ማቴዎስ 11

11 ¹ኢየሱስ ዐሥራ ሁለቱን ደቀ መዛሙርቱን ማስተማር ከጨረሰ በኋላ፣ በከተሞቻቸው ሊያስተምርና ሊሰብክ ከዚያ ወጣ።

የዮሐንስ ጥያቄ ከእስር ቤት

²ዮሐንስ በእስር ቤት ሳለ የክርስቶስን ሥራ ሰምቶ፣ በደቀ መዛሙርቱ አማካይነት መልእክት ላከ፤ ³እንዲህም ሲል ጠየቀው፤ “የሚመጣው አንተ ነህን? ወይስ ሌላ እንጠብቅ?”

⁴ኢየሱስም መልሶ እንዲህ አላቸው፤ “ሄዳችሁ የምትሰሙትንና የምታዩትን ለዮሐንስ ንገሩት፦

⁵“ዕውሮች ያያሉ፤ አንካሶች ይሄዳሉ፤ ለምጻሞችም ይነጻሉ፤ ደንቆሮች ይሰማሉ፤ ሙታን ይነሣሉ፤ ለድኆችም ወንጌል ይሰበካል፤ ⁶በእኔም የማይሰናከል ሁሉ ብፁዕ ነው።”

⁷እነርሱም ሲሄዱ፣ ኢየሱስ ስለ ዮሐንስ ለሕዝቡ እንዲህ ማለት ጀመረ፤ “ምን ልታዩ ወደ ምድረ በዳ ወጣችሁ? በነፋስ የሚወዛወዝ ሸምበቆ? ⁸ታዲያ ለምን ወጣችሁ? ለስላሳ ልብስ የለበሰ ሰው ልታዩ? እነሆ፣ ለስላሳ ልብስ የሚለብሱ በነገሥታት ቤተ መንግሥት ይኖራሉ። ⁹ነገር ግን ለምን ወጣችሁ? ነቢይ ልታዩ? አዎን እላችኋለሁ፣ ከነቢይም እጅግ የሚበልጥ። ¹⁰ስለ እርሱ እንዲህ ተብሎ የተጻፈለት ይህ ነው፦ ‘እነሆ፣ መልእክተኛዬን ከፊትህ እልካለሁ፤ እርሱም መንገድህን በፊትህ ያዘጋጃል።’ ¹¹እውነት እላችኋለሁ፤ ከሴቶች ከተወለዱት መካከል ከመጥምቁ ዮሐንስ የሚበልጥ አልተነሣም፤ ነገር ግን በአባታችን መንግሥት ውስጥ ከሁሉ የሚያንሰው ከእርሱ ይበልጣል። ¹²ከመጥምቁ ዮሐንስ ዘመን ጀምሮ እስከ አሁን ድረስ፣ የአባታችን መንግሥት በኀይል ትገፋለች፤ ኀይለኞችም ይነጥቋታል። ¹³ነቢያቱ ሁሉና ሕጉ እስከ ዮሐንስ ድረስ ትንቢት ተናግረዋልና፤ ¹⁴ልትቀበሉትም ብትወዱ፣ ይመጣ ዘንድ ያለው ኤልያስ እርሱ ነው። ¹⁵የሚሰማ ጆሮ ያለው ይስማ።

¹⁶ይህን ትውልድ ከምን ጋራ አመሳስለዋለሁ? በገበያ ቦታ ተቀምጠው ሌሎችን የሚጣሩ ልጆችን ይመስላል፤ ¹⁷‘ዋሽንት ነፋንላችሁ፤ እናንተ ግን አልጨፈራችሁም፤ የሙሾ ዝማሬ ዘመርንላችሁ፤ እናንተ ግን አላለቀሳችሁም።’ ¹⁸ዮሐንስ ሳይበላና ሳይጠጣ መጥቶ ነበርና፣ ‘ጋኔን አለበት’ ይላሉ። ¹⁹የሰው ልጅ እየበላና እየጠጣ መጣ፣ ‘እነሆ፣ ሆዳምና ጠጪ፣ የቀራጮችና የኀጢአተኞች ወዳጅ!’ ይላሉ። ነገር ግን ጥበብ በሥራዋ ጸደቀች።”

ንስሓ ላልገቡ ከተሞች ወዮ

²⁰ከዚያም አብዛኛውን ተአምራቱን ያደረገባቸውን ከተሞች ንስሓ ስላልገቡ ይወቅሳቸው ጀመር።

²¹“አንቺ ኮራዚን፣ ወዮልሽ! አንቺ ቤተ ሳይዳ፣ ወዮልሽ! በእናንተ የተደረጉት ተአምራት በጢሮስና በሲዶና ተደርገው ቢሆን ኖሮ፣ ከብዙ ጊዜ በፊት ማቅ ለብሰውና አመድ ነስንሰው ንስሓ በገቡ ነበር። ²²ነገር ግን እላችኋለሁ፤ በፍርድ ቀን ከእናንተ ይልቅ ለጢሮስና ለሲዶና ይቀልላቸዋል። ²³አንቺም ቅፍርናሆም፣ እስከ ሰማይ ከፍ ከፍ ትያለሽን? እስከ ሲኦል ድረስ ትወርጃለሽ። በአንቺ የተደረጉት ተአምራት በሰዶም ተደርገው ቢሆን ኖሮ፣ እስከ ዛሬ በቆመች ነበር። ²⁴ነገር ግን እላችኋለሁ፤ በፍርድ ቀን ከአንቺ ይልቅ ለሰዶም ምድር ይቀልላታል።”

አብ በወልድ መገለጡ

²⁵በዚያን ጊዜ ኢየሱስ እንዲህ አለ፤ “አባት ሆይ፣ የሰማይና የምድር ጌታ፣ ይህን ከጥበበኞችና ከአስተዋዮች ሰውረህ ለሕፃናት ስለ ገለጥህ አመሰግንሃለሁ። ²⁶አዎን አባት ሆይ፣ ይህ በፊትህ መልካም ሆኖ ታይቶአልና። ²⁷ሁሉ ከአባቴ ዘንድ ተሰጠኝ። ወልድንም ከአብ በቀር ማንም አያውቀውም፤ አብንም ከወልድና ወልድ ሊገልጥለት ከሚወድደው በቀር ማንም አያውቀውም።

²⁸“እናንተ ደካሞችና ሸክም የከበዳችሁ ሁሉ፣ ወደ እኔ ኑ፤ እኔም ዕረፍት እሰጣችኋለሁ። ²⁹ቀንበሬን በላያችሁ ተሸከሙ፤ ከእኔም ተማሩ፤ እኔ የዋህና በልቤ ትሑት ነኝና፤ ለነፍሳችሁም ዕረፍት ታገኛላችሁ። ³⁰ቀንበሬ ልዝብ፣ ሸክሜም ቀላል ነውና።”