ማቴዎስ 10

10 ¹ኢየሱስ ዐሥራ ሁለቱን ደቀ መዛሙርቱን ጠርቶ፣ ርኩሳን መናፍስትን እንዲያወጡና በሽታን ሁሉ፣ ደዌን ሁሉ እንዲፈውሱ በእነርሱ ላይ ሥልጣን ሰጣቸው። ²የዐሥራ ሁለቱ ሐዋርያት ስም ይህ ነው፤ መጀመሪያ ጴጥሮስ የተባለው ስምዖን፣ ወንድሙም እንድርያስ፤ የዘብዴዎስ ልጅ ያዕቆብ፣ ወንድሙም ዮሐንስ፤ ³ፊልጶስና በርተሎሜዎስ፤ ቶማስና ቀራጩ ማቴዎስ፤ የእልፍዮስ ልጅ ያዕቆብና ታዴዎስ፤ ⁴ቀነናዊው ስምዖንና አሳልፎ የሰጠው የአስቆሮቱ ይሁዳ።

⁵ኢየሱስ እነዚህን ዐሥራ ሁለቱን ላከ፤ እንዲህ ሲል አዘዛቸው፤ “ወደ አሕዛብ አገር አትሂዱ፤ ወደ ሰማርያ ከተማም አትግቡ። ⁶ይልቁንም ወደ እስራኤል ቤት ወደ ጠፉት በጎች ሂዱ። ⁷ስትሄዱም እንዲህ የሚለውን መልእክት አውጁ፤ ‘የአባታችን መንግሥት ቀርቧል።’ ^a a v7 “የአባታችን መንግሥት” የሚለው፣ ማቴዎስ በወንጌሉ ሁሉ የሚጠቀምበትን ይበልጥ የታወቀውን “የሰማይ መንግሥት” የሚለውን ይተካል። ሁለቱም ሐረጎች አንድን እውነታ ይሰይማሉ፤ ይኸውም የአባታችን ግዛት ወደ ዓለም መግባቱን ነው። ⁸የታመሙትን ፈውሱ፤ ሙታንን አስነሡ፤ ለምጻሞችን አንጹ፤ አጋንንትን አውጡ። በነጻ ተቀብላችኋል፤ በነጻ ስጡ። ⁹በመቀነታችሁ ወርቅ ቢሆን ብር ቢሆን መዳብ ቢሆን አትያዙ። ¹⁰ለመንገድ ከረጢት ቢሆን ሁለተኛ እጀ ጠባብ ቢሆን ጫማ ቢሆን በትር ቢሆን አትያዙ፤ ሠራተኛ ምግቡ ይገባዋልና። ¹¹በማንኛውም ከተማ ወይም መንደር ስትገቡ፣ በዚያ የሚገባው ማን እንደ ሆነ አጣሩ፤ ከዚያ እስክትወጡ ድረስም በዚያው ተቀመጡ። ¹²ወደ ቤቱም ስትገቡ ሰላምታ ስጡ። ¹³ቤቱም የሚገባው ቢሆን ሰላማችሁ ይውረድበት፤ የማይገባው ቢሆን ግን ሰላማችሁ ወደ እናንተ ይመለስ። ¹⁴ማንም ባይቀበላችሁ ወይም ቃላችሁን ባይሰማ፣ ከዚያ ቤት ወይም ከተማ ስትወጡ የእግራችሁን ትቢያ አራግፉ። ¹⁵እውነት እላችኋለሁ፤ በፍርድ ቀን ከዚያች ከተማ ይልቅ ለሰዶምና ለገሞራ ይቀልላቸዋል።

¹⁶እነሆ፣ እንደ በጎች በተኩላዎች መካከል እልካችኋለሁ፤ ስለዚህ እንደ እባብ ብልኆች፣ እንደ ርግብ የዋሆች ሁኑ። ¹⁷ከሰዎች ተጠንቀቁ፤ ለሸንጎ አሳልፈው ይሰጧችኋልና፤ በምኵራባቸውም ይገርፏችኋል። ¹⁸ስለ እኔም ለእነርሱና ለአሕዛብ ምስክር እንዲሆን በገዦችና በነገሥታት ፊት ትቀርባላችሁ። ¹⁹አሳልፈው በሚሰጧችሁ ጊዜ፣ ምን እንደምትናገሩ ወይም እንዴት እንደምትናገሩ አትጨነቁ፤ የምትናገሩት በዚያች ሰዓት ይሰጣችኋልና፤ ²⁰የሚናገረው የአባታችሁ መንፈስ በእናንተ ሆኖ ነውና እንጂ፣ የምትናገሩ እናንተ አይደላችሁም።

