Bani om nampui bing bi bachu thangnu
John na qwan in bi ongluga, Jisu ga hungnu dingnu maan ga gabo diga ngai lang mi lang thang rwe. Katak ga, to swaknu bing om bupu gaye, sung bazaang pinu make. Habei ga Jisu na Baom tasiatnu chwan bing mu basaan le baning lenu maknu nampui bing ding noh thang rwe, Bapa khou swanka rwe, khatle riangre ongnu tudannu khou sung bazaangnu pine.
11 1Jisu na Baom potroi pat somga kani ding zathang pi thang kabengga, bani om nampui bing bi bachu thangga sacham kasam lang habei gana se rwe.
Qwan in bina John om tangai
2John na qwan in bi Christa om chwan bing ga ngailuga, Baom potroi rwan bina chong lang thang rwe, 3maanna Bakhou ngaiye, “Nang hungnu dingnu maan ga gabo, mak tabe anina katei ding ngaak langbo?”
4Jisu na bani khou katake, “Nanina seluga nani ngaisu damnu khatle phaangmu damnu bing ga John khou bapuro:
5“Mik chonuna mu rwe, ket thoknuna se rwe, imphaannu rwan ga bathiang rwe, kana setnuna ngaisu rwe, thinuna ring thou rwe khatle lungsianu nun khou sacham kasam thang rwe. 6Khatle Ei om lang bina sung katop maknu maan ga aih saye.”
7Bani se ong bachamnu kaan bi, Jisu na mi khang khou John lang bi rin kalei rwe, “Nani pa-aam ding phaang lang ramhaang bi swaknubo? Thiraangna katopnu tou ga gabo? 8Atiyeda nani pa-aam mu lang se swaknubo? Banemnu pwan naat sin basoinu manpa khat ding gabo? Phaang ngo, banemnu pwan naat sinnu mi nun ga krwang in bi lungnuwe. 9Atiyeda nani pa-aam ding phaang lang swaknubo? Thiamting pakhat ding mu langbo? Hoi, Eina nani khou rinnuwe, thiamting ma le pi lian inkunu ding gaye. 10Heiya maan lang bi hiak thang ngaaknu gaye: ‘Phaang ngo, Eina Achonglang mi ding Nameithaan bi lang thang nge, maanna Nameithaan bi Nalampui ding bacha thanglune.’ 11Eina nani khou batak sekka rinnuwe, tameinuna ponnu mi nun lak pi, baptize to thangnu John ma lian inkunu pakhatcha le lon thou dam make; atiyeda ani Pa om krwang talei bi kasen pisanu ga maan ma lian inkuwe. 12baptize to thangnu John om lumik bina atun tangga, ani Pa om krwang talei na kabit kamai khaang rwe, khatle kabit kamai tonu nunna haga lousuwe. 13Balangbe thiamting rwan brumza khatle chongtan ga John tangga ri chong rin swak ngaake, 14khatle nanina haga lou lang za nge dabe, maan ga hungnu dingnu Elijah gaye. 15Tudannu kana amnu maan ga ngaisu ngo.
16Heiba mikin ding nga Eina pa-aam le diga rin kaba langbo? Haga keithian bing bi badung ongnu naosen rwan danne, banina bani khatna khat ting kouga rinne: 17‘Anina nani lang tamrwang sem thang nge, atiyeda nanina laam make; anina lungchung laa to thang nge, atiyeda nanina nu hwei make.’ 18Balangbe John na sa le makka in le makka hung rwe, khatle banina rinne, ‘Bakhou ri kasia khut rwe.’ 19Misa Sa Kapaisa ga sa inluga hung rwe, khatle banina rinne, ‘Maan ga taraonu khatle zu kalonu gaye, ramkhai khomnu le noh mi nun om baan gaye!’ Atiyeda theinu ga baom chwan bingna ririak senu diga indao thang nge.”
Koi impu maknu nampui bing aih sianuwe
20Habei ga Jisu na Baom tasiatnu chwan taswang khak tonu nampui bing ding twei kalei rwe, balangbe banina koi impu make.
21“Chorazin, nang aih sianuweda! Bethsaida, nang aih sianuweda! Balangbe nani khou to damnu tasiatnu chwan ga Tyre le Sidon bi to thang ngaake dabe, banina kamana bora pwan sin basoiluga khatle kaphut bi badungluga koi impu ting ngaake. 22Atiyeda Eina nani khou rinnuwe, chong kasemnu lumik pi ga Tyre le Sidon taram na nani ma inkuga khaangsalune. 23Khatle nang, Capernaum, tambaan tangga kai basaang ka thangnu dingbo? Nang kathi ram bi kaita thanglune. Balangbe nang khou to damnu tasiatnu chwan ga Sodom bi to thang ngaake dabe, haga aniya tangga am ong ting ngaake. 24Atiyeda Eina nani khou rinnuwe, chong kasemnu lumik pi Sodom taram na nang ma khaangsalune.”
Sa Kapaisana Pa ding indao thangnu
25Haba kaan bi Jisu na rinne, “Apa, tambaan le talei om Pukraangba, Eina Nang ding lwat pi lianne, balangbe Nangna heiya theinu mi khatle bathainu mi nun khouna inkam thangluga, naosen rwan khou indao thang rwe. 26Hoi Apa, balangbe heiya Nang lang bi bathai nge. 27Apana balang bingza Akhou bachoi thang rwe. Pa khatchaza makka Sa Kapaisa ga tu gaye dinu mi pakhatna le thei make; khatle Pa ga tubo dinu Sa Kapaisa khatle Sa Kapaisana Pa ding indao thang nwamnu maan za gana theiye.
28“Riangrega khatle potrit pumna ongnu nani brumza, Akhou hungro, atiga Eina nani ding pi zaanglune. 29Aom ringok ga nani chung bi phunluga Ei khouna bachu louro, balangbe Ei sung bazaangnu khatle lungning bi katangsanu gaye, atiga nanina nani katha lang zaang thangnu mulune. 30Balangbe Aom ringok ga kalailu nge, khatle Aom potrit ga kazaangnuwe.”