁵குருடர் பார்வையடைகிறார்கள், சப்பாணிகள் நடக்கிறார்கள், குஷ்டரோகிகள் சுத்தமாக்கப்படுகிறார்கள், செவிடர் கேட்கிறார்கள், மரித்தோர் எழுப்பப்படுகிறார்கள், தரித்திரருக்கு நற்செய்தி பிரசங்கிக்கப்படுகிறது. ⁶என்னிமித்தம் இடறலடையாதிருக்கிறவன் எவனோ அவன் பாக்கியவான்.”

⁷அவர்கள் போகையில், இயேசு யோவானைக்குறித்து ஜனக்கூட்டங்களுடனே சொல்லத் தொடங்கினார்: “எதைப் பார்க்க வனாந்தரத்திற்குப் போனீர்கள்? காற்றினால் அசையும் நாணலையோ? ⁸அல்லது எதைப் பார்க்கப் போனீர்கள்? மெல்லிய வஸ்திரம் தரித்த மனிதனையோ? இதோ, மெல்லிய வஸ்திரம் தரிக்கிறவர்கள் அரண்மனைகளில் இருக்கிறார்கள். ⁹பின்னை எதைப் பார்க்கப் போனீர்கள்? ஒரு தீர்க்கதரிசியையோ? ஆம், தீர்க்கதரிசியைப் பார்க்கிலும் மேலானவரையே என்று உங்களுக்குச் சொல்லுகிறேன். ¹⁰‘இதோ, நான் என் தூதனை உமக்கு முன்பாக அனுப்புகிறேன், அவன் உமக்கு முன்பாக உம்முடைய வழியை ஆயத்தம்பண்ணுவான்’ என்று எழுதப்பட்டவர் இவர்தான். ¹¹மெய்யாகவே நான் உங்களுக்குச் சொல்லுகிறேன்: ஸ்திரீகளிடத்தில் பிறந்தவர்களில் யோவான்ஸ்நானனைப் பார்க்கிலும் பெரியவன் ஒருவனும் எழும்பினதில்லை; ஆகிலும் எங்கள் பிதாவின் ராஜ்யத்தில் சிறியவனாயிருக்கிறவன் அவனிலும் பெரியவன். ¹²யோவான்ஸ்நானனுடைய நாட்கள்முதல் இதுவரைக்கும் எங்கள் பிதாவின் ராஜ்யம் பலவந்தமடைகிறது, பலவந்தக்காரர் அதைப் பிடித்துக்கொள்ளுகிறார்கள். ¹³ஏனெனில் தீர்க்கதரிசிகள் யாவரும் நியாயப்பிரமாணமும் யோவான்வரைக்கும் தீர்க்கதரிசனம் உரைத்தன. ¹⁴நீங்கள் ஏற்றுக்கொள்ள மனதாயிருந்தால், வரப்போகிற எலியா இவன்தான். ¹⁵கேட்கிறதற்குக் காதுள்ளவன் கேட்கக்கடவன்.

¹⁶இந்தச் சந்ததியை எதற்கு ஒப்பிடுவேன்? சந்தைவெளிகளில் உட்கார்ந்து, தங்கள் தோழரைப் பார்த்துக் கூப்பிடுகிற பிள்ளைகளுக்கு அது ஒப்பாயிருக்கிறது: ¹⁷‘உங்களுக்காகக் குழல் ஊதினோம், நீங்களோ கூத்தாடவில்லை; புலம்பல் பாட்டைப் பாடினோம், நீங்களோ துக்கங்கொண்டாடவில்லை.’ ¹⁸ஏனெனில் யோவான் புசிக்காமலும் குடியாமலும் வந்தான்; அதற்கு அவர்கள், ‘அவனுக்குப் பிசாசு பிடித்திருக்கிறது’ என்கிறார்கள். ¹⁹மனுஷகுமாரன் புசித்தும் குடித்தும் வந்தார்; அதற்கு அவர்கள், ‘இதோ, போஜனப்பிரியனும் மதுபானப்பிரியனுமான மனிதன், ஆயக்காரருக்கும் பாவிகளுக்கும் சிநேகிதன்!’ என்கிறார்கள். ஆகிலும் ஞானமானது அதின் கிரியைகளால் நீதியுள்ளதென்று விளங்கும்.”