²¹ወንድም ወንድሙን ለሞት አሳልፎ ይሰጣል፤ አባትም ልጁን፤ ልጆችም በወላጆቻቸው ላይ ይነሣሉ፤ እንዲገደሉም ያደርጋሉ። ²²ስለ ስሜም ሰዎች ሁሉ ይጠሏችኋል፤ እስከ መጨረሻ የሚጸና ግን እርሱ ይድናል። ²³በአንዲቱ ከተማ ሲያሳድዷችሁ ወደ ሌላዪቱ ሽሹ። እውነት እላችኋለሁ፤ የሰው ልጅ ሳይመጣ የእስራኤልን ከተሞች አትዘልቁም።

²⁴ደቀ መዝሙር ከመምህሩ አይበልጥም፤ ባሪያም ከጌታው አይበልጥም። ²⁵ደቀ መዝሙር እንደ መምህሩ፣ ባሪያም እንደ ጌታው ቢሆን ይበቃዋል። የቤቱን ባለቤት ብዔልዜቡል ካሉት፣ የቤቱን ሰዎችማ እንደ ምን አብልጠው ይሉ!

²⁶ስለዚህ አትፍሯቸው። የማይገለጥ የተሸፈነ፣ የማይታወቅም የተሰወረ ነገር የለምና። ²⁷በጨለማ የምነግራችሁን በብርሃን ተናገሩ፤ በጆሮአችሁ የሚሹከሹከውን ከሰገነት ላይ ሆናችሁ አውጁ። ²⁸ሥጋን የሚገድሉትን ነፍስን ግን መግደል የማይችሉትን አትፍሩ፤ ይልቁንም ነፍስንም ሥጋንም በገሃነም ሊያጠፋ የሚችለውን ፍሩ።

²⁹ሁለት ድንቢጦች በአንድ ሳንቲም አይሸጡምን? ከእነርሱም አንዲቱ እንኳ ያለ አባታችሁ ፈቃድ ወደ ምድር አትወድቅም። ³⁰የራሳችሁ ጠጉር እንኳ ሁሉ ተቈጥሯል። ³¹ስለዚህ አትፍሩ፤ እናንተ ከብዙ ድንቢጦች ትበልጣላችሁ።

³²ስለዚህ በሰዎች ፊት የሚመሰክርልኝን ሁሉ፣ እኔ ደግሞ በሰማይ ባለው በአባቴ ፊት እመሰክርለታለሁ። ³³በሰዎች ፊት የሚክደኝን ግን፣ እኔ ደግሞ በሰማይ ባለው በአባቴ ፊት እክደዋለሁ።

³⁴በምድር ሰላምን ለማምጣት የመጣሁ አይምሰላችሁ፤ ሰይፍን ለማምጣት እንጂ ሰላምን ለማምጣት አልመጣሁም። ³⁵ሰውን ከአባቱ፣ ሴት ልጅን ከእናቷ፣ ምራትንም ከአማቷ ጋር ላጣላ መጥቻለሁና፤ ³⁶የሰውም ጠላቶቹ የገዛ ቤተ ሰዎቹ ይሆናሉ። ³⁷ከእኔ ይልቅ አባቱን ወይም እናቱን የሚወድ ለእኔ አይገባውም፤ ከእኔ ይልቅ ወንድ ልጁን ወይም ሴት ልጁን የሚወድ ለእኔ አይገባውም። ³⁸መስቀሉን ተሸክሞ የማይከተለኝ ለእኔ አይገባውም። ³⁹ነፍሱን የሚያገኝ ያጠፋታል፤ ስለ እኔም ነፍሱን የሚያጠፋ ያገኛታል።

⁴⁰እናንተን የሚቀበል እኔን ይቀበላል፤ እኔንም የሚቀበል የላከኝን ይቀበላል። ⁴¹ነቢይን በነቢይ ስም የሚቀበል የነቢይን ዋጋ ያገኛል፤ ጻድቅንም በጻድቅ ስም የሚቀበል የጻድቅን ዋጋ ያገኛል። ⁴²ከእነዚህም ከታናናሾቹ ለአንዱ፣ ደቀ መዝሙሬ ስለ ሆነ ብቻ አንዲት ጽዋ ቀዝቃዛ ውሃ የሚያጠጣ፣ እውነት እላችኋለሁ፣ ዋጋው ከቶ አይጠፋበትም።”