Matthew 11

11 ¹Jishuna awui sākhangatha̱ tharāda khanili ningmi kuphailaga, athumwui keinungbingli tamchithei kala hāshok khavai apam chiwui eina thuihaowa.

Phātoplungli Johnwui khangahān

²Johnna phātopli khalei tharan Khristawui otsak pongli shālaga, awui sākhangatha̱bingwui eina pao chihovai, ³kala ali ngahāna, "Na chi rākhavai a chikhala, lah ithumna khangatei akha phārakhala?"

⁴Jishuna athumli ngahānga, "Ungulu, nathumna theikahai kala shākahai chi Johnli unghānglu:

⁵"Khangapeobingna kathei samphanghaira, phei katekbingna zatpaihaira, phārrei kakazābingna kathar samphanghaira, khangakhokbingna shāhaira, kala kathebingli ringngasakhaira, kala kachāmbingli paokaphā hāshok samphanghaira. ⁶Kala iwui vang eina mangaphok a chi sokhamina."

⁷Athum thuikahaiwui thili, Jishuna yaruibingli Johnwui maramli tamchitheiphokta hānga, "Nathumna lamhāngli khi yangkhuikida khavākhala? Masina phankhavā titililā? ⁸Kha nathumna khi yangkhuikida khavākhala? Kachon khamanaka khangavai mi akha yangkhui khavailā? Yanglu, kachon khamanaka khangavaibing chi awungawui dolanli khaleina. ⁹Kha khi yangkhuikida khavākhala? Marān akha yangkhui khavailā? Mha, ina nathumli kahāngna, a chi marānli lāngda reikhameina. ¹⁰Awui pongli hithada kapihaida lei: 'Yanglu, iwui paophungmeli nali rida chihora, ana nali rida nawui shongfa ngarānmira.' ¹¹Kachangkhat ina nathumli hāngna, sha̱naona kapharā mibing ngachaili, Ra̱hikme Johnli reikhamei akha khipākha maleimana. Chithālala ithumwui Avā wungramli teomeikap kaje mi chi ali reimei. ¹²Ra̱hikme Johnwui atam eina ara eina tangda, ithumwui Avā wungramli khangama̱ sāngasaka, kala ngashaokazarbingna chili tukkhuira. ¹³Kaja marānbing saikora kala Ain china Johnwui thot eina tangda marāna, ¹⁴kala nathumna chi khuisang khavai mayāngaiakha, a chi rākhavai Elijah china. ¹⁵Shākhavai khanā kakā a china shākhuiranu.

¹⁶Thot hili ina khili ngaheosikhala? Hi naoshinaobing leihngapha̱li pamlaga, khangateibingli hangkhangarok kathāna: ¹⁷'Nathumwui vang sipa̱ ithumna khongmilala, kha nathumna pheijak majakmana; kathi laa ithumna sāla, kha nathumna chapkhangachā masāmana.' ¹⁸Kaja Johnna maphazā maphashakla kharā, laga athumna, 'A raih kaphungana' da hānga. ¹⁹Miwui Naomayarana rāphāshak rāphāzai, laga athumna, 'Morkahaka kala khamaripa, khāshinā khalokabing eina morei kaphungabingwui ngasotnaona!' da hānga. Chithālala thangkhamei chili awui otbingna mashunga da mayai."

Ning Mangatei Keinungbingli Kakhanang

²⁰Chiwui thili ana matakhak kahai ot kachungkha sāmi kahai keinungbingli kahara wukkhananghaowa, kaja athumna ning mangateimana.

²¹"Chorazin! Nali kakhanang ringkashi ngasāranu! Bethsaida! Nali kakhanang ringkashi ngasāranu! Kaja nathumwui alungli sākahai matakhak kahai ot chi Tyre eina Sidonli sāsāsi kaja, athumna bora ngavaida kala hotlātungli achā ning ngateihairara. ²²Kha ina nathumli kahāngna, bichar sāthangli, Tyre eina Sidonwui vang chi nathumwui vang eina paimeira. ²³Kala na Capernaum, kazing kāzokta na masot mimaraolā? Kazeiram tāshungda nali khuitāra. Nathumwui alungli sākahai matakhak kahai ot chi Sodomli sāsāsi kaja, chi aja zimiksho eina tangda leihaipaiki kajina. ²⁴Kha ina nathumli kahāngna, bichar sāthanghon nathumliva Sodomwui ngaleina khāngpaimeira."

Anaomayarana Avāli Chitheimi

²⁵Atam chitharan Jishuna hānga, "He Avā, kazingram kala okathuiwui Proho, nali ina masotchikatli, kaja nana thangkhamabing kala theishingkakhuibing eina hina ngathumihailaga, angangnaobingli hina chitheimihaowa; ²⁶Mha, Avā, kaja hikathā hi nawui kaphaningna. ²⁷Iwui Avāna ot saikora ili mihaira. Avā maningla Anaomayarali thei, Anaomayara maningla Avāli thei, kala Anaomayarana Avāli chitheimi khavai kapangkhuiki kaji mibingnala thei.

²⁸"Iwui ngalemli rālu, nathum kakhanangbing kala kharit otphun kaphungbing saikora, kala ina nathumli ngasāmkakhui mira. ²⁹Iwui kharitphun nathumtungli phunglu, kala iwui eina tamkhuilu, kaja ina ning khanima kala khangahuiana, kala nathumna nathumwui manglāwui vang ngasāmkakhui samphangra. ³⁰Kaja iwui kharitphun chi pailaka, kala iwui sakkhanā chi makharitmana."