Mateo 11

11 ¹Pagkatapos turuan ni Jesus ang kanyang labindalawang alagad, umalis siya roon upang magturo at mangaral sa kanilang mga bayan.

Ang Tanong ni Juan Mula sa Bilangguan

²Nang mabalitaan ni Juan sa bilangguan ang mga gawa ni Cristo, nagpasabi siya sa pamamagitan ng kanyang mga alagad, ³at itinanong sa kanya, “Ikaw ba ang siyang darating, o kailangan pa naming maghintay ng iba?”

⁴Sumagot sa kanila si Jesus, “Humayo kayo at iulat kay Juan ang inyong naririnig at nakikita:

⁵“Nakakakita na ang mga bulag, nakakalakad ang mga pilay, nalilinis ang mga may ketong, nakakarinig ang mga bingi, muling nabubuhay ang mga patay, at ipinapangaral ang mabuting balita sa mga dukha. ⁶At mapalad ang sinumang hindi natitisod dahil sa akin.”

⁷Habang sila ay umaalis, sinimulan ni Jesus na sabihin sa mga tao ang tungkol kay Juan: “Ano ang pinuntahan ninyong tingnan sa ilang? Isang tambong iniuuga ng hangin? ⁸Ngunit bakit kayo humayo—upang tingnan ang isang taong nakadamit ng malalambot na kasuotan? Tingnan ninyo, ang mga nakasuot ng malalambot na kasuotan ay nasa mga palasyo ng hari. ⁹Ngunit bakit kayo humayo? Upang tingnan ang isang propeta? Oo, sinasabi ko sa inyo, higit pa sa isang propeta. ¹⁰Ito ang siyang isinulat: ‘Tingnan mo, isinusugo ko ang aking mensahero na mauuna sa iyo, na maghahanda ng iyong daan sa unahan mo.’ ¹¹Katotohanang sinasabi ko sa inyo: sa mga ipinanganak ng mga babae, walang lumitaw na hihigit pa kay Juan na Tagapagbautismo; gayunman ang pinakamababa sa kaharian ng ating Ama ay higit sa kanya. ¹²Mula sa mga araw ni Juan na Tagapagbautismo hanggang ngayon, ang kaharian ng ating Ama ay nagtitiis ng karahasan, at inaagaw ito ng mararahas. ¹³Sapagkat ang lahat ng mga Propeta at ang Kautusan ay nanghula hanggang kay Juan, ¹⁴at kung nais ninyong tanggapin ito, siya ang Elias na darating. ¹⁵Ang may mga tainga, makinig siya.

¹⁶Sa ano ko maihahambing ang salinlahing ito? Ito ay tulad ng mga batang nakaupo sa mga pamilihan, na tumatawag sa iba: ¹⁷‘Tinugtugan namin kayo ng plauta, at hindi kayo sumayaw; umawit kami ng awiting panlibing, at hindi kayo nagdalamhati.’ ¹⁸Sapagkat dumating si Juan na hindi kumakain ni umiinom, at sinasabi nila, ‘Siya ay may demonyo.’ ¹⁹Dumating ang Anak ng Tao na kumakain at umiinom, at sinasabi nila, ‘Isang matakaw at lasenggo, kaibigan ng mga maniningil ng buwis at ng mga makasalanan!’ Gayunman ang karunungan ay napatutunayang tama sa pamamagitan ng kanyang mga gawa.”

Kaawa-awa ang mga Bayang Hindi Nagsisi

²⁰Pagkatapos ay sinimulan niyang tuligsain ang mga bayan kung saan niya ginawa ang karamihan sa kanyang mga himala, sapagkat hindi sila nagsisi.

²¹“Kaawa-awa ka, Corazin! Kaawa-awa ka, Betsaida! Sapagkat kung ang mga himalang ginawa sa inyo ay ginawa sa Tiro at Sidon, matagal na sana silang nagbalik-loob na nakadamit-panluksa at nasa abo. ²²Ngunit sinasabi ko sa inyo: higit na mababata ng Tiro at Sidon ang araw ng paghuhukom kaysa sa inyo. ²³At ikaw, Capernaum—itataas ka ba sa langit? Ibababa ka sa libingan. Kung ang mga himalang ginawa sa iyo ay ginawa sa Sodoma, nananatili pa sana ito hanggang ngayon. ²⁴Ngunit sinasabi ko sa inyo: higit na mapagbibigyan ang lupain ng Sodoma sa araw ng paghuhukom kaysa sa iyo.”

Ang Ama na Inihayag ng Anak

²⁵Nang panahong iyon ay sinabi ni Jesus, “Pinupuri kita, Ama, Panginoon ng langit at lupa, sa pagtatago mo nito sa marurunong at matatalino, at paghahayag nito sa mga sanggol. ²⁶Oo, Ama, sapagkat ito ang nakalulugod sa iyo. ²⁷Ang lahat ng bagay ay ipinagkatiwala sa akin ng aking Ama. Ang Ama lamang ang nakakakilala sa Anak, ang Anak lamang ang nakakakilala sa Ama, at ang sinumang piliin ng Anak na paghayagan tungkol sa Ama.

²⁸“Lumapit kayo sa akin, kayong lahat na pagod at nabibigatan, at bibigyan ko kayo ng kapahingahan. ²⁹Ipatong ninyo sa inyo ang aking pamatok at matuto kayo sa akin, sapagkat ako ay maamo at mapagpakumbaba sa puso, at makakasumpong kayo ng kapahingahan para sa inyong mga kaluluwa. ³⁰Sapagkat ang aking pamatok ay madali, at ang aking pasanin ay magaan.”