மனந்திரும்பாத ஊர்களுக்கு ஐயோ

²⁰அப்பொழுது, தமது பலத்த அற்புதங்கள் அதிகமாய் நடந்த ஊர்கள் மனந்திரும்பாதபடியால், அவர் அந்த ஊர்களைக் கடிந்துகொள்ளத் தொடங்கினார்:

²¹“கோராசினே, உனக்கு ஐயோ! பெத்சாயிதாவே, உனக்கு ஐயோ! உங்களில் செய்யப்பட்ட அற்புதங்கள் தீருவிலும் சீதோனிலும் செய்யப்பட்டிருந்ததானால், அவைகள் அந்நாளிலேயே இரட்டுடுத்திச் சாம்பலில் உட்கார்ந்து மனந்திரும்பியிருக்கும். ²²ஆனாலும் நியாயத்தீர்ப்புநாளில் உங்களுக்கு நேரிடுவதைப் பார்க்கிலும் தீருவுக்கும் சீதோனுக்கும் நேரிடுவது இலகுவாயிருக்கும் என்று உங்களுக்குச் சொல்லுகிறேன். ²³கப்பர்நகூமே, நீ வானபரியந்தம் உயர்த்தப்படுவாயோ? பாதாளபரியந்தம் தாழ்த்தப்படுவாய். உன்னில் செய்யப்பட்ட அற்புதங்கள் சோதோமில் செய்யப்பட்டிருந்ததானால், அது இந்நாள்வரைக்கும் நிலைத்திருக்கும். ²⁴ஆனாலும் நியாயத்தீர்ப்புநாளில் உனக்கு நேரிடுவதைப் பார்க்கிலும் சோதோம் தேசத்துக்கு நேரிடுவது இலகுவாயிருக்கும் என்று உங்களுக்குச் சொல்லுகிறேன்.”

குமாரனால் வெளிப்படுத்தப்படும் பிதாவானவர்

²⁵அக்காலத்திலே இயேசு சொன்னது: “வானத்துக்கும் பூமிக்கும் ஆண்டவராகிய பிதாவே, இவைகளை ஞானிகளுக்கும் விவேகிகளுக்கும் மறைத்து, குழந்தைகளுக்கு வெளிப்படுத்தினபடியால் உம்மைத் துதிக்கிறேன். ²⁶ஆம், பிதாவே, இப்படிச் செய்வது உமது பார்வைக்குப் பிரியமாயிருந்தது. ²⁷என் பிதாவினால் சகலமும் என்னிடத்தில் ஒப்புக்கொடுக்கப்பட்டிருக்கிறது. பிதாவானவரைத்தவிர வேறொருவரும் குமாரனை அறியார்; குமாரனையும், குமாரன் எவனுக்கு பிதாவை வெளிப்படுத்தச் சித்தமாயிருக்கிறாரோ அவனையும்தவிர வேறொருவரும் பிதாவை அறியார்.

²⁸“வருத்தப்பட்டுப் பாரஞ்சுமக்கிறவர்களே, நீங்கள் எல்லாரும் என்னிடத்தில் வாருங்கள்; நான் உங்களுக்கு இளைப்பாறுதல் தருவேன். ²⁹என் நுகத்தை உங்கள்மேல் ஏற்றுக்கொண்டு, என்னிடத்தில் கற்றுக்கொள்ளுங்கள்; நான் சாந்தமும் மனத்தாழ்மையுமாய் இருக்கிறேன்; அப்பொழுது உங்கள் ஆத்துமாக்களுக்கு இளைப்பாறுதல் கிடைக்கும். ³⁰என் நுகம் மெதுவாயும் என் சுமை இலகுவாயும் இருக்கிறது.”